دۇنيەدە ۋاقىتتان اسقان جۇيرىك بار ما؟! كەشە عانا ەكراننان ەستى دۇنيە ىزدەپ تەلمىرگەن كورەرمەننىڭ كوزايىمى بولعان بەلگىلى جۋرناليست, قوعام قايراتكەرى نۇرتىلەۋ يمانعالي ۇلىنىڭ ومىردەن وتكەنىنە دە جىل تولىپتى. جىلتىر ءسوز, جەڭىل كۇلكىدەن ادا سالماقتى وي, ساليقالى پىكىرلەرىمەن ەلدىڭ جۇرەگىن جاۋلاعان تۇلعانىڭ ورنى ۋاقىت وزعان سايىن ويسىراپ تۇر.
وڭاشادا سىرلاساتىن ونىڭ قولى تيگەن ءاربىر زاتپەن بۇگىن كورمەدە جاقىن تانىستىم. كوزىممەن ايمالاپ, جابىرقاعان كوڭىلدى جۇباتتىم. ازاماتتىڭ ارتىندا اتى قالادى ەكەن, قولدانعان زاتى قالادى ەكەن. جارقىراعان التىن ساعات توقتاپ تۇر, يەسىن جوقتاپ تۇر. بالكىم جۇرەك ساعاتى توقتاعان كۇنى ول دا سوعۋىن توقتاتقان بولار. ەفيردە كيگەن كيىمدەرى قازىر قايتىپ كەلەتىندەي كۇتىپ تۇر. ۇستىنەن ابايدىڭ كىتابىن تۇسپەگەن جۇمىس ۇستەلى جۇمباق ءبىر كۇيگە بولەيدى. اۋادا ءالى اعانىڭ جازىلماعان سوزدەرى قالىقتاپ جۇرگەندەي. قيمىلسىز قالامى ەندى ەشتەڭە ايتقىسى كەلمەگەندەي ءۇنسىز تۇنجىرايدى...
ۇلتتىق مۋزەيدە بۇگىن قازاق جۋرناليستيكاسىنىڭ قايراتكەرى نۇرتىلەۋ يمانعالي ۇلىنىڭ 70 جىلدىعىنا ارنالعان «باي-قۋاتتى بولايىق!» اتتى كورمە اشىلدى.
قازاق تەلەۆيزياسىندا 47 جىل قىزمەت اتقارعان جۋرناليستيكا ارداگەرى نۇرتىلەۋ يمانعالي ۇلىنىڭ قوعامداعى ءرولى مەن سىڭىرگەن ەڭبەگىن جۇرتشىلىققا ناسيحاتتاۋدى ماقسات ەتكەن رەسپۋبليكالىق كوشپەلى كورمەنىڭ ۇرپاققا بەرەر ونەگەسى مول. ەل تىرەگى – ەلوردادان باستالعان كورمەگە تانىمال جۋرناليستەر, ءماجىلىس دەپۋتاتتارى, زيالى قاۋىم مەن قاناتتاس دوستارى, شاكىرتتەرى قاتىستى. تەلەجۋرناليستيكانىڭ تارلانى جايلى ەستەلىكتەرمەن ءبولىسىپ جۇرەكجاردى سوزدەرىن ارناپ, رۋحىنا تاعزىم ەتتى.
«بۇل كورمەنى جۇزەگە اسىرۋ ءوزىنىڭ يدەياسى ەدى. مەرەيتويىمدى حالىقتىڭ ورتاسىندا, شاعىن كورمەمدى بىرگە الىپ ءجۇرىپ وتكىزسەم دەپ جوسپارلاعان. كورمەدە ومىردە ءوزى پايدالانعان زاتتارى, ەفيردە قولدانعان قامشىسى, اسىعى, شوقپارى, فوتواپپاراتى, تاڭداۋلى كيىمدەرى, ەڭبەگىنە ساي العان ۇلكەن ماراپاتتارى, قولساعاتى, جۇمىس ۇستەلى سىندى دۇنيەلەرى حالىققا ۇسىنىلدى. اتالعان شارا 1 اي بويى ەلوردادا وتەدى. ول كوشپەلى كورمە بولعاندىقتان ەلىمىزدىڭ بىرنەشە قالاسىن شارلاپ, ءتۇيىنى تۋعان جەرى تالدىقورعاندا قويىلماق. قولى قالت ەتكەندە شىعارماشىلىقپەن اينالىستى. جەتپىسىنە كىتاپ دايىنداپ ءجۇردى. ونى دا جاقىندا جارىققا شىعاراتىن بولامىز.
«جازمىشتان وزمىش جوق», دەيدى بابالارىمىز. نۇرەكەڭ 69 جاساسا دا ءماندى دە ماعىنالى ءومىر ءسۇردى. ماقساتىنا جەتتى. ءومىر بويى ءوزىنىڭ سۇيىكتى ىسىمەن اينالىسىپ, سونىڭ شىڭىنا شىقتى. حالقىنىڭ قۇرمەتىنە بولەندى. سوڭىنان وشپەس مۇرا قالدىردى. جۋرناليستيكادا قالىپتاستىرعان مەكتەبى ءوز الدىنا ءبىر توبە دەۋگە بولادى», دەيدى ءجۋرناليستىڭ جۇبايى قارلىعاش سوۆەتبەكقىزى.
تاعىلىمدى شارادا ۇلتتىق مۋزەي ديرەكتورى ارىستانبەك مۇحامەدي ۇلى باستاپ, ءجۋرناليستىڭ جۇبايى قارلىعاش سوۆەتبەكقىزى, ءماجىلىس دەپۋتاتتارى اقىن قازىبەك يسا, جاناربەك ءاشىمجان, امانجول ءالتاي, سەنات دەپۋتاتى ءلاززات سۇلەيمەنوۆا, «QAZAQSTAN» رترك» اق توراعاسى ءلاززات تانىسباي, «حابار» اگەنتتىگى» اق باسقارما توراعاسى بەرىك ءۋالي ءسوز سويلەپ, جىلى ەستەلىكتەرىمەن ءبولىستى.