سوڭعى جىلدارى مەملەكەتتىك قولداۋ ارقىلى تىڭعا تۇرەن سالىپ, تاۋەكەل ەتۋدىڭ ناتيجەسىندە تابىسقا قول جەتكىزىپ وتىرعانداردىڭ سانى ءبىرشاما كوبەيە تۇسكەن. ەل ىشىندەگى وسى ءبىر يگىلىكتى شارۋا تالپىنعان جاننىڭ الەۋمەتتىك-تۇرمىستىق جاعدايىن جاقسارتۋعا ىقپال ەتىپ كەلەدى.
اۋداندا سوڭعى ءتورت جىل كولەمىندە «بيزنەس باستاۋ» جوباسى اياسىندا 324 ادام ارنايى وقۋدان وتكەن. بۇل بۇرىن بەيمالىم بولىپ كەلگەن, سىناعى اۋىر, سىرى مول بيزنەس الەمىنىڭ قىر-سىرىن مەيلىنشە مەڭگەرتۋگە سەپتىگىن تيگىزگەن شارا ەدى. جۇمىس ىستەيمىن دەپ تالپىنعان جانعا كاسىپتىڭ از ەمەس ەكەنى بەلگىلى. اسىرەسە تابيعاتى تامىلجىعان ساندىقتاۋ اۋدانىندا اۋىل شارۋاشىلىعى, تۋريزم سالاسىندا مۇمكىندىك از ەمەس. اقتىلى مال باعىپ, اقىق ءدان تەربەتۋگە ابدەن بولادى. حالىققا قىزمەت كورسەتۋ سالاسىندا دا سۇرانىس جەتىپ ارتىلادى. تەك قانا ادال ەڭبەگىممەن ىرىزدىعىمدى مولايتامىن دەگەن ىنتا بولسا جەتكىلىكتى. وسى ورايدا مەملەكەت تاراپىنان زور كومەك كورسەتىلىپ وتىرعانىن ايتا كەتۋدىڭ ارتىقتىعى بولماس.
ارنايى كۋرستان ءوتىپ, بيزنەس الەمىنە قاجەتتى بىلىممەن قارۋلانعان 115 ادام جەڭىلدەتىلگەن نەسيە الىپ, ءوز كاسىبىن دوڭگەلەتىپ وتىر. ويعا العان شارۋالارى وڭىنان وڭعارىلسا از دۇنيە ەمەس. ءىسىن جاڭا باستاعان كاسىپكەرلەرگە 400 ملن تەڭگە كولەمىندە قاراجات بەرىلگەن. انشەيىندە ءىس باستاۋعا العاشقى قارجىمىز جوق دەپ داعدارىپ وتىرعاندار ءۇشىن ايتا قالارلىقتاي كومەك ەمەس پە؟ قامقورلىقپەن قاناتتانعان جاننىڭ ءبىرى – اۋدان تۇرعىنى گاۋحار تىلەۋباەۆا. الدىمەن اۋدان ورتالىعىنا نەنىڭ قاجەت ەكەنىن ساراپتاعان. ءوزىنىڭ ويىنشا, ءوتىمدىسى – ازىق-ت ۇلىك.
– كيىم-كەشەكتىڭ, وزگە دە بۇيىمنىڭ جىلدام وتە قويماۋى مۇمكىن, – دەيدى كاسىپكەر, – ال ازىق-ت ۇلىك كۇندەلىكتى تۇتىنىلادى. جوبانى دايىنداعان كەزدە جاڭىلىسپاعان ەكەنمىن. العاشقى بەتتە جۇمىسىمدى جولعا قويۋعا سەپتىگىن تيگىزىپ وتىر. بىلتىر 6 پايىز وسىممەن 3 ملن تەڭگە جەڭىلدەتىلگەن نەسيە الدىق. الداعى ۋاقىتتا دۇكەندە ساتىلاتىن ازىق-ت ۇلىكتىڭ ءتۇرىن تۇتىنۋشىلاردىڭ سۇرانىسىنا قاراي كوبەيتە ءتۇسۋدى كوزدەپ وتىرمىز.
وسىنداي مەملەكەتتىك باعدارلامالار تالابى بار جاننىڭ تابىسىن ەسەلەپ, ءوز كاسىبىن دوڭگەلەتۋگە مۇمكىندىك بەرسە, ەكىنشى جاعىنان ەل ىشىندەگى جۇمىسسىزدىقتىڭ ازايۋىنا سەپتىگىن تيگىزبەك. اۋداندا مەملەكەتتىك باعدارلامالاردىڭ ناتيجەسىندە جۇمىسسىزدار سانى جىلدان-جىلعا قىسقارىپ كەلەدى. جۇمىسىن جاڭا باستاعانىمەن, ءىسى العا باسقان كاسىپكەرلەردىڭ تالپىنىسىن كورىپ, وزگەلەردىڭ دە ۇمتىلاتىندارى انىق.
– بىلتىر 615 ادام جۇمىسقا ورنالاستى, – دەيدى اۋداندىق جۇمىسپەن قامتۋ ورتالىعىنىڭ قىزمەتكەرى الماس بالتاشەۆ, – ورتالىققا كومەك سۇراپ كەلگەن ادامداردىڭ بارلىعىن جۇمىسپەن قامتىپ وتىرمىز. جىل باسىنان بەرى ءوتىنىش بەرىپ جاتقاندار دا جەتەرلىك. ەڭ باستىسى, جەرگىلىكتى جەردە ادامداردىڭ جۇمىس ىستەيمىن دەگەن ىنتاسى بار. ىنتا بولسا, الىنبايتىن قامال جوق.
اۋدان بويىنشا سوڭعى ءتورت جىل ىشىندە 183 كاسىپكەر مەملەكەتتىك گرانتقا يە بولدى. ولارعا 80 ملن تەڭگە كولەمىندە قاراجات بولىنگەن. الداعى ۋاقىتتا دا ىلكىمدى ىسكە ۇيىتقى بولاتىن شارۋا جالعاسا بەرمەك.