ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىندە ەلىمىزدەگى العاشقى «قازاقستاننىڭ ەنداۋمەنتتەرى» فورۋمى جانە ENU Endowment Fund تانىستىرىلىمى ءوتتى. ءىس-شاراعا قازاقستاندىق جانە شەتەلدىك ساراپشىلار, مەملەكەتتىك مەكەمەلەردىڭ, ءبىلىم بەرۋ ۇيىمدارىنىڭ, قارجى كومپانيالارىنىڭ جانە كاسىپكەرلىك قاۋىمداستىق وكىلدەرى قاتىستى.
رەسمي دەرەكتەرگە سۇيەنسەك, ەلىمىزدەگى جوعارى وقۋ ورىندارىنىڭ جانىنان قۇرىلعان ون شاقتى ەنداۋمەنت بار. ەنداۋمەنت ۇيىمنىڭ تۇراقتى دامۋى مەن بولاشاققا ۇزاق مەرزىمدى ينۆەستيتسيالاۋ قۇرالدارىنىڭ بىرىنە جاتادى.
ۋنيۆەرسيتەتتەر جانىنان قۇرىلعان ەنداۋمەنتتەر وكىلدەرى ءى قازاقستاننىڭ ەنداۋمەنتتەرى فورۋمىندا جۇزدەستى. ەۋرازيا ۇلتتىق ۋنيۆەرسيتەتى مۇرىندىق بولۋىمەن وتكىزىلگەن فورۋم ماقساتتى كاپيتالدى قالىپتاستىرۋ مەن دامىتۋدىڭ وزەكتى ماسەلەلەرىن تالقىلاۋ, ەنداۋمەنتتەردى باسقارۋ بويىنشا وزىق تاجىريبە الماسۋ ءۇشىن بىرىڭعاي الاڭ قۇرۋ ماقساتىندا ۇيىمداستىرىلدى.
فورۋم جۇمىسىن اشقان ءبىلىم جانە عىلىم ۆيتسە-ءمينيسترى قۋانىش ەرعاليەۆ ەنداۋمەنت قورلارىنىڭ مۇمكىندىكتەرىنە توقتالدى. «مۇنداي فورۋمدى وتكىزۋ وتە ۋاقتىلى جانە وزەكتى. ەنداۋمەنت قورىن قۇرۋ – ءبىلىم بەرۋ ۇردىسىنە يننوۆاتسيالاردى ەنگىزۋدىڭ ماڭىزدى قۇرالدارىنىڭ ءبىرى. بۇل جوعارى وقۋ ورىندارىنىڭ دامۋىنا, ستۋدەنتتەردى قولداۋعا, زەرتتەۋ قىزمەتىن ىلگەرىلەتۋگە ىقپال ەتەدى. مەن بۇل باستامانى قولدايمىن», دەدى ول.
ءىس-شارا بارىسىندا ممحقي, قازۇۋ, ۇلتتىق كارديوحيرۋرگيا ورتالىعىنىڭ «جۇرەك ورتالىعى», كازگيۋ, نازارباەۆ ۋنيۆەرسيتەتىنىڭ «الەۋمەتتىك دامۋ قورى», ت.ب. وكىلدەرى ءسوز سويلەدى.
فورۋمدا ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ تۇلەكتەرى قۇرعان ENU Endowment Fund تانىستىرىلدى. تانىستىرىلىمدا ءسوز العان ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ رەكتورى ەرلان سىدىقوۆ ۋنيۆەرسيتەت تۇلەكتەرىنىڭ الەۋمەتتىك جاۋاپكەرشىلىگى جوعارى ەكەنىن جەتكىزدى.
ء «بىزدىڭ تۇلەكتەر ENU Endowment Fund قۇرۋعا باستاماشى بولدى. ۋنيۆەرسيتەتىمىزدە ەنداۋمەنت تاجىريبەسى جۇزجىلدىقتارمەن ولشەنەتىن ۇزدىك الەمدىك جوعارى وقۋ ورىندارىنىڭ ۇلگىسى بويىنشا ماقساتتى كاپيتال قورىنىڭ قۇرىلۋى – بۇرىن-سوڭدى بولماعان وقيعا. جاقىن ارادا قوردىڭ تابىسى دارىندى ستۋدەنتتەرگە جانە ولاردىڭ يننوۆاتسيالىق جوبالارىنا قارجىلىق قولداۋ كورسەتۋگە مۇمكىندىك بەرەتىنىنە سەنىمدىمىن. وسىلايشا, تۇلەكتەر وزدەرىنىڭ ءبىلىم العان جوو-نىڭ ومىرىنە بەلسەنە ارالاسىپ, ادام الەۋەتىن دامىتۋعا عانا ەمەس, بۇكىل ەلدىڭ بولاشاعىنا دا ۇلەس قوسادى», دەدى رەكتور.
ENU Endowment Fund ديرەكتورى دينارا مۇسابالينا قوردى جانە ۆەب-سايتتى https://endowmentenu.kz/ تانىستىرۋ بارىسىندا ماقساتتى كاپيتالعا قول سۇعىلمايتىنىن جانە جيناقتاۋ سيپاتى بار ەكەنىن اتاپ ءوتتى. ودان تۇسكەن ينۆەستيتسيالىق تابىس ەسەبىنەن عانا جوبالاردى قارجىلاندىرۋدى جۇزەگە اسىرۋ جوسپارلانعان. ەۇۋ-دىڭ قۇرىلتايشى-تۇلەكتەرى مۇقتاج ستۋدەنتتەرگە گرانتتار مەن ستيپەنديالار تاعايىنداۋ ارقىلى قولداۋ كورسەتۋدى, ءبىلىم الۋشىلاردىڭ عىلىمي-يننوۆاتسيالىق جانە كاسىپكەرلىك قىزمەتىنە جاردەمدەسۋدى جانە تالانتتى جاستارعا قولعابىس ەتۋدى كوزدەپ وتىر.
قورعا العاشقى جارنانى 10 ملن تەڭگە كولەمىندە ENU Endowment Fund قۇرىلتايشىلارىنىڭ ءبىرى ءارى جوو تۇلەگى دميتري ينيۋتين قۇيدى. ول بولاشاق ۇرپاق عىلىممەن اينالىسادى دەپ ۇمىتتەنەدى. «وسى ۋنيۆەرسيتەتتە العان ءبىلىم مەن داعدىلار كوپتەگەن ومىرلىك قيىندىقتى جەڭۋگە كومەكتەستى. بۇگىنگى جەتىستىكتەرىمدە ءبىلىمنىڭ ۇلەسى بار. ءوزىمنىڭ ۋنيۆەرسيتەتىمە, ونىڭ ىشىندە جاڭا تەحنولوگيالار داۋىرىندە بىلىمگە قۇشتار ستۋدەنتتەرگە كومەكتەسۋ ءتارىزدى جاۋاپتى ءىس-ارەكەتتەردىڭ ۋاقىتى كەلدى. ەنداۋمەنت – قيىن-قىستاۋ كەزەڭدەردە ۋنيۆەرسيتەتتەردىڭ تۇراقتىلىعىن ساقتاۋ مەن نىعايتۋدىڭ ءتيىمدى تەتىگى. وسى قوردىڭ قولداۋىمەن ءبىزدىڭ بولاشاق ۇرپاقتارىمىز عىلىممەن اينالىسادى», دەپ اتاپ ءوتتى د.ينيۋتين.