اتىراۋ وبلىسىندا جولاۋشىلار پويىزى موتوتسيكل مىنگەن ەر ادامدى قاعىپ كەتتى, دەپ حابارلايدى Egemen.kz.
كۋاگەرلەردىڭ سوزىنە قاراعاندا, وقيعا 16 مامىر كۇنى قۇلسارى – بەينەۋ ارالىعىندا بولدى. ساعات 17.50-دە كۇزەتىلمەيتىن رەتتەلەتىن وتكەلدە موتوتسيكل مىنگەن ەر ادامدى اتىراۋ-ماڭعىستاۋ باعىتىندا جۇرەتىن №314 جولاۋشىلار پويىزى قاعىپ كەتكەن. ەر ادام قۇلسارى قالاسىنداعى اۋرۋحاناعا جەتكىزىلگەنىمەن, سوندا كوز جۇمدى. ءىىم كولىكتەگى پوليتسيا دەپارتامەنتىنىڭ ءباسپاسوز قىزمەتى بولعان وقيعانى راستادى.
«اتالعان دەرەك اتىراۋ ستانتسياسىنداعى جەلىلىك پوليتسيا ءبولىمىنىڭ سوتقا دەيىنگى تەرگەپ-تەكسەرۋدىڭ بىرىڭعاي تىزىلىمىندە قر قك 344-بابى 2-بولىگى (ابايسىزدا ادام ولىمىنە اكەپ سوققان تەمىرجول كولىگى قوزعالىسىنىڭ قاۋىپسىزدىك قاعيدالارىن بۇزۋ) بويىنشا تىركەلدى. قازىرگى ۋاقىتتا ءىس بويىنشا قاجەتتى تەرگەۋ امالدارى جۇرگىزىلۋدە. وزگە اقپارات قىلمىستىق ءىس جۇرگىزۋ كودەكسىنىڭ 201-بابىنىڭ تالاپتارىنا سايكەس تەرگەۋ مۇددەسىنە وراي جاريالاۋعا جاتپايدى», دەپ حابارلادى ۆەدومستۆودان.