ماڭعىستاۋ وبلىسىنىڭ ورتالىعى – اقتاۋ قالاسىندا سالىق دەپارتامەنتىنىڭ قىزمەتكەرى 4 ملن. تەڭگە پارا الىپ جاتقان جەرىندە قولعا ءتۇستى. بۇل تۋرالى lada.kz حابارلادى.
«اقتاۋ قالاسىندا سالىق دەپارتامەنتىنىڭ قىزمەتكەرى 4 ملن. تەڭگە پارامەن ۇستالدى», - دەلىنگەن ەكونوميكالىق قىلمىسقا جانە سىبايلاس جەمقورلىققا قارسى كۇرەس دەپارتامەنتى (قارجى پوليتسياسى) ءباسپاسوز قىزمەتىنىڭ حابارلاماسىندا.
ماڭعىستاۋ وبلىستىق سالىق دەپارتامەنتى سالىق ءاۋديتى باسقارماسىنىڭ باستىعى بيىلعى جىلعى 28 ناۋرىزدا ۇستالعان. وعان پارا الدى دەگەن كۇدىك كەلتىرىلىپ وتىر. سالىق دەپارتامەنتىنىڭ قىزمەتكەرى اقشانى الىپ جاتقان كەزدە قولعا تۇسكەن. ونىڭ كولىگىنەن ارنايى تاڭبا سالىنعان 4 ملن. تەڭگە الىنعان.
قارجى پوليتسياسىنىڭ مالىمەتى بويىنشا, سالىق دەپارتامەنىنىڭ قىزمەتكەرى جەرگىلىكتى بيزنەسمەننىڭ كومپانياسىنا جۇرگىزىلەتىن تەكسەرۋ جۇمىستارىنىڭ قورىتىندىسىن وڭ باعامەن اياقتاۋ ءۇشىن ودان وسىنشا كولەمدە اقشا تالاپ ەتكەن.
ۇستالعان قىزمەتكەرگە قارسى قىلمىستىق ءىس قوزعالدى. وعان ەندى 12 جىل تۇرمەدە وتىرۋ جازاسى قاۋپى ءتونىپ تۇر.
قۇرىش نۇرىمبەت.
دەرەككوز: lada.kz.
فوتو: lada.kz.