ءبىلىم جانە عىلىم ءمينيسترى اسحات ايماعامبەتوۆ الەۋمەتتىك جەلىدەگى پاراقشاسىنا قازاقستاندىق جاسوسپىرىمدەردىڭ ماماندىق تاڭداۋى تۋرالى ويىن جازدى, دەپ حابارلايدى Egemen.kz.
«بۇگىن ءبىلىم ساپاسى بويىنشا ەلدەردىڭ رەيتينگىسى رەتىندە ءجيى قابىلداناتىن زەرتتەۋ تۋرالى جازعىم كەلەدى. اڭگىمە PISA زەرتتەۋى تۋرالى بولىپ وتىر», دەگەن ۆەدومستۆو باسشىسى PISA-نىڭ كوپتەگەن رەيتينگتەن ايىرماشىلىعى - ۇپايلاردى عانا ەمەس, سونىمەن بىرگە كونتەكستىك فاكتورلاردى دا زەرتتەيتىنىن ايتادى.
«وسىنداي فاكتورلاردىڭ ءبىرى – 15 جاستاعى وقۋشىلاردىڭ مانساپتىق جوسپارلارى. وسى تۋرالى قىسقاشا تۇسىندىرە كەتەيىن.
1. قازاقستاندا جاسوسپىرىمدەردىڭ جارتىسىنان كوبى كەڭ تارالعان ماماندىقتاردى تاڭدايدى.
2. زەرتتەۋدىڭ بارلىق ءۇش تسيكلىندە مانساپتىق تاڭداۋدىڭ الدىڭعى قاتارىندا دارىگەر ماماندىعى تۇر. مىسالى, جالپى تاجىريبەلىك دارىگەر PISA-2022 (9%), PISA-2015 (10%) جانە PISA-2018 (5%) زەرتتەۋىندە ەڭ ءجيى تاڭدالعان.
3. جاسوسپىرىمدەردىڭ پەداگوگ ماماندىعىنا قىزىعۋشىلىقتارى ايتارلىقتاي ارتقانىن زەرتتەۋلەر دە كورسەتتى. مەنىڭ ويىمشا, بۇل - ءبىزدىڭ مۇعالىم مارتەبەسىن كوتەرۋگە باعىتتالعان جۇمىسىمىزدىڭ ناتيجەسى. زەرتتەۋدىڭ ءۇش تسيكلى ىشىندە وسى ماماندىققا قىزىعۋشىلىق تانىتقان وقۋشىلاردۆڭ ۇلەسى ەكى ەسەگە نەمەسە 5%-عا ءوستى. اتاپ ايتقاندا, وسى ماماندىقتى تاڭداۋ بويىنشا PISA 2015 زەرتتەۋىندە 7-ورىن بولسا, ال PISA-2022-دە 2-ورىنعا دەيىن كوتەرىلدى. 2022 جىلى وقۋشىلاردىڭ 9%-ى «جالپى ءبىلىم بەرەتىن مەكتەپتەگى مۇعالىم» ماماندىعىن بولاشاق ماماندىعى رەتىندە تاڭدادى.
4. PISA-2022 زەرتتەۋىنىڭ قورىتىندىسى بويىنشا تاڭداۋلى ماماندىقتاردىڭ العاشقى وندىعىنا اكت ماماندىقتارى كىرەدى دەپ كۇتىلىپ وتىر.
5. سونىمەن قاتار ءجيى تاڭدالاتىن ماماندىقتاردىڭ وندىعىنا جاڭا ماماندىقتار ەندى. بۇل - «ستوماتولوگتار» (4%), «تاۋارلار مەن كيىم ديزاينەرلەرى» (3%), «عيماراتتار مەن قۇرىلىستاردىڭ ساۋلەتشىلەرى» (3%), «سپورت جاتتىقتىرۋشىلارى, نۇسقاۋشىلارى جانە سپورت سالاسىنداعى ماماندار» (2%), «پسيحولوگتار» (2%), «كوسمەتولوگتار جانە ولارمەن بايلانىستى ماماندار» (1%), «جارناما جانە ماركەتينگ سالاسىنداعى ماماندار» (1%), «گرافيكالىق جانە مۋلتيمەديالىق ديزاينەرلەر» (1%). جاقىندا مەكتەپ تۇلەكتەرىنە جازعان حاتىمدا ايتقان بولاشاق ماماندىقتى تاڭداۋعا قاتىستى ۇسىنىستارىمدى تاعى دا ەسكە سالعىم كەلەدى», دەگەن اسحات قانات ۇلى.