Amanat پارتياسىنىڭ قۇرىلتايىندا ەل كۇتكەن ماسەلەلەر ايتىلدى. پرەزيدەنتتىڭ پارتيا توراعالىعىنان باس تارتىپ قانا قويماي, پارتيا قاتارىنان شىعۋى حالقىمىزدىڭ جالپى سايلاۋ جۇيەسىنە دەگەن سەنىمىن نىعايتا تۇسەدى.
تۋراسىن ايتساق, بيلىكتە «بيلەۋشى پارتيا» دەگەن ۇعىم بار. بارلىق لاۋازىمدى شەنەۋنىكتەر سول بيلىك پارتياسىنىڭ وكىلى ەكەنى دە ءمالىم. بۇعان دەيىن بيلىك باسىنداعىلاردىڭ بارلىعى دا وسى پارتيانىڭ مۇشەسى بولعاندىقتان, جاعداي نەگىزىنەن سول پارتياعا جاسالدى. باسقا ساياسي كۇشتەر ونىمەن تەڭەسە المادى.
ناقتىراق ايتساق, سايلاۋ كەزىندە دە بيلىك پارتياسىنىڭ باسىمدىعى بايقالىپ تۇردى, مەكتەپتەر مەن ۋنيۆەرسيتەتتەردە, باسقا دا مەملەكەتتىك ورگانداردا قىزمەتكەرلەر بيلىك پارتياسىنا جۇمىس ىستەدى. ەندى پرەزيدەنتتىڭ قادامىنان كەيىن جاعداي تەڭەسەدى دەگەن سەنىم بار. نەگە دەسەڭىز پرەزيدەنت جاڭا جانە ادىلەتتى قازاقستاندى قۇرۋ قاجەتتىگىن اڭگىمەگە ارقاۋ ەتتى. بۇل دەگەنىڭىز دەموكراتياعا ۇمتىلىس دەگەندى بىلدىرەدى. ال سول دەموكراتيالىق سيپات سايلاۋ كەزىندە دە اڭعارىلۋعا ءتيىس. الداعى ۋاقىتتا سولاي بولۋى قاجەت. پرەزيدەنتتىڭ پارتيا توراعالىعىنان باس تارتۋى سوعان اكەلەدى دەگەن سەنىم مول. ەندى بۇرىنعىداي باي بالاسى مەن جارلى بالاسىنىڭ باسەكەسىنە اينالعان ساياسي كورىنىس قايتالانبايدى.
جۋىردا عانا پرەزيدەنت وبلىس, قالا, اۋدان اكىمدەرى پارتياعا ىقپال ەتپەۋى كەرەكتىگىن ايتقان بولاتىن. وسىنى جەرگىلىكتى اتقارۋشى بيلىكتەگىلەر مەن وزگە دە لاۋازىمدى شەنەۋنىكتەر قاپەردە ۇستاۋى كەرەك. اكىمدەر ەندىگارى الدىمەن حالىق ءۇشىن جۇمىس ىستەۋى, سايلاۋدىڭ, باسقا دا جۇمىستاردىڭ ءادىل جۇرگىزىلۋىنە مۇددەلى بولعانى ءلازىم.
پرەزيدەنت Amanat پارتياسى الەۋمەتتىك ادىلدىكتى ورنىقتىرۋعا ءاردايىم باسا ءمان بەرەتىنىن ايتتى. Adal پارتياسىنىڭ Amanat پارتياسىنا قوسىلۋى قانشالىقتى قاجەتتىلىك بولعانىن بىلمەيمىن, ەڭ باستىسى, حالىققا ادال قىزمەت ەتسە, پارتيانىڭ بۇعان دەيىن الدىنا قويعان ماقساتتارى ىسكە اسادى دەپ سانايمىن. ەلىمىزدە باسقا دا پارتيالار بار. ءالى كۇنگە دەيىن اۋىلدىقتاردىڭ اماناتىن ارقالاعان «اۋىل» پارتياسى ساياسي ورتادان ىعىسقان جوق. الداعى ساياسي دودالاردا جاڭا ساياسي پارتيالاردىڭ قۇرىلۋى ابدەن ىقتيمال.
ەلىمىزدەگى بارلىق سالانى تۇبەگەيلى مونوپولياسىزداندىرۋ اسا ماڭىزدى ەكەنىن پرەزيدەنت ايتىپ ءوتتى. بۇل – جاڭا قازاقستانعا شىنايى كەرەك ءسوز. راسىندا دا قوعامدىق ساياسي كۇش بولسىن, جەكەلەگەن تۇلعا بولسىن, ولاردىڭ بارلىعى دا مەملەكەتتىڭ تۇتاستىعى مەن ەلدىڭ قامى ءۇشىن جۇمىلۋعا قاقىلى. ءاربىر ازاماتتىڭ ورىندى پىكىرىن تىڭداۋ ارقىلى عانا ءبىز جاڭا قازاقستاندى قۇرا الامىز. وسىنى قاپەردە ۇستاعان ءجون.
داۋلەتكەرەي كاپ ۇلى,
قازاقستان جازۋشىلار وداعىنىڭ حاتشىسى, نۇر-سۇلتان فيليالىنىڭ ديرەكتورى