مۇگەدەكتىگى بار ادامداردىڭ دا جۇرگىزۋشى كۋالىگىن الۋعا مۇمكىندىگى بار

مۇگەدەكتىگى بار ازاماتتار ءبولىمنىڭ اۆتودرومىندا ارنايى جاساقتالعان كولىكتى ايداپ, جۇرگىزۋشى كۋالىگىن الۋ ءۇشىن تاپسىرىلاتىن پراكتيكالىق ەمتيحان تۋرالى مالىمەتتەرگە قانىقتى.

ايتا كەتەيىك, اتالعان بولىمدەگى «Zaz Chance» ماركالى مەحانيكالىق قوراپتى اۆتوكولىگى ءجۇرۋ قابىلەتىنەن ايرىلعان ازاماتتار ءۇشىن قولمەن باسقارىلاتىن ەتىپ جاساقتالعان. مۇمكىندىگى شەكتەۋلى ازاماتتار تەوريالىق سىناقتان ءساتتى وتسە, پراكتيكالىق ەمتيحاندى  ارنايى كولىكپەن تاپسىرادى.

ارنايى كولىكتى جۇرگىزىپ كورگەن «قىزىلوردا وبلىستىق مۇگەدەكتەر» قوعامدىق بىرلەستىگىنىڭ توراعاسى ساعاتەك سيۋوۆ مۇگەدەكتىگى بار ادامدار ءۇشىن پراكتيكالىق سىناق تاپسىرۋ كولىگىنىڭ قولايلى ەكەندىگىن جەتكىزدى.

- مەن وسى اۆتودرومدا كولىكتى جۇرگىزىپ كوردىم. مەحانيكالىق قوراپتى بولعانىمەن مۇگەدەكتىگى بار ادامدار ءۇشىن ارنايى جاساقتالعان كولىك وتە ىڭعايلى. تەوريالىق سىناقتان ءساتتى وتكەن تاعدىرلاستارىمىز, دايىندالسا بۇل سىناقتان دا وتەدى دەپ ويلايمىن. مۇگەدەكتىگى بار ادامداردىڭ كوبى كولىك جۇرگىزۋگە مۇمكىندىگىمىز جوق دەپ ويلايدى. الايدا, ىنتاسى بار ادامدار بۇل قورقىنىشتى جەڭە الادى, - دەيدى «قىزىلوردا وبلىستىق مۇگەدەكتەر» قوعامدىق بىرلەستىگىنىڭ توراعاسى ساعاتەك سيۋوۆ.

شارا بارىسىندا «ازاماتتارعا ارنالعان ۇكىمەت» مەملەكەتتىك كورپوراتسياسى» كەاق قىزىلوردا وبلىسى بويىنشا فيليالىنىڭ ديرەكتورى اينۇر توباەۆا مامانداندىرىلعان ءبولىمنىڭ جىل باسىنان بەرى اتقارعان جۇمىستارىن دا ايتىپ ءوتتى. ايتۋىنشا اعىمداعى جىلدىڭ 5 ايىندا اتالعان ءبولىم جەكە جانە زاڭدى تۇلعالاردان تۇسكەن  17 مىڭ 904 ءوتىنىشتى راسىمدەگەن. ونىڭ ىشىندە «كولىك قۇرالىنىڭ سايكەستەندىرۋ ءنومىرى بويىنشا كولىك قۇرالدارىنىڭ جەكەلەگەن تۇرلەرىن مەملەكەتتىك تىركەۋ جانە ەسەپكە الۋ» قىزمەتى بويىنشا 13 مىڭ 792, «جۇرگىزۋشى كۋالىگىن بەرۋ» قىزمەتى بويىنشا 4 مىڭ 112 قىزمەت كورسەتىلگەن. فيليال ديرەكتورى كەي مەملەكەتتىك قىزمەتتەردىڭ ونلاين تۇردە وڭتايلاندىرىلعاندىعىن دا تىلگە تيەك ەتتى.

- وزدەرىڭىزگە بەلگىلى پاندەميا بىزگە ونلاين جۇمىستىڭ تيىمدىلىگىن كورسەتتى. قازىرگى تاڭدا كوپتەگەن مەملەكەتتىك قىزمەتتى حالىققا قىزمەت كورسەتۋ ورتالىقتارىن بارماي-اق «egov.kz» پورتالى ارقىلى الۋعا بولادى. قازىرگى تاڭدا كولىك قۇرالىنىڭ سايكەستەندىرۋ ءنومىرى بويىنشا كولىك قۇرالدارىنىڭ جەكەلەگەن تۇرلەرىن مەملەكەتتىك تىركەۋ جانە ەسەپكە الۋ قىزمەتىن جوعارىدا ايتىپ وتكەندەي «egov.kz» پورتالى مەن «eGov mobile», «kaspi.kz» قوسىمشاسى ارقىلى قول جەتكىزۋ مۇمكىندىگى بار. جىل باسىنان بەرى اۆتوكولىكتى ونلاين تىركەۋ بويىنشا 5 مىڭ 642 قىزمەت كورسەتىلگەن. سونداي-اق, اعىمداعى جىلدىڭ 5 ايىندا مەرزىمى وتكەن جۇرگىزۋشى كۋالىكتەرىن اۋىستىرۋ ءۇشىن ونلاين تۇردە 109 قىزمەت ورىندالدى. بۇل ەكى قىزمەتتى ونلاين تۇردە راسىمدەگەندەر كۋالىكتى, كولىك قۇجاتى مەن ءنومىرىن قالا سىرتىنداعى مامانداندىرىلعان بولىمگە بارماي-اق, استانا داڭعىلى 46 ءۇي مەكەن-جايىنداعى №2 حقو-نان الۋىنا بولادى, - دەدى اينۇر توباەۆا.

جىل باسىنان بەرى مامانداندىرىلعان بولىمگە 5 مىڭ 852 ادام جۇرگىزۋشى كۋالىگىن الۋ ماقساتىندا جۇگىنگەن. ونىڭ ىشىندە كۋالىكتى العاش الۋعا 1 مىڭ 509 ازامات ءوتىنىش بىلدىرسە, 336-سى سىناقتاردان ءساتتى ءوتىپ, جۇرگىزۋشى كۋالىگىن العان.

وسى ارالىقتا جول ەرەجەسىن بۇزىپ, جۇرگىزۋشى كۋالىگىنەن ايرىلعان 759 ادام قايتا كۋالىك الۋ ماقساتىندا جۇگىنگەن. ولاردىڭ 80-ءى تەوريالىق ەمتيحاندى ءساتتى تاپسىرىپ, كۋالىگىن قايتا الدى. ايتا كەتەيىك, بۇل ساناتتاعىلار پراكتيكالىق ەمتيحان تاپسىرمايدى.

سونداي-اق, 5 اي ىشىندە قوسىمشا كاتەگوريا الۋ ءۇشىن 85 قىزمەت الۋشىدان ءوتىنىش كەلىپ ءتۇستى. ولاردىڭ 12-ءسى سىناقتاردان ءوتىپ, قالاعان قىزمەتتەرىنە قول جەتكىزدى.

مامانداندىرىلعان بولىمدە 2022 جىلدىڭ 5 ايىندا 228 جوعارى سۇرانىسقا يە مەملەكەتتىك تىركەۋ نومىرلىك بەلگىسى, ياعني, «VIP» ساناتتاعى نومىرلەر ساتىلىپ بيۋدجەتكە 61 ملن 342 مىڭ 701 تەڭگە ءتۇستى.