شىعىس قازاقستان وبلىسى التاي اۋدانىندا مەملەكەتارالىق ىزدەۋدە جۇرگەن ەكى ادام قولعا ءتۇستى, دەپ حابارلايدى Egemen.kz.
شقو پوليتسيا دەپارتامەنتىنىڭ ءباسپاسوز قىزمەتى تاراتقان اقپاراتقا قاراعاندا, اۋداندىق پب كريمينالدىق پوليتسيا بولىمشەسىنىڭ قىزمەتكەرلەرى مەملەكەتارالىق ىزدەۋدە جۇرگەن ەكى قىلمىسكەردى انىقتادى.
ولار 30 جاستاعى ايبەك ءتۇسىپحانوۆ پەن 29 جاستاعى ديليارا كاميتوۆا ەسىمدى وبلىس تۇرعىندارى ەكەنى جانە بۇعان دەيىن ءىستى بولعانى بەلگىلى بولدى.
«سوت ۇكىمى بويىنشا ەكەۋىنە باس بوستاندىعىنان شەكتەۋ جازاسى تاعايىندالعان. الايدا سوتتالعاندار پروباتسيا قىزمەتىنە مىندەتتى تىركەۋگە كەلمەگەن. ولاردىڭ قايدا ەكەنىن انىقتاۋ بويىنشا جۇرگىزىلگەن العاشقى ىزدەستىرۋ شارالارى ناتيجە بەرمەدى. سوندىقتان ولارعا مەملەكەتارالىق ىزدەۋ جاريالاۋ تۋرالى شەشىم قابىلدانعان», دەلىنگەن حابارلامادا.
كوپ ۇزاماي ىزدەستىرۋ جۇمىستارى وڭ ناتيجە بەردى. سوتتالعانداردىڭ ءبىرى شىعىس قازاقستان وبلىسى شەمونايحا اۋدانى ۆەرح-ۋبا اۋىلىندا ۇستالدى.
ساقشىلاردان جاسىرىنعان ەكىنشى ادام التاي قالاسىنان تابىلدى.
«پوليتسەيلەرگە ىزدەۋدە جۇرگەن ازامات تۋىسىنىڭ ۇيىندە جاسىرىنىپ جۇرگەنى تۋرالى جەدەل اقپارات كەلىپ تۇسكەن. ۇستالعان كەزدە ەر ادام اجەسىنىڭ شكافىندا جاسىرىنىپ وتىرعان. قازىرگى ۋاقىتتا ەكەۋى دە يزولياتورعا قاماۋعا الىندى», دەلىنگەن حابارلامادا.