ءبىرىنشى مامىردان باستاپ iQala قالالىق قىزمەتتەر ورتالىعىنىڭ پورتالى بارلىق پايدالانۋشىلار ءۇشىن قولجەتىمدى بولمايدى. رەسۋرس جۇمىسىنىڭ تەحنيكالىق توقتاتىلۋى جوبانىڭ ەلورداداعى تسيفرلاندىرۋ جانە مەملەكەتتىك قىزمەتتەر باسقارماسىنا بەرىلۋىمەن بايلانىستى, دەپ حابارلايدى Egemen.kz نۇر-سۇلتان اكىمدىگىنىڭ رەسمي سايتىنا سىلتەمە جاساپ.
جۇمىس نۇر-سۇلتان قالاسى اكىمدىگىنىڭ قاۋلىسى مەن حاتتامالىق تاپسىرماسىنا سايكەس جۇرگىزىلۋدە.
ورتالىق كليەنتتەرىنە كورسەتىلگەن قىزمەتتەردىڭ ناتيجەلەرىن ساقتاۋ ءۇشىن 30 ساۋىرگە دەيىن جەكە كابينەتتەرىندەگى بار مالىمەتتەردى, ونىڭ ىشىندە شارتتاردى, اكتىلەردى, تەحنيكالىق شارتتاردى جۇكتەۋ جانە ساقتاۋ ۇسىنىلادى.
ورتالىقتىڭ كليەنتتەرى كورسەتىلگەن قىزمەت ناتيجەسىنىڭ ەكىنشى داناسىن تىكەلەي قىزمەت كورسەتۋشىلەردەن الا الادى.
ءبىرىنشى مامىردان كەيىن تۇرعىن ءۇي-كوممۋنالدىق سەكتور ۇيىمدارىنىڭ قىزمەتتەرىن الۋعا بايلانىستى بارلىق ماسەلەلەر بويىنشا تۇرعىندار «نۇر-سۇلتان قالاسىنىڭ تسيفرلاندىرۋ جانە مەملەكەتتىك قىزمەتتەر باسقارماسى» مم-گە جۇگىنۋلەرى كەرەك.