تاۋەلسىزدىكتىڭ تىرەگى, وتانىمىزدىڭ جۇرەگى – كەشەگى استانا, بۇگىنگى نۇر-سۇلتان قالاسىنىڭ شاڭىراق كوتەرىپ, بوساعا بەكىتكەنىنە بيىل 25 جىل!
بۇل - عاسىرلار بويى بابالار اڭساپ كۇتكەن ۇلى قۋانىش! ۇلت مۇراتى. سول جولدا سانسىز ارىستارىمىز, اسىلدارىمىز, ارداقتىلارىمىز شاھيت بولدى. سوندىقتان بۇل بوستاندىق - جويداۋسىز توگىلگەن قاننىڭ, قىرشىنىنان قيىلعان قانشاما جاننىڭ بوداۋى.
باسىمىزدان توقپاق كەتىپ, اۋىزىمىزدان قاقپاق الىنىپ, ازاتتىقتىڭ ساف اۋاسىمەن ەركىن تىنىستاپ, كەرەگە جايىپ, كەڭ كوسىلىپ ءومىر ءسۇرۋ قانداي باقىت! ازاتتىقتىڭ قادىرىن ەلىن سۇيگەن ەرلەر عانا تەرەڭ سەزىنەدى, باسىنان التىن قۇيساڭ دا بۇلك ەتپەيتىن بەزبۇيرەكتەرگە ءبارىبىر. سوناۋ كونە زامانداردان بۇگىنگە جالعاسقان تىرشىلىگىمىزدە حالقىمىز وردا تۇتقان وردابازار, بالاساعۇن, سارايشىق, ساۋران, تۇركىستان سياقتى تالاي تاريحي قالالار بولدى. الايدا, تاۋەلسىزدىكتىڭ تۋىن تىگە سالىسىمەن تۇڭعىش پرەزيدەنتىمىز نۇرسۇلان ءابىش ۇلىنىڭ باستاۋىمەن الاتاۋدان ارقاعا كوشكەن استانانىڭ ءجونى بولەك. وتىز جىل ىشىندە ىرگەمىزدى بەكىتىپ, ەڭسەمىزدى تىكتەدىك. قازاقتى الەم تانىدى. راس, اۋمالى-توكپەلى, بيلىككە وكپەلى الاساپىران كۇندەر دە ءوتتى. ونىڭ كۋاسى – كەشەگى قاڭتار قاسىرەتى. جان جاراسى جاسىرعانمەن جازىلمايدى. شىندىقتىڭ بەتىنە تۋرا قاراۋىمىز كەرەك. سوندا عانا ۇلى تاريح الدىندا ۇيالمايمىز!
تاريح بىرىڭعاي جارقىن بەتتەردەن تۇرمايدى. باسىمىزدان وتكەن وتىز جىل وزگەنىڭ ەمەس ءوزىمىزدىڭ تاريحىمىز. ونى ءادىل باعالاي بىلگەنىمىز ءجون. «جاڭا قازاقستان» بۇگىننەن باستالمايدى, كەشەگىنىڭ زاڭدى جالعاسى. تاريحي ساباقتاستىق ۇزىلگەن جەردە كەز-كەلگەن كوش تۇيىققا تىرەلەدى. ءبىز وعان ۇرىنباۋىمىز كەرەك. كەڭىنەن ويلاپ, كەڭ پىشكەندە عانا كەلەشەگىمىز جارقىن بولماق. نۇر-سۇلتان قالاسىنىڭ اكىمى التاي كولگىنوۆتىڭ قولداۋىمەن, ساكەن سەيفۋللين مۋزەيىنىڭ ۇيىمداستىرۋىمەن قالانىڭ مەرەيلى مەرەكەسىنە وراي جاريالانىپ وتىرعان «ەڭسەسى بيىك – ەلوردا» اتتى بۇل ءمۇشايرانىڭ ماقسات-مۇددەسى دە وسىعان سايادى.
ون جىلدان بەرى ءوتىپ كەلە جاتقان ءداستۇرلى بۇل مۇشايراعا تالاي تالانتتار قاتىسىپ جۇلدەلى بولعانىن ەسكە الساق, بيىل دا قالامى جۇيرىك, قارىمى قۋاتتىلار جىر دوداسىنا بەلسەنە قاتىسادى دەپ ويلايمىز. تاقىرىپ اياسىنىڭ كوكجيەگى كەڭ. شىنايى جىرلاپ, ەل قاسيەتىن, ەلوردا قادىرىن قاستەرلەۋ ءار اقىننىڭ شابىتى مەن شابىسىنا بايلانىستى. جىر مارەسىندە جۇزدەسكەنشە, شايىرلار!
وزعاندارعا تومەندەگىدەي ولجا بار:
باس جۇلدە – 3 000 000 تگ.
ءبىرىنشى ورىن – 2 000 000 تگ.
ەكىنشى ورىن ەكەۋ – 1 000 000 تەڭگەدەن.
ءۇشىنشى ورىن ۇشەۋ – 500 000 تەڭگەدەن.
ىنتالاندىرۋ بەسەۋ – 250 000 تەڭگەدەن.
مۇشايراعا ەشجەردە جارىق كورمەگەن تولعاۋلار, توپتاما ولەڭدەر 2022 جىلدىڭ ماۋسىم ايىنىڭ 10-نا دەيىن قابىلدانادى. قورىتىندىسى قالا كۇنى قارساڭىندا شىعىپ, ماراپاتتاۋ ءراسىمى وتەدى.
ۇمىتكەرلەر شىعارماسىن كومپيۋتەردە تەرىپ, astanakalamger@mail.ru ەلەكتروندى پوشتاعا جولداۋعا ءتيىس. قازپوشتا ارقىلى دا جىبەرە الادى.
اۆتوردىڭ اتى-ءجونى, مەكەن-جايى, بايلانىس تەلەفونى, ەلەكتروندى پوشتاسى مىندەتتى تۇردە كورسەتىلۋى كەرەك.
يندەكس: 010000, نۇر-سۇلتان قالاسى. م.اۋەزوۆ كوشەسى 20 «ا» ءۇي. ساكەن سەيفۋللين مۋزەيى. تەل: + 7 775 692 37 30
ەسكەرتۋ: كەلىپ-كەتۋ شىعىنىن جۇلدەگەرلەردىڭ وزدەرى كوتەرەدى.
ۇيىمداستىرۋ القاسى