بۇگىن, 14 ءساۋىر كۇنى مەملەكەت باسشىسى نۇرسۇلتان نازارباەۆ ەلىمىزگە رەسمي ساپارمەن كەلگەن باحرەين كورولى حاماد بەن يسا ءال-حاليفامەن كەزدەستى. بۇل تۋرالى اقوردا سايتى حابارلادى.
«شاعىن قۇرامداعى كەزدەسۋ بارىسىندا ساۋدا-ەكونوميكا, قارجى-ينۆەستيتسيا, كولىك-كوممۋنيكاتسيا جانە اۋىل شارۋاشىلىعى سالالارىنداعى ەكى جاقتى ىنتىماقتاستىقتى جانداندىرۋ ماسەلەلەرى تالقىلاندى. كەزدەسۋ كەزەندى مەملەكەت باسشىلارى ەكى ەلدىڭ ءارتۇرلى وڭىرلىك جانە حالىقارالىق ۇيىمدار اياسىنداعى ءوزارا ءىس-قيمىلىنا كوڭىل ءبولىپ, حالىقارالىق كۇن ءتارتىبىنىڭ وزەكتى ماسەلەلەرى جونىندە دە پىكىر الماستى», - دەلىنگەن حابارلامادا.
قازاقستان پرەزيدەنتى باحرەين كورولىنىڭ العاشقى رەسمي ساپارى ەكىجاقتى قارىم-قاتىناستاردى نىعايتۋعا ءوز ۇلەسىن قوساتىنىنا سەنىم ءبىلدىردى.
– مەن 1997 جىلى باحرەينگە ساپارىم بارىسىندا ءسىزدىڭ اكەڭىز يسا يبن سالمان ءال-حاليفامەن جەمىستى كەلىسسوزدەر وتكىزدىم. ءسىزدىڭ وڭىردە دە, ءبىزدىڭ وڭىردە دە ءتۇرلى وزگەرىستەر بولىپ جاتىر. ساۋدا-ەكونوميكالىق ىنتىماقتاستىقتىڭ ماڭىزدى ماسەلەلەرىن تالقىلاۋ جانە بىرلەسكەن بيزنەس-فورۋم وتكىزۋ ءبىزدىڭ قارىم-قاتىناستارىمىزعا وڭ اسەر ەتەتىنىنە سەنىمدىمىن, – دەدى نۇرسۇلتان نازارباەۆ.
ءسوز كەزەگىندە حاماد بەن يسا ءال-حاليفا قازاقستاننىڭ باحرەينمەن جانە جالپى پارسى تۇبەگى وڭىرىمەن ىنتىماقتاستىعى ارتىپ كەلە جاتقانىن ايتا كەلىپ, ەلىمىزگە كەلۋگە جاسالعان شاقىرتۋعا جانە كورسەتىلگەن قوناقجايلىققا ريزاشىلىعىن ءبىلدىردى.
كەڭەيتىلگەن قۇرامداعى كەزدەسۋدە نۇرسۇلتان نازارباەۆ ەكى ەلدىڭ اراسىنداعى قاتىناستاردى جاڭا دەڭگەيگە شىعارۋ ءۇشىن تاراپتاردىڭ كۇش-جىگەر جۇمىلدىراتىنىن اتاپ ءوتتى.
– سىزبەن بىرگە استاناعا كەلگەن ۇلكەن دەلەگاتسيا ءبىزدىڭ ەلمەن ىنتىماقتاستىقتىڭ بولاشاعىنا سەنىمدىلىكتى كورسەتەدى. قازاقستان باحرەين كورولدىگىن پارسى تۇبەگى ەلدەرىنىڭ ىشىندەگى ماڭىزدى ارىپتەستەرىنىڭ ءبىرى سانايدى. ءبىز ەكونوميكالىق الەۋەتىمىزدى جۇزەگە اسىرۋ ءۇشىن بار كۇش-جىگەرىمىزدى جۇمسايتىنىمىزعا سەنىمدىمىن. ءبىزدىڭ ەلدەرىمىزگە ورتاق نارسەلەر كوپ. ەكى ەلدىڭ دە تاۋەلسىزدىك كۇنى 16 جەلتوقسان ەكەنى اتاپ وتەرلىك, – دەدى قازاقستان پرەزيدەنتى.
مەملەكەت باسشىسى باحرەيننىڭ تاريحي تۇرعىدان قىسقا مەرزىمنىڭ ىشىندە يندۋستريالىق دامىعان جەتەكشى ەلدىڭ بىرىنە اينالعاندىعىنا نازار اۋداردى.
– بۇل جەتىستىك ءسىزدىڭ حالىق الدىنداعى زور جەكە ەڭبەگىڭىز بولىپ تابىلادى. كورولدىك مۇسىلمان الەمىندەگى ءىرى قارجى جانە يسلامدىق بانكينگ ورتالىعىنا اينالدى. قازاقستان دا تاۋەلسىزدىكتىڭ بارلىق كەزەڭىندە جوعارى قارقىنمەن دامىپ كەلەدى. مىسالى, 1992 جىلى ەلدىڭ ىشكى جالپى ءونىمى نەبارى 2,5 ملرد. دوللار بولسا, 2013 جىلى بۇل كورسەتكىش 220 ميللياردقا دەيىن جەتتى. ءبىز ەلىمىزدىڭ 2050 جىلعا دەيىنگى دامۋ ستراتەگياسىن قابىلدادىق جانە يندۋستريالىق-يننوۆاتسيالىق دامۋ باعدارلاماسىن ىسكە اسىرۋدامىز, – دەدى نۇرسۇلتان نازارباەۆ.
سونىمەن بىرگە قازاقستان پرەزيدەنتى ەكىجاقتى ساۋدانىڭ كورسەتكىشى ونشا جوعارعى ەمەستىگىنە نازار اۋدارا كەلىپ, حاماد بەن يسا ءال-حاليفانىڭ ساپارى ىنتىماقتاستىقتى ودان ءارى دامىتۋعا ايتارلىقتاي ىقپال ەتۋى تيىستىگىن اتاپ ءوتتى.
ءوز كەزەگىندە باحرەين كورولى وسى ساپارى ەكىجاقتى قارىم-قاتىناستاردى نىعايتۋدا ماڭىزدى قادامعا اينالاتىنىنا سەنىمىن ءبىلدىردى.
– ءبىز قازاقستانمەن تىعىز ىنتىماقتاستىققا مۇددەلىمىز. قارىم-قاتىناستارىمىزدى دامىتۋ – ءبىز ءۇشىن ورتاق مىندەت. ءبىز ديپلوماتيا, ازىق-ت ۇلىك قاۋىپسىزدىگى, اۋىل شارۋاشىلىعى, قارجى, ينۆەستيتسيا جانە ءبىلىم بەرۋ سالالارىندا قول قويىلعان ءوزارا تۇسىنىستىك تۋرالى مەموراندۋمدارعا قاناعاتتانۋشىلىق بىلدىرەمىز, – دەدى حاماد بەن يسا ءال-حاليفا.
ساكەن مايلىباي.
دەرەككوز: اقوردا سايتى.