بۇل تۋرالى ەلوردادا «حالىقتىڭ تابىسىن ارتتىرۋدىڭ 2025 جىلعا دەيىنگى باعدارلاماسى» كەشەندى جوسپارىنا ارنالعان جيىندا پرەمەر-ءمينيستردىڭ ورىنباسارى ەرالى توعجانوۆ ايتتى, دەپ حابارلايدى Egemen.kz.
جوبالاردى جۇزەگە اسىرۋ بارىسىن كۆازيمەملەكەتتىك سەكتورداعى ءىرى كومپانيالاردىڭ باسشىلارى ەلگە ءتۇسىندىرۋى كەرەك.
«حالىقتىڭ تابىسىن ارتتىرۋ باعدارلاماسىن ساراپشىلار قوعاممەن ءبىراز تالقىلادى. ونى وتە ماڭىزدى, حالىققا كەرەك جوبا دەپ اتاپ وتۋگە بولادى. اتاپ ايتقاندا, بۇكىل قازاقستان حالقىنىڭ ءال-اۋقاتىنا نازار اۋدارىلىپ وتىر. بۇل باعدارلاماعا ەلىمىزدىڭ بارشا مينيسترلىگى جانە بۇكىل ايماقتاعى اكىمدەر تىكەلەي جاۋاپتى. ونىڭ نەگىزگى باعىتى ناقتى جۇمىس ورىندارىن قۇرۋعا ارنالعان. وسى ورايدا ناقتى سالالار بويىنشا تالقىلاۋلار بولادى, ياعني وندىرىستىك پەرسونالدا قىزمەت ەتەتىن ازاماتتاردىڭ ءال-اۋقاتىن جاقسارتۋعا, جالاقىسىن ارتتىرۋعا بايلانىستى ۇلكەن كۆازيمەملەكتتىك سەكتورداعى كومپانيالاردىڭ ورنى مەن قابىلدانعان شارالار تۋرالى ءتيىستى شەشىم جاسايمىز دەپ كەلىسكەن ەدىك. سول باعدارلامانىڭ ىشىندە «سامۇرىق-قازىنا» قورىنا قاتىستى كوپتەگەن ءىرى كومپانيالار بار. بۇل رەتتە ولاردىڭ جۇمىسىنداعى ءىس-شارالار مەن جۇمىس ىستەيتىن ازاماتتاردىڭ دا تابىسىن ارتتىرۋ جوبالارىن ىسكە اسىرۋىمىز كەرەك», دەدى ە. توعجانوۆ.
وسى ورايدا ول جوسپار بويىنشا «سامۇرىق-قازىنا» قورى قۇرامىنداعى كومپانيالاردا جۇمىس ىستەيتىن 200 مىڭنان استام ادامنىڭ تابىسىن ارتتىرۋعا ەكپىن قويىلعانىن اتاپ ءوتتى.
«سوندىقتان وسى باعىتتا اۋقىمدى جۇمىستار باستالادى. العا قويىلعان ماقسات بويىنشا ىسكە اساتىن جوبالار حالىقتىڭ تابىسىنا قالاي اسەر ەتەتىنىن تۇرعىندار ءبىلۋى كەرەك. وسىنىڭ ءبارى ەلگە اشىق كورسەتىلۋى كەرەك. جوبالاردىڭ جۇزەگە اسىرىلۋىن كۆازيمەملەكەتتىك سەكتورداعى ءىرى كومپانيالاردىڭ باسشىلارى ەلگە ءتۇسىندىرىپ ايتۋى كەرەك», دەدى ۇكىمەت باسشىسىنىڭ ورىنباسارى.