وتاندىق عالىمدار مۇعالىمدەرگە وقۋشىلاردىڭ عىلىمي جۇمىستارىن ءتيىمدى دايىنداۋ جولدارى جونىندە كەڭەس بەردى. سەمينارعا الماتى وبلىسىنىڭ قاراساي اۋدانىنداعى مەكتەپتەردىڭ 200-دەن اسا پەداگوگى قاتىستى.
ق.ساتباەۆ اتىنداعى قازاق ۇلتتىق تەحنيكالىق زەرتتەۋ ۋنيۆەرسيتەتىنىڭ ءبىر توپ عالىمى قاراساي اۋدانى ءبىلىم ءبولىمىنىڭ ءالجان بۇقاربايقىزى اتىنداعى قازاق ورتا مەكتەبىنىڭ باستاماسىمەن التىن اۋىل ورتا مەكتەبى بازاسىندا مۇعالىمدەرگە ءوز تاجىريبەسىن ءبولىستى. ق.ساتباەۆ اتىنداعى قازۇتزۋ پروفەسسورلىق-وقىتۋشىلىق قۇرامىنىڭ وكىلدەرى اۋدانداعى بارلىق ءبىلىم بەرۋ مەكەمەسىنەن كەلگەن قاتىسۋشىلارعا ينجەنەرلىك بەيىندى زەرتحانادا اتقارىلىپ جاتقان عىلىمي ىزدەنىستەر تۋرالى ايتا كەلىپ, ءوز جۇمىستارىنىڭ يەرارحياسى تۋرالى باياندادى.
اتالعان ۋنيۆەرسيتەتتىڭ پروفەسسورى, ينجەنەرلىك بەيىندى زەرتحانا جەتەكشىسى سەيتحان ازات ساباقتاستىقتىڭ ماڭىزىنا توقتالدى.
– وقۋشىلاردىڭ قالالىق جانە رەسپۋبليكالىق جوبالار كونكۋرسىندا قازى بولعان كەزىمدە كوپتەگەن پروبلەمانى بايقادىم. وقۋشىلار جوبا كونكۋرسىنا ءبىر اي نەمەسە ءبىر اپتا قالعاندا عانا دايىندالا باستايدى. كەيبىرى ءتىپتى دايىن ديسسەرتاتسيالىق, ديپلومدىق جۇمىس نەگىزىندە كونكۋرستارعا قاتىسادى. اۋىلدىق جەردەگى مەكتەپتەردىڭ ماتەريالدىق جاعدايى عىلىمي تاجىريبەلەر جاساۋعا مۇمكىندىك بەرمەيدى. كەز كەلگەن ۋنيۆەرسيتەت زەرتحانالارىمەن بىرلەسە جۇمىس اتقارۋ دا قولجەتىمدى ەمەس. سوندىقتان ۋنيۆەرسيتەت-مەكتەپ-ءوندىرىس ورتاسىندا ورتاق الاڭ جاساۋ ويىمىزدا بار. ءدال وسىنداي اۋقىمدى سەمينار رەسپۋبليكا كولەمىندە ءبىرىنشى رەت ءوتىپ جاتىر. باستى ماقسات – وقۋشىلاردىڭ ساپالى عىلىمي جوبالار جاساۋىنا دۇرىس باعدار بەرۋ جانە جاعداي جاساۋ. الداعى كۇندەرى ۋنيۆەرسيتەت پەن مەكتەپتەر اراسىندا مەموراندۋمعا قول جەتكىزىپ, ۋنيۆەرسيتەت جانىنان مەكتەپ وقۋشىلارىنا ارنالعان زەرتحانالار, ورتالىقتار اشىپ ساپالى كادرلار دايىنداۋدى قولعا الماقپىز, – دەيدى س.ازات.
ونىڭ ايتۋىنشا, قاراساي اۋدانى شامالعان اۋىلىنىڭ ءالجان بۇقارباي ۇلى اتىنداعى قازاق ورتا مەكتەبى ديرەكتورىنىڭ ورىنباسارلارى مەكتەپ وقۋشىلارىنىڭ عىلىمي جوبا دايىنداۋى, ونى راسىمدەۋى بارىسىنداعى كەدەرگىلەردى جويۋ جولدارى جايلى ق.ساتباەۆ اتىنداعى قازۇتزۋ ينجەنەرلىك بەيىندى زەرتحاناسىنان كومەك سۇراعان. العاشقى كەزدە ونلاين ۆەبينار وتكىزىپ, جوبا دايىنداۋعا قويىلاتىن تالاپتارمەن تانىستىرىپتى. ەندى سول جۇمىس ءوز جالعاسىن تاۋىپ, سەمينارعا ۇلاسىپ وتىر. الداعى جۇمىس مەكتەپ-ۋنيۆەرسيتەت-ءوندىرىس فورماتىندا ءوربۋى كەرەك.
ا.كەرىمبەكوۆ اتىنداعى ورتا مەكتەپتىڭ اعىلشىن ءتىلى ءپانى مۇعالىمى ەردەن ەرلان ۇلى:
– سەميناردان ەرەكشە سەزىممەن شىقتىم. بىرىنشىدەن, ق.ساتباەۆ اتىنداعى ۇلتتىق تەحنيكالىق زەرتتەۋ ۋنيۆەرسيتەتى ءتارىزدى ىرگەلى عىلىم ورداسى مەن قاراپايىم اۋىل مەكتەبى اراسىنداعى ىنتىماقتاستىق دەڭگەيى قۋانتتى. ەكىنشىدەن, سەمينار بارىسىندا ق.ساتباەۆ اتىنداعى قازۇتزۋ عالىمدارى عىلىمي-زەرتتەۋ جۇمىستارىنىڭ باعىتىن, تاقىرىبىن تاڭداۋدان باستاپ ولاردى ۇيىمداستىرىپ جۇرگىزۋ ءادىس-تاسىلدەرىنە توقتالىپ, ناتيجەگە قول جەتكىزۋ كەزەڭدەرىنە دەيىن تاپتىشتەپ ءتۇسىندىردى. عالىمدار ءوز جۇمىستارىمەن تانىستىرعاندا ولاردىڭ عىلىمي ەڭبەكتەرى اياسىندا مەكتەپ وقۋشىلارىنا قولجەتىمدى, زەرتتەۋگە تۇرارلىق تاقىرىپتار انىقتاپ الدىم, – دەيدى.