قورعانىس ءمينيسترىنىڭ ءبىرىنشى ورىنباسارى – قازاقستان رەسپۋبليكاسى قارۋلى كۇشتەرى باس شتابىنىڭ باستىعى گەنەرال-پولكوۆنيك ساكەن جاسۇزاقوۆ جۇمىس ساپارىمەن اقتاۋ گارنيزونىندا بولدى.
ساپار بارىسىندا باس شتاب باستىعى اۋە قورعانىسى كۇشتەرىنە قاراستى 30153 اسكەري ءبولىمىنىڭ جاڭادان سالىنعان شتابىنىڭ اشىلۋ سالتاناتىنا قاتىستى. جاڭا زامانعا لايىقتاپ سالىنعان شتاب ۇيىندە اسكەري قىزمەتشىلەرگە بارلىق جاعداي جاسالعان. عيماراتتا وفيتسەرلەردىڭ ءماجىلىس زالى, بريفينگ زال, پسيحولوگيالىق جەڭىلدەۋ بولمەسى, ءتىل ۇيرەنۋشىلەر ءۇشىن لينگوفون كابينەتى, سپورت زالى, اسحانا ورنالاسقان.
جاڭا نىسان قىزمەتكە قاجەتتى قۇرىلعىلارمەن تولىقتاي جاراقتاندىرىلعان. اسكەري ءبولىم كەزەكشىسىنىڭ قىزمەت ورنى دا زاماناۋي ۇلگىگە ساي جابدىقتالعان. وندا جاۋىنگەرلىك قىزمەتتى اتقارۋ ءۇشىن بەينەقوندىرعىلار قويىلعان. ەندى كەزەكشى قىزمەت ورنىندا وتىرىپ-اق, اۆياتسيالىق ءبولىمنىڭ اۋماعىن تولىقتاي باقىلاۋدا ۇستاي الادى. شتاب ۇيىندەگى اسكەري قىزمەتشىلەردىڭ كەڭ دە جارىق قىزمەت بولمەلەرىندە جۇمىس ىستەۋ قولايلى.
اسكەري-اۋە كۇشتەرىنە قاراستى 30153 اسكەري ءبولىمى 2011 جىلعى 25 مامىردا قۇرىلىپ, سول كۇنى قازاقستان رەسپۋبليكاسىنىڭ باتىستاعى اۋە كەڭىستىگىن قورعاۋ ماقساتىندا جاۋىنگەرلىك كەزەكشىلىككە كىرىستى. وسى ازعانتاي ۋاقىتتىڭ ىشىندە اسكەري ۇشقىشتار ءبىرنەشە حالىقارالىق اسكەري وقۋ-جاتتىعۋلارعا قاتىسىپ, ءتاجىريبەلەرىن شىڭدادى. 2011 جىلعى 30 تامىزدا كونستيتۋتسيا كۇنىنە ارنالعان اسكەري پاراد پەن 2013 جىلى قازاقستان قارۋلى كۇشتەرىنىڭ تاريحىندا تۇڭعىش رەت وتكىزىلگەن جاۋىنگەرلىك پارادقا قاتىسىپ, قازاقستاندىقتاردىڭ قۇرمەتىنە بولەندى.
اقتاۋ گارنيزونىنا جۇمىس ساپارى بارىسىندا باس شتاب باستىعى اقتاۋ گارنيزونىنداعى اسكەري نىسانداردا بولىپ, جۇرگىزىلىپ جاتقان قۇرىلىس جۇمىستارىمەن تانىستى.
«ەگەمەن-اقپارات».