بالالار جىلى اياسىندا اي سايىن ەلىمىزدەگى 100-گە جۋىق قازاقستاندىق بالا تەگىن ساۋىقتىرۋ كۋرسىنان وتەدى. ولار اتالعان ساۋىقتىرۋ كۋرسىن ءبىلىم جانە عىلىم مينيسترلىگىنە قاراستى «بوبەك» ورتالىعىندا الادى.
ءبىلىم جانە عىلىم مينيسترلىگىنىڭ حابارلاۋىنشا, ساۋىقتىرۋ كۋرسىنىڭ ۇزاقتىعى – 22 كۇن. ساۋىقتىرۋ كەشەنى ءبىر جىلدىڭ ىشىندە 12 اۋىسىم جاسايدى. 2022 جىلدىڭ باسىنان بەرى ساۋىقتىرۋ كەشەنىندە الماتى قالاسى, الماتى, جامبىل جانە تۇركىستان وبلىستارىنان 440 بالا ساناتوريالىق وڭالتۋ كۋرسىنان وتكەن. ولاردىڭ 63,9%-ىندا تىنىس الۋ ورگاندارىنىڭ اۋرۋلارى جانە ءالسىز يممۋنيتەت, 9%-ىندا انەميا بار, اقۋىز-ەنەرگەتيكالىق جەتىسپەۋشىلىك – 15,4%, ارتىق سالماق – 2,8%, لور مۇشەلەرىنىڭ اۋرۋلارى – 7,9% جانە باسقالارى – 0,9%.
«بوبەك» ۇلتتىق عىلىمي-پراكتيكالىق, ءبىلىم بەرۋ جانە ساۋىقتىرۋ ورتالىعىنىڭ باس ديرەكتورى بايان فايزۋللينا: «مەملەكەت باسشىسى بالالارعا ەرەكشە كوڭىل ءبولۋ كەرەگىن اتاپ ءوتىپ, 2022 جىلدى بالالار جىلى دەپ جاريالادى. وسى جىلدىڭ باسىنان بەرى ءبىلىم جانە عىلىم مينيسترلىگىنىڭ قولداۋىمەن «بوبەك» ورتالىعىندا جەتىم بالالار, ەكولوگيالىق قولايسىز ايماقتاردان شىققان, كوپبالالى جانە از قامتىلعان وتباسىلاردان شىققان 1 320 بالا وڭالتۋدان ءوتتى», دەدى.
ساۋىقتىرۋ كۋرسى 019 «بالالاردى ساۋىقتىرۋ, وڭالتۋ جانە ولاردىڭ دەمالىسىن ۇيىمداستىرۋ» مەملەكەتتىك بيۋدجەتتىك باعدارلاماسى شەڭبەرىندە جۇزەگە اسىرىلادى. بالالاردى جەرگىلىكتى جەرلەردەگى ءبىلىم بەرۋ ۇيىمدارى ىرىكتەيدى.
ساۋىقتىرۋ كەشەنىندە بالالار دەنساۋلىعىن جاقسارتىپ قانا قويماي, سونىمەن بىرگە مەكتەپ باعدارلاماسىنا سايكەس وقۋىن دا جالعاستىرادى. وقۋدان جانە ەمدەلۋدەن بوس ۋاقىتتا بالالار كورىكتى ورىندارعا, حايۋاناتتار باعىنا جانە ت.ب. جەرلەرگە بارادى.
«مەنىڭ ۇلىم 9 جاستا, ول انەميامەن اۋىرادى. ناۋرىز ايىنىڭ باسىندا بالام ساۋىقتىرۋ كۋرسىنان ءوتۋ ءۇشىن الماتىعا باردى. ۇلىم قۋانىپ, كوزى جانىپ ورالدى. ورتالىقتا بالالار ءۇشىن قانداي جاعداي جاسالعانىن, بالالار ول جاقتا وزدەرىن جاقسى سەزىنگەنىن ۇنەمى ايتىپ وتىردى. ورتالىقتا بالالار كۇنىنە 6 مەزگىل تاماقتانعان. ۆيتاميندەر كۋرسىن الىپ, تىستەرىن ەمدەپ, باسقا دا كوپتەگەن ەمدىك پروتسەدۋرانى قابىلدادى», دەدى ساۋىقتىرۋ كۋرسىن قابىلداعان بالانىڭ اتا-اناسى.