تۇركىستان وبلىسى, ماقتاارال اۋدانىنىڭ ۆولەيبولىن بەرىسى قازاقستانعا, ارىسى كۇللى تمد ەلدەرىنە تانىتقان باپكەر ورىنباسار مەرقۇل ۇلى 70-تەن اسقان شاعىندا دۇنيەدەن ءوتتى. ماقتاارالدىقتار باپكەر تالاي جىل تەر توگىپ, جۇزدەگەن شاكىرت تاربيەلەپ شىعارعان سپورت مەكتەبىنىڭ قابىرعاسىنا ەسكەرتكىش تاقتا ورناتتى, دەپ حابارلايدى Egemen.kz.
اۋدان اكىمى باقىت اسانوۆ, وبلىستىق دەنەشىنىقتىرۋ جانە سپورت باسقارماسىنىڭ وكىلى ايتجان بەرداشەۆ, سپورت ارداگەرى قالجان مىرزاقۇلوۆ, مارقۇمنىڭ وتباسى, جورا-جولداستارى, شاكىرەتتەرى جانە جاس سپورتشىلار قاتىسقان جيىندا ورىنباسار مەرقۇل ۇلىنىڭ ءومىر جولى, ۆولەيبولداعى جەتىستىكتەرى, ءوڭىر سپورتىنىڭ دامۋىنا سىڭىرگەن ەڭبەگى جونىندە ماعلۇمات بەرىلدى. جاس سپورتشىلارعا سپورتتىق كەرەك-جاراقتار تاراتىلدى. كوپشىلىك بىلىكتى باپكەر, قر ەڭبەك سىڭىرگەن جاتتىقتىرۋشىسى, ماقتاارال اۋدانىنىڭ قۇرمەتتى ازاماتى ورىنباسار مەرقۇل ۇلىنىڭ ەسىمىن ءوزى ۇزاق جىل جۇمىس ىستەپ, تالاي ساڭلاقتى تاربيەلەگەن سپورت مەكتەبىنە بەرۋدى ۇسىندى.
ەسكە سالا كەتەيىك, ورىنباسار مەرقۇل ۇلى اۋدان ۆولەيبولىن تىنىمسىز ەڭبەگىنىڭ ارقاسىندا جاڭا بەلەسكە شىعاردى. ونىڭ جەتەلەۋىمەن اۋداننان قازاق ەلىن تامساندىرعان تالاي تالانتتى ۆولەيبولشى قىزدار شىقتى. ۇزدىك ويىنشىلارى ۇلتتىق قۇراما كومانداسىنىڭ ساپىندا حالىقارالىق ءدۇبىرلى دودالاردا قازاقستاننىڭ نامىسىن قورعاپ, جاسىنداي جارقىلدادى. باپكەردىڭ ەڭبەگى جوعارى باعالانىپ, ماقتاارال اۋدانىنىڭ قۇرمەتتى ازاماتى, قر ەڭبەك سىڭىرگەن جاتتىقتىرۋشىسى اتانعان.