ءمينيستردىڭ ءبىرىنشى ورىنباسارى مارات قوجاەۆ باستاعان ىشكى ىستەر مينيسترلىگىنىڭ ءبىر توپ جەتەكشىلەرى شىمكەنتكە باردى, دەپ حابارلايدى Egemen.kz.
قالالىق پوليتسيانىڭ ءباسپاسوز قىزمەتىنىڭ مالىمەتىنشە, ءتارتىپ ساقشىلارىمەن كەزدەسكەن مارات قوجاەۆ پوليتسيانىڭ جۇمىس اتقارۋى مەن ءتارتىپ جاعدايىنا قاتىستى بىرقاتار ماسەلەنى سىنعا الدى. قالالىق پد باستىعى قايرات دالبەكوۆكە «دەر كەزىندە باقىلاۋعا الماعانى ءۇشىن» ىشكى ىستەر ءمينيسترىنىڭ بۇيرىعىمەن سوگىس جاريالاندى.
پد باسشىلىعىن تارتىپتىك جاۋاپكەرشىلىككە تارتۋعا پوليتسيا قىزمەتكەرلەرى جاساعان قىلمىستار مەن قۇقىق بۇزۋشىلىقتار سەبەپ بولدى. ولاردىڭ اراسىندا جەرگىلىكتى پوليتسيا قىزمەتىنىڭ ەكس-باستىعى, روتا كومانديرى جانە پاترۋلدىك پوليتسيا پولكىنىڭ ەكى قىزمەتكەرى جانە اباي اۋداندىق پوليتسيا باسقارماسىنىڭ قىزمەتكەرلەرى بار. جەكە قۇراممەن جۇمىس ىستەۋ مىندەتىنە كىرەتىن كادر اپپاراتىنا قاتىستى دا قاتاڭ شارالار قابىلداناتىن بولادى.
«پرەزيدەنتتىڭ جولداۋىن ىسكە اسىرۋ ماقساتىندا پوليتسيا قاتارىندا دورەكىلىككە, سىبايلاستىققا جانە تامىر-تانىستىققا ورىن جوق. قازىرگى تاڭدا ءبىز ىشكى ىستەر ورگاندارىنىڭ ادال, ءادىل, ەڭبەكقور جانە تازا قىزمەتكەرلەرىن قولدايمىز جانە ولاردىڭ جۇمىسىن ىلگەرىلەۋ ءۇشىن جاعداي جاسايمىز. ازاماتتاردىڭ كونستيتۋتسيالىق قۇقىقتارىن ساقتاۋ جانە زاڭ ۇستەمدىگىن ورناتۋ – ءبىزدىڭ باستى مىندەتىمىز», دەدى مينيستر ورىنباسارى.