قازاقستاندىق بوكسشى قىزداردىڭ جارتىلاي فينالداعى قارسىلاستارى انىقتالدى

تۇركيانىڭ ىستانبۇل قالاسىندا ءوتىپ جاتقان الەمدىك دودانىڭ جارتىلاي فينالىندا قازاقستاندىق 5 سپورتشى باق سىنايدى. اقتىق سىنعا كىمدەردىڭ وتەتىنىن بۇگىن, 18 مامىر كۇنگى جەكپە-جەكتەردە انىقتايمىز.

جارتىلاي فينالداعى كۇندىزگى سەسسيا ەلوردا ۋاقىتىمەن 16:55-دە باستالادى. بوكسشىلارىمىزدىڭ بارلىعى ا رينگىندە شارشى الاڭعا شىعادى. قازاقستاندىق الۋا بالقىبەكوۆا (48 كەلى) ەكىنشى جۇپتا بولگاريالىق سەۆدا اسەنوۆامەن قولعاپ تۇيىستىرسە, جاينا شەكەربەكوۆا (52 كەلى) ءۇشىنشى جۇپتا تايلاندتىق دجۋتاماس دجيتپونگپەن تارتىسقا تۇسەدى. ال 57 كەلىدە بەسىنشى جۇپتا كارينا يبراگيموۆا تايبەيلىك لين يۋ تينمەن كەزدەسسە, 70 كەلىدە ونىنشى جۇپتا ۆالەنتينا حالزوۆا موزامبيكتىك السيندا حەلەنا پانگۋانمەن فينالعا بەرىلەتىن جولدامانى ساراپقا سالادى.

كەشكى سەسسيا 20:55-دە باستالادى. اتالعان سەسسيادا 54 كەلىدە ءتورتىنشى جۇپتا دينا جولامان رۋمىنيالىق لاكراميورا پەريشوچپەن كەزدەسەدى.