قازاقستاندىق وزات وقۋشىلار كيپردە وتكەن حالىقارالىق ءبىلىم جارىسىنان ولجالى ورالدى. ماتەماتيكادان بيىلعى بالقان وليمپياداسىندا قورجىنعا 2 كۇمىس جانە 4 قولا سالىندى. وسىلايشا, ەلدىڭ ۇلتتىق قۇراماسى بىلتىرعى ناتيجەنى جاقسارتتى.
زياتكەرلىك جارىس 4-9 مامىر ارالىعىندا لارناكا قالاسىندا (كيپر) وفلاين فورماتتا ءوتتى. وسى جىلى وليمپياداعا البانيا, بوسنيا جانە گەرتسەگوۆينا, بولگاريا, كيپر, ماكەدونيا, گرەكيا, مولدوۆا رەسپۋبليكاسى, چەرنوگوريا رەسپۋبليكاسى, رۋمىنيا, سەربيا سەكىلدى 16 ەلدەن 100-گە جۋىق وقۋشى قاتىستى.
«دارىن» رەسپۋبليكالىق عىلىمي-پراكتيكالىق ورتالىعىنىڭ ديرەكتورى تيمۋر نۇركەشەۆ: «جىل سايىن سايىسقا 6 ادامنان قۇرالعان قازاقستان قۇراماسى قاتىسادى. بيىل ەل نامىسىن الماتى, نۇر-سۇلتان, قوستاناي, اتىراۋ جانە اقتاۋ قالالارىنىڭ وقۋشىلارى قورعادى. سايىستا بالالار ماتەماتيكادان وليمپيادا تاپسىرمالارىن وتە قىسقا مەرزىمدە شەشۋى كەرەك بولدى. بۇعان دەيىن بالالار جىلى اياسىندا دارىندى وقۋشىلاردى قولداۋ ماقساتىندا رەسپۋبليكا كولەمىندە ءتۇرلى دەڭگەيدەگى وليمپيادالاردى وتكىزگەن بولاتىنبىز. وليمپيادانى وتكىزۋ پروتسەسى اۆتوماتتاندىرىلدى. بۇل وليمپيادالاردى اۋداندىق دەڭگەيدەن رەسپۋبليكالىق دەڭگەيگە دەيىن بارىنشا اشىق جانە ترانسپارەنتتى وتكىزۋگە مۇمكىندىك بەردى. بالقان وليمپياداسى وقۋشىلارىمىزعا نەگىزگى حالىقارالىق ماتەماتيكالىق وليمپياداعا (IMO) دايىندالۋعا كومەكتەسەتىنىن اتاپ وتكىم كەلەدى», دەدى.
ايتا كەتەيىك, بىلتىر قازاقستاندىق وقۋشىلار 1 كۇمىس جانە 4 قولا مەدال جەڭىپ العان ەدى.