دەۆيس كۋبوگى: كىمدەرمەن وينايمىز؟

جوعارىدا اتالعان كوماندا­لاردىڭ بارلىعى دا ازۋلى. ماسەلەن, اقش دەۆيس كۋبوگىن 32 مارتە ولجالادى. بۇل – رەكوردتىق كورسەتكىش! تاعى ولار 28 رەت فينالدا ۇتىلدى. ءدال وسىنداي تابىسىمەن بىردە-ءبىر مەملەكەتتىڭ تەننيسشىلەرى ماقتانا المايدى. امەريكالىقتار سوڭعى رەت 2007 جىلى وسى تۋرنيردە توپ جاردى. قازىرگى كەزدە اقش-تىڭ ەڭ مىقتى تەننيسشىلەرى دەپ تەيلور فريتتس پەن رايلي وپەلكانى اتاۋعا بولادى. 24 جاستاعى فريتتس الەمدىك رەيتينگتە 13-ورىندى يەلەنۋدە. كەزىندە جاسوسپىرىمدەر اراسىندا الەمنىڭ ءبىرىنشى راكتەتكاسى اتانعان كاليفورنيا شتاتىنىڭ تۋماسى بيىل اۋستراليانىڭ اشىق بىرىنشىلىگىنىڭ ءتورتىنشى كەزەڭىنە جەتىپ, اتر تۋرنيرلەرىندە 13 مار­تە توپ جاردى. تەيلورمەن تۇي­دەي قۇرداس رايلي 2021 جىلى مەلبۋرندەگى دودانىڭ ءۇشىنشى اينالىمىندا ءسۇرىندى. اسا ءىرى حالىقارالىق جارىستاردا ءتورت رەت جەڭىمپاز اتانعان وپەلكا ۇزدىكتەر تىزىمىندە 17-ورىندى ەنشىلەۋدە.

37 جاستاعى دجون يزنەر جايىن­دا ۇزاق اڭگىمەلەۋگە بولادى. 15 جىلدان اسا كاسىپقويلار اراسىندا تابىستى ونەر كورسەتىپ جۇرگەن سولتۇستىك كارولينانىڭ ساڭلاعى كەزىندە ۋيمبلدوننىڭ جارتىلاي فينالىندا كۇش سىناسىپ, اقش-تىڭ اشىق بىرىنشىلىگىنىڭ شيرەك فينالىنا شىقتى. اتر دودالارىندا دجون 16 رەت تەڭدەسسىز دەپ تانىلدى. بۇل كۇندەرى يزنەر دۇنيەجۇزىلىك رەيتينگتە 25-ورىندى يەمدەنۋدە. سونداي-اق اقش-تىڭ مىنا وكىلدەرى «توپ-100» تەننيسشىنىڭ قاتارىندا: فرەنسيس تيافو – 29, توممي پول – 34, دجەنسون برۋكسبي – 43, ماككەنزي ماكدونالد – 51, ماركوس حيرون – 53, ماكسيم كرەسسي – 65, برەندون ناكاشيما – 76, دەنيس كۋدلا – 84 جانە ستيۆ دجونسون – 96.

اتالعان جارىستا 10 رەت دارا شىعىپ, سەگىز رەت فينالدا ونەر كورسەتكەن ۇلىبريتانيا تەننيس­شىلەرى قازىرگى كەزدە قارقىنىن ءبىراز باسەڭدەتىپ الدى. ولاي دەۋگە نەگىز, بۇل كۇندەرى تۇماندى البيون ەلىنىڭ ءۇش ورەنى عانا – «توپ-100» تەننيسشىنىڭ قاتارىندا. سولاردىڭ اراسىنان ەندي ماررەيدى بولە-جارا اتاپ وتۋگە بولادى. 34 جاستاعى گلازگونىڭ تۋماسى وسىدان التى جىل بۇرىن الەمنىڭ ءبىرىنشى راكەتكاسى اتاندى. ول ۋيمبلدوننىڭ ەكى دۇركىن جەڭىمپازى, اقش-تىڭ اشىق بىرىنشىلىگىندە ءبىر رەت باس جۇلدەنى ولجالادى. اۋستراليانىڭ اشىق بىرىنشىلىگىنىڭ فينالىنا بەس رەت شىقتى. رولان گارروستىڭ اقتىق سىنىندا وينادى. ەندي وليمپيا ويىندارىنىڭ جەكەلەگەن سايىسىندا ەكى رەت التىن الىپ, جۇپتىق باسەكەدە كۇمىسپەن كۇپتەلدى. اتر تۋرنيرلەرىندە 46 رەت قارسىلاس شىداتپادى. ايگىلى سپورتشى 2012 جىلى بريتانيا يمپەرياسىنىڭ وردەنىمەن ماراپاتتالدى. كەيىننەن اۋىر جاراقات الىپ, ءبىراز ۋاقىت ەمدەلدى. بۇگىنگى تاڭدا ماررەي الەمدىك رەيتينگتە 81-ورىندى قاناعات تۇتۋدا. بريتانيالىقتار سوڭعى رەت دەۆيس كۋبوگىن 2015 جىلى ولجالاسا, سول جەڭىمپاز كوماندانىڭ ساپىندا ءدال وسى سەر ەندي ماررەي دە ونەر كورسەتكەن ەدى.

ۇلىبريتانيا قۇراماسى ساپىن­داعى تاعى ەكى مىقتى ويىنشى جايىن­دا ايتار بولساق, ولار – كەمە­رون نورري مەن دەنيەل ەۆانس. 23 جاستاعى كەمەرون وار-دا تۋىپ-وسكەنىمەن, كەيىننەن لوندونعا قونىس اۋداردى. بۇگىنگى تاڭدا ول الەمنىڭ 11-راكەتكاسى اتانىپ وتىر. ال 31 جاستاعى دەنيەل ۇزدىكتەر تىزىمىندە 35-ساتىعا تۇراقتادى.

دەۆيس كۋبوگىندا نيدەرلاند قۇراماسى ءوزىنىڭ ەڭ زور تابىسىنا 2001 جىلى قول جەتكىزدى. سول كەزدە ولار جارتىلاي فينالعا دەيىن جەتكەن ەدى. قالعان تۋرنير­لەردە الا-قۇلا ونەر كورسەتتى. قازىرگى كەزدە اتالعان مەملەكەتتىڭ ەكى تەننيسشىسى عانا «توپ-100-ءدىڭ» قاتارىندا. ولار – بوتيك ۆان دە زاندشۋلپ (40-ورىن) پەن تاللون گريكسپۋر (56-ورىن). بىراق اسا ءىرى حالىقارالىق جارىستاردا قىزعالداقتار ەلىنىڭ ورەندەرى اۋىز تولتىرىپ ايتارلىقتاي ناتيجەگە جەتە العان جوق.

ەستەرىڭىزگە سالا كەتەيىك, 2019 جىلى دەۆيس كۋبوگىنىڭ توپتىق سايىسىندا قازاقستان قۇراماسى ۇلى­بريتانيا جانە نيدەرلاند تەننيس­شىلەرىمەن شەبەرلىك بايقاس­قان ەدى. سول جارىستا جەرلەستەرىمىز نيدەرلاندتىقتاردى 2:1 ەسەبىمەن ۇتسا, ءدال سونداي ەسەپپەن بريتا­نيا­لىقتارعا ەسە جىبەردى. ال امەري­كالىقتارمەن ءبىزدىڭ جولىمىز ءالى بىردە-ءبىر رەت قيىسقان جوق.

وزگە توپتاردا مىنا كوماندالار ءوزارا كۇش سىناسادى: ا توبى – حورۆاتيا, يتاليا, ارگەنتينا جانە شۆەتسيا. ۆ توبى – يسپانيا, كانادا, سەربيا جانە وڭتۇستىك كورەيا. س توبى – گەرمانيا, فرانتسيا, بەلگيا جانە اۋستراليا. بۇل باسەكەلەر بولونيا (يتاليا), گامبۋرگ (گەرمانيا) جانە ۆالەن­سيادا (يسپانيا) وتەدى. ءار توپتان ۇزدىك شىققان ەكى قۇراما 23-27 قاراشا كۇندەرى مالاگادا جالاۋى جەلبىرەيتىن پلەي-وفف سايىس­تارىندا باق سىنايدى.