قازاقستاندىق عالىمدار اعاشتارعا زيان كەلتىرەتىن قاۋىپتى باكتەريانى انىقتاۋدىڭ جاڭا جۇيەسىن ويلاپ تاپتى. بۇل – اعاشتاردىڭ دنق-سىندا Erwinia amylovora باكتەرياسىن جوعارى دالدىكپەن انىقتايتىن تەست-جۇيەلەر. وتاندىق جۇيە شەتەلدىك انالوگتەردەن بىرنەشە ەسە ارزان جانە ەلىمىزدەگى باعباندارعا قولجەتىمدى.
Erwinia amylovora – جەمىس اعاشتارىندا باكتەريالىق كۇيدىرگىنى تۋدىراتىن ەرەكشە قاۋىپتى قوزدىرعىش. باكتەريا اسىرەسە الما مەن المۇرت اعاشتارى ءۇشىن قاۋىپتى جانە بار بولعانى ەكى ماۋسىمنىڭ ىشىندە باقشانى جاپپاي ءبۇلدىرۋى مۇمكىن. بۇگىندە باكتەريالىق كۇيىكتىڭ تارالىپ كەتكەن تۇرلەرىنە ءتيىمدى ەم جوق, تەك ەرتە دياگنوستيكالاۋ ارقىلى عانا ونىڭ الدىن الۋعا بولادى. ال ەندى ازىرلەنگەن LAMP دياگنوستيكالىق جۇيەسى جەمىس اعاشتارىن ساقتاۋعا كومەكتەسەدى.
ءبىلىم جانە عىلىم مينيسترلىگىنە قاراستى م.ايتحوجين اتىنداعى مولەكۋلالىق بيولوگيا جانە بيوحيميا ينستيتۋتىنىڭ بيولوگى نۇربول عالياقپاروۆ: ء«بىز ازىرلەگەن LAMP نەگىزىندەگى باكتەريالاردى انىقتاۋدىڭ جاڭا جۇيەسى قازىرگى كەزدە قولدانىلاتىن كلاسسيكالىق پتر-مەن سالىستىرعاندا 100-1000 ەسە سەزىمتال. سەزىمتالدىقتان باسقا, پتر-دەن ايىرماشىلىعى – LAMP تەحنولوگياسى قولدانۋعا ىڭعايلى, دالا جاعدايلارىنا وڭاي بەيىمدەلەدى, سونىمەن قاتار قىمبات رەاگەنتتەر مەن جابدىقتاردى قاجەت ەتپەيدى. سالىستىرمالى تۇردە باكتەريالىق كۇيىكتى انىقتاۋعا ارنالعان ءبىزدىڭ تەست-جۇيەمىزدىڭ ءبىر سىناما قۇنى 6 مىڭ تەڭگە, اعىلشىن زەرتحاناسىندا 31 مىڭ تەڭگە, شۆەيتساريالىق زەرتحانادا 57 مىڭ تەڭگە تۇرادى. وسى ارزان تەست-جۇيەلەردىڭ كومەگىمەن ءار باعبان ەرتە دياگنوستيكاعا قول جەتكىزە الادى. ەگەر ءۇي باقشالارى وزدىگىنەن قالىپ قويسا, وندا ولار جابايى الما اعاشتارىنا جۇقتىرۋ قاۋپى بار. ال ەلىمىزدە جابايى الما اعاشتارىنىڭ ناتيجەسىندە دۇنيەجۇزىلىك مۇرا سانالاتىن سيۆەرس الما اعاشى وسەدى, ونى ساقتاۋ كەرەك», دەيدى.
قازىرگى ۋاقىتتا م.ايتحوجين مولەكۋلالىق بيولوگيا جانە بيوحيميا ينستيتۋتىنىڭ عالىمدارى جابايى الما اعاشتارىندا Erwinia amylovora باكتەرياسىن انىقتاۋ بويىنشا جۇمىس جۇرگىزىپ, باكتەريالىق كۇيىكتىڭ تارالۋىن بولدىرماۋ, ونىڭ ىشىندە جاڭا تەست-جۇيەلەردى پايدالانۋ ءۇشىن پراكتيكالىق ۇسىنىستار ازىرلەپ جاتىر.