اتىراۋ وبلىسىندا حابار-وشارسىز كەتكەن 11 ادام امان-ەسەن تابىلدى, دەپ حابارلايدى Egemen.kz.
وبلىستىق توتەنشە جاعدايلار دەپارتامەنتى قوعاممەن بايلانىس توبىنىڭ مالىمەتىنشە, يساتاي اۋدانىندا 11 ادام جوعالىپ كەتكەن.
ولار كەشە, 8 مامىردا اۋدان ورتالىعى – اققىستاۋ اۋىلىنان 160 شاقىرىم قاشىقتاعى «اقماڭداي» ۋچاسكەسىنە بارۋ ءۇشىن جولعا شىققان.
«كەشە, 8 مامىر كۇنى ساعات 14:00-دەن «ۋاز» ماركالى اۆتوكولىگىنىڭ جۇرگىزۋشىسى مەن 10 جولاۋشى يساتاي اۋدانىنىڭ ورتالىعى – اققىستاۋ اۋىلىنان 160 شاقىرىم قاشىقتا ورنالاسقان اتالعان ۋچاسكەگە جەتۋ ءۇشىن جولعا شىققان. الايدا, اۋا-رايىنىڭ قولايسىزدىعىنا بايلانىستى ماحامبەت اۋدانىنا بارۋدى كوزدەپ, جولدان اداسىپ كەتكەن. بۇگىن, 9 مامىردا ساعات 10:50-دە يساتاي اۋدانىندا ءبىر كۇن بۇرىن حابار-وشارسىز كەتكەن 11 ادامدى ىزدەستىرۋ ءىس-شاراسى جۇرگىزىلدى. جوعالعان ادامداردى ىزدەستىرۋ جۇمىستارىنا اتىراۋ وبلىستىق توتەنشە جاعدايلار دەپارتامەنتىنىڭ 4 قىزمەتكەرى مەن «ترەكول» تەحنيكاسى تارتىلدى. ىزدەستىرۋ ءىس-شاراسىنا يساتاي اۋداندىق پوليتسيا ءبولىمىنىڭ 1 قىزمەتكەرى قوسىلدى. ءبىر كۇن بۇرىن حابار-وشارسىز كەتكەن 11 ادام بۇگىن, 9 مامىردا جەرگىلىكتى ۋاقىتپەن ساعات 14:50-دە يساتاي اۋدانىنىڭ ورتالىعى – اققىستاۋ اۋىلىنان شامامەن 85 شاقىرىم قاشىقتىقتا ورنالاسقان جاسقايرات ەلدى مەكەنىنەن امان-ەسەن تابىلدى. تابىلعان ادامداردىڭ دەنساۋلىعىندا كىنارات جوق. ولار العاشقى مەديتسينالىق كومەككە جۇگىنۋدى قاجەپ دەپ تاپپادى», دەپ حابارلادى دەپارتامەنتتىڭ قوعاممەن بايلانىس توبى.
قازىر ءبىر جۇرگىزۋشى مەن 10 جولاۋشى جاسقايرات ەلدى مەكەنىنەن ح. ەرعاليەۆ اۋىلىنا امان-ەسەن جەتكىزىلىپ, اعايىن-تۋىستارىنا تابىستالدى.
ايانا توعانبەك