قوستانايداعى لەۆ تولستوي اتىنداعى وبلىستىق كىتاپحانادا «كىتاپحانا ءتۇنى» اتتى وقىرماندار مەرەكەسى ءوتتى. پاندەميا كەزىندەگى شەكتەۋگە بايلانىستى ەكى جىلداي ءۇزىلىپ قالعان ءداستۇرلى شارا بيىل تابيعات بايلىعىن قورعاۋ, قورشاعان ورتانىڭ تازالىعىن ساقتاۋ سياقتى ەكولوگيالىق ماڭىزى بار ماسەلەلەرگە ارنالىپ وتىر.
كىتاپحانانىڭ ءبىرىنشى قاباتىندا بالالار كيىمىنىڭ ەكودەفيلەسى, «تابيعات تارتۋى» سياقتى ءىس-شارالار, ال ەكىنشى, ءۇشىنشى قاباتتاردا «كاپرون قۋىرشاقتار» بۇرىشى مەن «الەم مەن تابيعات ۇيلەسىمى» ەكوۆيكتوريناسى, «ورگانيك ماركەت» كورمەسى, «فاندرايزينگ ەكو-باستامالار» پانوراماسى ۇيىمداستىرىلدى. ءىس-شاراعا ارنايى شاقىرىلعان ەكولوگ ماماندار جينالعاندارعا «تابيعات تازالىعى – ءتان تازالىعى» تاقىرىبىندا ءدارىس وقىپ, قىزىقتى تاپسىرمالار ورىنداتىپ, زياتكەرلىك ويىندار وتكىزدى.
ناۋرىزىم قورىعىنىڭ قىزمەتكەرلەرى وقىرماندارعا ەمدىك قاسيەتى بار شوپتەردەن دايىندالعان شاي ۇسىنىپ, بۇل شوپتەردىڭ كومەگىمەن قانداي اۋرۋلاردى ەمدەۋگە بولاتىنىن ايتىپ بەردى. ال قوستانايداعى «وزات» مەكتەبىنىڭ وقۋشىلارى كوپشىلىككە حيميا ءپانى بويىنشا جاساعان ەكوجوبالارىن كورسەتتى.
كەش قوناقتارى تۇنگى شامنىڭ سىعىرايعان ساۋلەسىمەن كۇڭگىرت تارتىپ, قۇپيا سىرعا بوككەن سيرەك كەزدەسەتىن كىتاپتار قورىنا ءتۇسىپ, وسىندا ساقتاۋلى تۇرعان كونە گازەت تىگىندىلەرىمەن جانە قۇندى قۇجاتتارمەن تانىستى.
ۇيىمداستىرۋشىلار كىشكەنتاي وقىرمانداردى دا نازاردان تىس قالدىرماي, بالالاردىڭ كوڭىلىن اۋلايتىن كوپتەگەن قىزىقتى تانىمدىق ويىندار ويلاستىرىپ قويىپتى. بالعىنداردىڭ ءبىر توبى تاڭعاجايىپ سيقىرشىلاردىڭ ونەرىن تاماشالاپ قۋانىشقا كەنەلىپ جاتسا, ەكىنشىلەرى قولونەر شەبەرلەرىنىڭ زالىنا ءوتىپ, قىشتان ىدىس جاساماق بولىپ اۋرەگە ءتۇسىپ جاتتى.
ال وقىرماندار زالىندا وتكەن «جاۋقازىن-عۇمىر» اتتى پوەزيا كەشىندە جەرگىلىكتى اقىندار جاستىق شاق, تۋعان جەر, ماحاببات تاقىرىپتارىنا ارنالعان ليريكالىق ولەڭدەرىن وقىدى.