مەيىرمانوۆتار وتباسىنا مەيىرىمىڭدى توك!

قالا قازاعى ءبىر عاسىر بويى جىرلاپ كەلە جاتقان ءبىر جىر بولسا, ول – باسپانا جىرى. باسپانانىڭ جوقتىعى, اسىرەسە, بالا-شاعانىڭ كوبەيگەن كەزىندە قاتتى بىلىنەدى. پاتەرگە المايدى, السا دا «شۋلاعان بالا-شاعاڭ تىنىشتىق بەرمەيتىنى ءوز الدىنا, قابىرعانى, ەدەندى ءبۇلدىردى» دەپ الەك سالادى. تۇرمىستىڭ جۇقالىعى مەن پانا بولار وتاۋدىڭ جوقتىعىن باقبەرگەن مەيىرمانوۆتىڭ وتباسى دا بالا-شاعاسى كوبەيگەن سوڭ شىنداپ ءتۇسىندى, الەۋمەتتىك جوقشىلىقتىڭ سالدارى نەگە سوقتىراتىنىن كوزىمەن كوردى. مەكتەپتە وقيتىن نۇرداۋلەت پەن نۇرسۇلتاننىڭ, ودان ەكى جاسقا ەندى اياق باسقان ءاليانىڭ سوڭىن الا ءماريا, عاليا, داريا ەسىمدى ۇشەم­دەردىڭ تۋىلۋى ءبىر جاعىنان وتىز­دىڭ جۋان ورتاسىنداعى اكەنى قۋانت­قا­نىمەن, ەكىنشى جاعىنان بويىن «اپىر-اي, ەندى قايتتىم» دەيتىن ۇرەي بيلەدى. بۇل وتباسى التى بالا – اللانىڭ سىيى دەپ جۇرگەندە, بيىل تاعى ءبىر پەرزەنت دۇنيەگە كەلدى. ءسانيا! راس, باقبەرگەننىڭ وتباسىندا ۇشەمدەر دۇنيەگە كەلگەندە باق-تىڭ نازارى اۋىپ, بۇل وتباسى تۋرالى تەلەديداردان دا كورسەتىپ, سايتتار دا جازىپ جاتتى. ونداعى نەگىزگى ماقسات – ۇشەم تۋىلعان وتباسىنىڭ الەۋمەتتىك جاعدايىن ءتيىستى مەكەمەلەرگە جەتكىزۋ, قالتاسى قالىڭ ازاماتتارعا قۇلاققاعىس جاساۋ ەدى. مۇنى ەستىگەن ەلورداداعى قازاق مەملەكەتتىك زاڭ ۋنيۆەرسيتەتىنىڭ باسشىلىعى بىلتىر باقبەرگەن مەيىرمانوۆتى ىزدەپ تاۋىپ, ۋنيۆەرسيتەتتىڭ جاتاقحاناسىندا ەكى اي پانالاتقان بولسا, ودان كەيىن استانانىڭ ىرگەسىندەگى قوسشى ەلدى مەكەنىنە قارايتىن «لەسنايا پوليانا» الابىنان ءۇش بولمەلى پاتەردى جالداۋىنا كومەكتەسكەن. «ءبىزدىڭ «لەسنايا پوليانادا» تۇرىپ جاتقانىمىزعا التى اي بولدى. پاتەراقىنى دا, كوممۋنالدىق قىز­مەتتى دە قازاق مەملەكەتتىك زاڭ ۋني­ۆەرسيتەتىنىڭ باسشىلىعى تولەپ وتىر. كيىمدەرىمىزدى دە وسى كىسىلەر اپەرۋدە. بالالارعا تولەنەتىن جاردەماقى ارقىلى تاماعىمىزدى اجىراتامىز. مەن تالعات نارىكباەۆ باستاعان بۇل كىسىلەرگە العىس ايتامىن. ەشقانداي تۋىسىم دا, تانىسىم دا ەمەس, وزدەرى مەنى ىزدەپ تاۋىپ كومەكتەستى. ونىڭ الدىندا ءبىزدىڭ جاعدايىمىز وتە تومەن ەدى. مۇمكىن الەۋمەتتىك احۋالىمىز ءسال دۇرىستاۋ بولعاندا, بالالارىمنىڭ ءبىرى اۋرۋ بوپ تۋىلماس پا ەدى؟», دەيدى باقبەرگەن. كەزىندە قۇرىلىس سالاسىندا دا, كۇزەتشىلىكتە دە جۇمىس ىستەپ, وتباسىن اسىراپ جۇرگەن جىگىت قازىر ەكىگە كەلمەي جاتىپ ەكى رەت وتا جاساتقان اۋرۋ بالاسىنىڭ جاعدايى­نا بايلانىستى ۇيىندە وتىر. سەبەبى تۇسىنىكتى دە... باقبەرگەن ءاربىر وبلىستاردا, قالالاردا ومىرگە كەپ جاتقان ۇشەمدەرگە ءتۇرلى جولدارمەن ءۇي بەرىلەتىنىن, وزدەرىنە دە سونداي مۇمكىندىك جاسالسا دەيتىن نيەتى بار ەكەنىن ايتادى. ارينە, «باسقا ۇشەمدەرگە بەرىلەدى, نەگە ءبىز ەسكەرىلمەيمىز», دەيتىن سالىستىرمالى پىكىر عوي. ايتپەسە, «ۇشەم تۋىلعان وتباسىعا ءسوزسىز پاتەر بەرىلۋى كەرەك» دەيتىن نە زاڭ, نە قاۋلى جوق ەكەنى بەلگىلى. بۇل جەردە اڭگىمە تەك ادامداردىڭ مەيىرىمى, شىن مانىندە جانى اشۋى تۋرالى عانا. جانى اشىعان قازمزۋ باسشىلىعى ازىرگە قاناتىنىڭ استىنا الىپ وتىر. بىراق, مەيىرمانوۆتار جەتى بالامەن جالدامالى پاتەردە قاشانعا دەيىن جاۋدىرەپ وتىرماق؟ استانا قالالىق تۇرعىن ءۇي باسقارماسىنداعى كەزەگى دە ازىرگە جىلدام جىلجيتىن ءتۇرى جوق. №10563-ءشى كەزەكتىڭ قاي جىلى كەلەتىنىن دە ءدال بولجاۋ قيىن. سول ءۇشىن ءالى دە بولسا مەيىرمانوۆتار وتباسىنا مەيىرىمىن توگەتىن, باسى ءبۇتىن پاتەرلى بولۋىنا جاردەمدەسەتىن اتىمتاي جومارتتاردى ىزدەيمىز. ەل ىشىندە «وڭ قولىڭنىڭ بەرگەنىن سول قولىڭ كورمەسىن» دەيتىن يماندى ءارى جومارت ازاماتتاردىڭ بار ەكەنىنە سەنگىمىز كەلەدى. ايگۇل سەيىلوۆا, «ەگەمەن قازاقستان».