جۇلدە قورى 5 ملن تەڭگەنى قۇرايتىن رەسپۋبليكالىق بايقاۋ مارەسىنە جەتتى. بۇل ەلدىڭ الەۋمەتتىك-ەكونوميكالىق دامۋىنا ۇلەس قوسۋعا دايىن بەلسەندى جاستاردىڭ جوبالارىن قولداۋعا باعىتتالعان.
اتالعان جوبا – Coca-Cola Icecek Kazakhstan كومپانياسىنىڭ باستاماسى. 2016 جىلدان بەرى وتكىزىلىپ كەلگەن بايقاۋدا باق سىناۋعا بيىل 300-گە جۋىق ءوتىنىم تۇسكەن. كونكۋرستىق كوميسسيا ەڭ ۇزدىك يدەيالار اۆتورلارىنا جوبالارىن جۇزەگە اسىرۋىنا گرانت بەردى. جەڭىمپازداردىڭ جوبالارىنا توقتالساق: جانسۇگىر سەرىكوۆ «گيدروپوندىق ادىسپەن قيار ءوسىرۋ» جوباسىنا 1,5 ملن تەڭگە; ايان مۇحتاسيپوۆ «ايماقتاردا قازاق تىلىندە زاماناۋي بيدەن ونلاين كۋرستار وتكىزۋ» جوباسىنا 1,5 ملن تەڭگە; جانارىس تۇبەكباەۆ «قارجىلىق ساۋاتتىلىقتى دامىتۋ پلاتفورماسى» جوباسى ءۇشىن 1 ملن تەڭگە; ءسانيا ارينوۆا «قىزدار مەن ايەلدەرگە ارنالعان كوپ رەت قولدانىلاتىن ماتادان جاسالعان ەكولوگيالىق تازا توسەمەلەر شىعارۋ» جوباسىنا 1 ملن تەڭگە يەلەندى.
بايقاۋدى ۇيىمداستىرۋشى كومپانيانىڭ وكىلى اليما يسەمباەۆا: ء«بىز اۋەلدە جاستاردىڭ دامۋىنا ۇلەس قوسۋدى كوزدەدىك. ءسويتىپ ساراپشىلاردى, تالىمگەرلەر مەن جاتتىقتىرۋشىلاردى تارتىپ, جاستارعا ءتۇرلى ترەنينگ ۇيىمداستىرا باستادىق. سول سەمينارلاردا جاستار وزدەرىنىڭ ومىرىنە قاجەتتى داعدىلاردى مەڭگەرە الادى. دەگەنمەن ۋاقىت وتە كەلە جوبامىزدىڭ بۇدان دا كوپ ناتيجە بەرە الاتىنىن ءبىلىپ, وزەكتى الەۋمەتتىك ماسەلەلەردى شەشۋگە باعىتتالعان ۇزدىك يدەياعا جىل سايىن بايقاۋ وتكىزۋدى ۇيعاردىق. وسىلايشا, ۇزدىك يدەيالاردىڭ اۆتورلارى ءوز جوبالارىن جۇزەگە اسىرۋ ماقساتىندا كومپانيامىزدان اقشالاي گرانت الۋ ءۇشىن باسەكەگە ءتۇسۋ مۇمكىندىگىنە يە بولدى», دەدى.
بايقاۋعا قاتىسۋشىلار قارجىلىق قولداۋعا قوسا وقۋ باعدارلاماسىنان ءوتىپ, تاجىريبەلى مامانداردان ساباق الادى.