بۇگىن, 14 ءساۋىر كۇنى بولگاريانىڭ استاناسى سوفيا قالاسىندا بوكستان جىگىتتەر مەن قىزداردىڭ جاستار اراسىنداعى الەم چەمپيوناتى باستالدى. بۇل تۋرالى ۆكونتاكتە الەۋمەتتىك جەلىسىنە سىلتەمە جاساعان egemen.kz ءتىلشىسى حابارلادى.
چەمپيوناتقا الەمنىڭ 90 ەلىنەن 522 بوكسشى قاتىسقالى وتىر. ولاردىڭ اراسىندا قازاقستاننىڭ كومانداسى دا بار. مۇندا ءبىزدىڭ ەلىمىزدىڭ نامىسىن 10 جىگىت, 3 قىز قورعاماقشى. بۇل ەكى كوماندانىڭ دا سايىسقا تولىق قۇراممەن قاتىساتىنىن كورسەتەدى. بىرىنشىلىكتە سونداي-اق ازەربايجان, ۇلىبريتانيا, ۆەنگريا, بەلارۋس, قىرعىزستان, رەسەي, تۇركيا, ۋكراينا, اقش جانە وزبەكستان قۇرامالارى تولىق قۇرامدارىندا ونەر كورسەتەدى. ال قىزدار اراسىنداعى باسەكەدە بىردەن 20 ەلدىڭ كومانداسى بارلىق ءۇش سالماق بويىنشا ونەر كورسەتەدى. مۇنىڭ ءوزى دە رەكورد بولىپ تابىلادى. بۇعان وسى چەمپيوناتتىڭ ءبىر جاعى ليتسەنزيالىق بولعالى تۇرعانى دا وڭ اسەر ەتكەن سياقتى. ول بيىلعى جىلعى تامىز ايىندا قىتايدىڭ نانكين قالاسىندا وتەتىن ەكىنشى جاستار وليمپيالىق ويىندارىنا جولداما دا الىپ بەرەدى.
وتكەن جىلعى جاستار چەمپيوناتىندا قازاقستان قۇراماسى جالعىز قولا مەدالدى قاناعات تۇتۋعا ءماجبۇر بولىپ ەدى. ونى 75 كيلوعا دەيىنگى سالماقتاعى داۋلەت بايعاباتوۆ جەڭىپ الدى. ال بيىلعى جىلى عالىمبەك كەنجەباەۆ جەتەكشىلىك ەتەتىن جاستار قۇراماسى كورسەتكىشتى جاقسارتۋدى جوسپارلاپ وتىر. كوماندا قۇرامىندا ازيانىڭ جاسوسپىرىمدەر اراسىنداعى ەكى, جاستار اراسىنداعى قازىرگى بەس چەمپيونى بار.
چەمپيونات قازىر باستالىپ تا كەتتى. ونىڭ كۇندزگى سەسسياسى استانا ۋاقىتىمەن 18:00-دە, كەشكى سەسسياسى 22:30-دا جۇرەدى.
وسى كەزگە دەيىن قازاقستاندىقتار ساپىنان 52 كيلوعا دەيىنگى ورازحان ەرگەش شىعىپ, يتاليان ۆينچەنتسو كولەللانى 3:0 ەتىپ ۇتتى. بۇگىن بىزدەن شارشى الاڭعا ەشكىم شىقپايدى. ال ەرتەڭ 56 كيلوداعى سۇلتان زاۋىربەك بۋتاندىق تشەرينگ سامدرۋپپەن, 60 كيلوداعى ابىلايحان ءجۇسىپوۆ اقش وكىلى وچواس يسيدرومەن قولعاپ تۇيىستىرەدى.
دامير قوجامقۇل.
دەرەككوز: egemen.kz.
فوتو: egemen.kz.