بيىل «اۋليەاتا جاستارى» وڭىرلىك باعدارلاماسى اياسىندا ايماقتاعى جاستارعا جەڭىلدەتىلگەن باسپانا نەسيەسى بەرىلە باستايدى. الايدا ونىڭ وزىندىك تالاپتارى بولادى, دەپ حابارلايدى Egemen.kz.
جامبىل وبلىسى اكىمدىگىندە وتكەن كەڭەستە جاستار ساياساتى ماسەلەلەرى باسقارماسىنىڭ باسشىسى سەرىكبول بەرىكقوجا اتالعان وڭىرلىك باعدارلاماسىنىڭ ورىندالۋ بارىسى تۋرالى باياندادى.
باعدارلاما شەڭبەرىندە وبلىستا جاڭا باستاما رەتىندە جامبىل وبلىسىنىڭ جاستارىنا جەڭىلدىكپەن نەسيە بەرۋ جوباسى وسى جىلدىڭ شىلدە ايىندا ىسكە اسا باستايدى دەپ جوسپارلانۋدا. جوبا ءوڭىر جاستارىن قولجەتىمدى تۇرعىن ۇيمەن قامتاماسىز ەتۋگە جانە جاس وتباسىلارعا قولداۋ كورسەتۋ ماقساتىندا دايىندالعان.
«بۇعان دەيىن وبلىستا جاستار مەن جاس وتباسىلاردى تۇرعىن ۇيمەن قامتاماسىز ەتۋگە باعىتتالعان ارنايى باعدارلاما بولماعان», دەدى س. بەرىكقوجا.
جالپى وبلىستا تۇرعىن ءۇي الۋعا كەزەكتە - 7 140, جەر تەلىمىن الۋعا كەزەكتە تۇرعان 10 787 جاس بار.
اتالعان جوبا اياسىندا جاستارعا بەرىلەتىن قارىزدىڭ ەڭ جوعارى سوماسى – 13 ملن تەڭگەگە دەيىن. نەسيە بەرۋ ۋاقىتى - 19 جىل. پايىزدىق مولشەرلەمە - 5%, باستاپقى جارنا - 5%.
باعدارلاماعا 35 جاسقا دەيىنگى قر ازاماتى جانە نەگىزگى قاتىسۋشى رەتىندە تەك ەرلى-زايىپتىلاردىڭ بىرەۋى عانا قاتىسا الادى.
باسقارما باسشىسى جوباعا كەزەكتە تۇرعان مەملەكەتتىك, بيۋدجەتتىك قىزمەتكەرلەر قاتىسا المايتىنىن, نەگىزىنەن باسقا يپوتەكالىق باعدارلاماردا قامتىلعان ساناتتارعا جاتپايتىن, بىراق تولەم قابىلەتى بار جاستارعا باسىمدىق بەرىلىپ وتىرعانىن جەتكىزدى.
وبلىس اكىمى باعدارلامانىڭ كەي تەتىكتەرىن زاڭدىق تۇرعىدا قايتا قاراۋدىن ماڭىزدىلىعىن اتاپ ءوتتى.
«باعدارلامانىڭ ماقساتى جاقسى. بىزگە كەرەك جوبا. دەگەنمەن, ەرتەڭ جاستار نەمەسە قاتىسۋعا نيەتتىلەردىڭ اراسىندا تۇسىنىسپەستىك تۋىنداماس ءۇشىن, جان-جاقتى سارالاپ, شەشىم قابىلداۋعا ءتيىسپىز. ءتۇسىندىرۋ, اقپاراتتىق جۇمىستاردى بارىنشا جۇرگىزۋ ماڭىزدى», دەگەن وبلىس اكىمى نۇرجان نۇرجىگىتوۆ جاۋاپتىلارعا ناقتى تاپسىرمالار جۇكتەدى.