ەلىمىزدە جۇرگىزۋشى كۋالىگىن بەرۋ ءۇشىن كۋرسانتتاردى وقىتىپ, ۇيرەتەتىن اۆتومەكتەپتەردىڭ قىزمەتىنە جۇكتەلەتىن مىندەتتەر ارتا تۇسپەك. بۇل تۋرالى «ازاماتتارعا ارنالعان ۇكىمەت» مەملەكەتتىك كورپوراتسياسىنىڭ باسقارما توراعاسى سۇيەنىش ءابدىلدين ءمالىم ەتتى, دەپ حابارلايدى Egemen.kz.
«جۇرگىزۋشى كۋالىگىن بەرۋ پروتسەسىن قاتاڭداتۋ شاراسى مامانداندىرىلعان حقو-نىڭ جۇمىسىنا تىكەلەي اسەر ەتەدى. وعان دالەل - جۋىردا شىمكەنتتە بولعان وقيعا. ونىڭ ۆيدەوسى جەلىدە تارادى. قازىر ءبىرىنشى مارتە سىناقتان وتە الماعان كۋرسانتقا قايتا مۇمكىندىك بەرىلەدى. اراعا 7 كۇن سالىپ ەمتيحاندى قايتا تاپسىرا الادى. جۇرگىزۋشى كۋالىگىن الۋعا ۇمىتكەرلەر ورتا ەسەپپەن 3-5 رەت ەمتيحان تاپسىرىپ بارىپ, ءوتىپ جاتادى», دەدى سۇيەنىش ءابدىلدين ورتالىق كوممۋنيكاتسيالار قىزمەتى الاڭىندا وتكەن ءباسپاسوز ءماسليحاتىندا.
ونىڭ ايتۋىنشا, ەگەر كۋرسانت بىرنەشە سانات بويىنشا جۇرگىزۋشى كۋالىگىن العىسى كەلسە, وندا 7 كۇندى كۇتپەي, سىناقتى كۇن سايىن تاپسىرا الادى.
«وسى ورايدا مامانداندىرىلعان حالىققا قىزمەت كورسەتۋ ورتالىقتارىندا ۇزىنسونار كەزەك پايدا بولىپ جاتىر. ارينە, ءبىز حقو جۇمىسىن جەتىلدىرۋ جانە اۆتوماتتاندىرۋ بويىنشا شارا قابىلداپ جاتىرمىز. بىراق ول ازدىق ەتىپ وتىر. وسىعان وراي ءبىز ىشكى ىستەر مينيسترلىگىمەن بىرلەسىپ اۆتومەكتەپتەردىڭ جاۋاپكەرشىلىگىن قاتاڭداتۋ جاعىن قاراپ جاتىرمىز. ياعني, اۆتومەكتەپتەردە سىناق ەمتيحانىن ەنگىزبەكپىز. اتالعان شارا كۋرسانتتاردىڭ حقو-عا جەتكىلىكتى دايىندىقپەن كەلىپ, سىناقتان بىردەن سۇرىنبەي وتۋىنە سەپتىگىن تيگىزەدى. سونىمەن قاتار ورتالىقتارداعى كەزەك سانى ازايادى», دەيدى ول.
ايانا تواعانبەك