ساراپشىلاردىڭ مالىمەتىنشە, قازاقستاندا 2022 جىلدىڭ قاڭتار-ناۋرىز ايلارىندا 725 سىبايلاس جەمقورلىق قىلمىسى تىركەلگەن. بۇل ءبىر جىل بۇرىنعى كورسەتكىشتەن 26,5%-عا كوپ, دەپ حابارلايدى Egemen.kz.
Finprom.kz زەرتتەۋىندە كورسەتىلگەندەي, تىركەلگەن جەمقورلىق قىلمىستارىنىڭ ۇشتەن ءبىرى پارا الۋ قىلمىسىنىڭ ۇلەسىنە ءتيدى. ءبىر جىل بۇرىنعىدان بىردەن 246 وقيعاعا كوبەيگەن (48,2%-عا ارتىق).
پارا بەرۋ ءىسى سىبايلاس جەمقورلىقپەن اينالىساتىن شەنەۋنىكتەردىڭ اراسىندا «تانىمالدىعى» بويىنشا ەكىنشى ورىندى يەلەندى: 198 قۇقىق بۇزۋشىلىق, پليۋس 14,5%. ودان كەيىن بوتەننىڭ سەنىپ تاپسىرىلعان مۇلكىن يەمدەنۋ نەمەسە جىمقىرۋ كەلەدى: 88 ءىس, جىلىنا پليۋس 31,3%.
قىزمەت بابىن اسىرا پايدالانۋ, الاياقتىق تا سالاداعى ءجيى كەزدەسەتىن زاڭ بۇزۋشىلىقتاردىڭ قاتارىندا.
وڭىرلىك تۇرعىدا الماتى وبلىسى پارا الۋ بويىنشا الدىڭعى ورىندا: 67 جاعداي, جىلىنا پليۋس 2,4 ەسە. سونىمەن قاتار الماتى (57 جاعداي, پليۋس 42,5%) جانە نۇر-سۇلتان (47 جاعداي, مينۋس 11,3%) دا العاشقى ۇشتىككە كىرەدى.
بۇل جاعىنان قىزىلوردا وبلىسىندا جاعداي وڭالعان. نەبارى 5 جاعداي تىركەلگەن. بۇل ءبىر جىل بۇرىنعىدان از. ءبىر جىل بۇرىن 11 جاعداي تىركەلگەن ەدى.
پاراقورلىققا پارا الۋ, بەرۋ جانە پارا بەرۋگە دەلدالدىق جاتادى. جىل باسىنان بەرى سەكتوردا 459 جاعداي تىركەلىپ, وتكەن جىلدىڭ سايكەس كەزەڭىمەن سالىستىرعاندا 31,5%-عا ارتقان.