بۇل تۋرالى سەنات توراعاسى ماۋلەن اشىمباەۆ الەۋمەتتىك جەلىدەگى پاراقشاسىندا جازدى, دەپ حابارلايدى Egemen.kz.
«مەملەكەت باسشىسى قاسىم-جومارت كەمەل ۇلى توقاەۆ قازاقستان حالقى اسسامبلەياسىنىڭ ءحححى سەسسياسىندا ەلىمىزدىڭ بۇگىنى مەن بولاشاعىنا قاتىستى تىڭ باستامالار تۋرالى ايتتى. ونىڭ ىشىندە قوعام تاراپىنان بىردەن قىزۋ قولداۋ تاپقان اتا زاڭعا وزگەرىستەر مەن تولىقتىرۋلار ەنگىزۋ جونىندە رەسپۋبليكالىق رەفەرەندۋم وتكىزۋ تۋرالى ۇسىنىستىڭ ماڭىزى جوعارى.
وسى رەتتە پرەزيدەنتىمىزدىڭ ۇسىنىسى حالىقتىڭ تالاپ-تىلەگى مەن سۇرانىسىنان تۋىنداعانىن اتاپ وتكەن ءجون. سوندىقتان بۇگىنگى باستامانى «حالىق ۇنىنە قۇلاق اساتىن مەملەكەت» تۇجىرىمداماسىنىڭ تاعى ءبىر ناقتى ناتيجەسى دەپ قابىلدايمىز. شىن مانىندە, بۇل رەفەرەندۋم قولعا الىنعان ساياسي جانە كونستيتۋتسيالىق رەفورمالاردى ىسكە اسىرۋ جولىنداعى نەگىزگى قادامداردىڭ ءبىرى بولارى ءسوزسىز», دەيدى سەنات توراعاسى.
سونداي-اق ماۋلەن اشىمبەۆ كونستيتۋتسياعا ەنگىزىلەتىن وزگەرىستەر مەملەكەتتىلىكتىڭ جاڭا مودەلىن قالىپتاستىرۋدى كوزدەيتىنىن, بۇل – مەملەكەت پەن قوعامنىڭ بايلانىسىن بۇرىنعىدان دا جاقىنداتا تۇسەتىن ۇلكەن مۇمكىندىك ەكەنىن ايتتى.
«رەفورما اياسىندا اتا زاڭىمىزدىڭ 33 بابىنا تۇزەتۋ ەنگىزىلەدى. ياعني ەلىمىزدىڭ ەڭ باستى قۇجاتىنىڭ ۇشتەن ءبىرى وزگەرەدى دەگەن ءسوز. سول سەبەپتى, وسىنداي تاريحي بەتبۇرىستى حالىقتىڭ تىكەلەي قاتىسۋىمەن جۇزەگە اسىرۋ اسا ماڭىزدى.
ونىڭ ۇستىنە, رەسپۋبليكالىق رەفەرەندۋم وتكىزۋ ازاماتتارىمىزدىڭ كونستيتۋتسيالىق قۇقىعى ەكەنى بەلگىلى. سونداي-اق ول بۇكىل حالىققا ەل بولاشاعى ءۇشىن ورتاق جاۋاپكەرشىلىك جۇكتەيدى. وسىلايشا ءبىز ورتاق مۇددەگە جۇمىلۋ ارقىلى ناعىز دەموكراتيالى جانە ادىلەتتى «جاڭا قازاقستاندى» قالىپتاستىرا الامىز.
بۇگىنگى سەسسيادا مەملەكەت باسشىسى قازىرگى گەوساياسي احۋالعا دا نازار اۋدارىپ, مۇنداي جاعدايدا ەلىمىزدىڭ ازاماتتىق بىرەگەيلىگىن نىعايتۋ جانە وتانشىلدىق رۋحىن كوتەرۋ قاجەت ەكەنىن ايتتى. بۇل ەكى قۇندىلىق تا ەلدىك پەن مەملەكەتتىلىكتىڭ باستى تىرەكتەرىنىڭ ءبىرى. سوندىقتان ءبىز پرەزيدەنتىمىز ايتقانداي, «بىرلىگىمىز – ارالۋاندىقتا» قاعيداتىن بەرىك ۇستانۋىمىز قاجەت.
الداعى ۋاقىتتا مەملەكەتتىلىك مۇددە جولىنداعى وسىنداي تىڭ باستامالاردى ىسكە اسىرۋعا پارلامەنت سەناتى بەلسەندى قاتىسا بەرەدى. ءبىز مەملەكەت باسشىسىنىڭ باستامالارىن قۇقىقتىق تۇرعىدان قامتاماسىز ەتۋ ءۇشىن ءتيىستى زاڭداردىڭ ءبارىن قابىلدايمىز», دەدى ول.