بيىلعى 4 ايدا رەسپۋبليكالىق بيۋدجەتتەن 5,6 ترلن تەڭگە جۇمسالدى جانە 8 ملرد تەڭگە ۇنەمدەلدى. بۇل تۋرالى قر پرەمەر-ءمينيسترىنىڭ ورىنباسارى – قارجى ءمينيسترى ەرۇلان جاماۋباەۆ ۇكىمەت وتىرىسىندا ايتتى, دەپ حابارلايدى Egemen.kz.
«مەملەكەتتىك بيۋدجەتتىڭ شىعىستارى 98,8%-كە, رەسپۋبليكالىق بيۋدجەتتىڭ شىعىستارى – 99,4%-كە, جەرگىلىكتى بيۋدجەتتەردىڭ شىعىستارى 98,5%-كە اتقارىلدى. رەسپۋبليكالىق بيۋدجەت بويىنشا 5,6 ترلن تەڭگە جۇمسالدى», دەدى قارجى ءمينيسترى.
سونىمەن بىرگە, اتقارىلماي قالعان 31 ملرد تەڭگەنىڭ 8 ملرد تەڭگەسى ۇنەمدەلگەن, ال 23 ملرد تەڭگەسى يگەرىلمەي قالعان.
«اسىرەسە قارجى, مادەنيەت جانە سپورت, قورعانىس جانە ىشكى ىستەر مينيسترلىكتەرىندە يگەرىلمەۋ كوپ بايقالادى. ونىڭ نەگىزگى سەبەپتەرى: شارت جاساسۋ راسىمدەرىن ۇزاق جۇرگىزۋ, تولەمنىڭ نەگىزدىلىگىن راستايتىن قۇجاتتاردىڭ بولماۋى نەمەسە ۇسىنىلماۋى, قازىناشىلىق ورگاندارىنا تولەۋگە بەرىلەتىن شوتتاردى كەش ۇسىنۋ, ورىندالعان جۇمىستاردىڭ اكتىلەرى مەن شوت – فاكتۋرالاردىڭ ۋاقتىلى ۇسىنىلماۋى, مەملەكەتتىك ساتىپ الۋ كونكۋرستارىنىڭ وتكىزىلمەۋى», دەپ ءتۇسىندىردى مينيستر.
جەرگىلىكتى بيۋدجەت شىعىستارى 2,7 ترلن تەڭگەنى قۇراعان جانە 42 ملرد تەڭگە يگەرىلمەي قالعان.