قازاقستاندا 11 ميلليوننان استام ادام رەسپۋبليكالىق رەفەرەندۋمعا قاتىسا الادى. بۇل تۋرالى ورتالىق رەفەرەندۋم كوميسسياسى توراعاسىنىڭ ورىنباسارى كونستانتين پەتروۆ ايتتى, دەپ حابارلايدى Egemen.kz.
«1 ساۋىردەگى جاعداي بويىنشا سايلاۋشىلار تىزىمىنە 11 ملن 695 مىڭ 439 ازامات ەنگىزىلگەن. قازىردىڭ وزىندە رەسپۋبليكالىق رەفەرەندۋمعا قاتىسۋعا قۇقىعى بار ازاماتتاردىڭ ءتىزىمىن جاساۋعا نەگىز بار. وعان ازاماتتاردىڭ ءساۋىر-مامىر ايلارىنداعى كوشى-قون ديناميكاسىنا جانە ولاردىڭ بەرگەن وتىنىشتەرىن ەسكەرۋگە بايلانىستى ناقتى تۇزەتۋلەر ەنگىزۋ قاجەت», دەدى كونستانتين پەتروۆ ورتالىق سايلاۋ كوميسسياسىندا وتكەن وتىرىستا.
رەسپۋبليكالىق رەفەرەندۋمعا قاتىسۋ قۇقىعى بار ازاماتتاردىڭ ءتىزىمىن اكىمدىكتەر جاسايدى.
«رەفەرەندۋمنىڭ ءاربىر ۋچاسكەسى بويىنشا رەسپۋبليكالىق رەفەرەندۋمعا قاتىسۋ قۇقىعى بار ازاماتتاردىڭ ءتىزىمىن ءتيىستى اكىم داۋىس بەرۋ باستالاردان جيىرما كۇن بۇرىن, ياعني 15 مامىردا اكت بويىنشا رەفەرەندۋمنىڭ سايلاۋ كوميسسياسىنا ۇسىنادى. داۋىس بەرۋگە ون بەس كۇن قالعاندا, ياعني 20 مامىردان باستاپ ءتيىستى سايلاۋ كوميسسيالارى ءتىزىمدى سايلاۋشىلارعا ۇسىنادى», دەدى ك. پەتروۆ.