ەلىمىزدە حالىق جەكە يگىلىگى ءۇشىن العان كرەديتتىڭ كولەمى 32,5 پايىزعا ارتىپ وتىر. بۇل تۋرالى قر ۇلتتىق بانكىنىڭ توراعاسى عالىمجان ءپىرماتوۆ ءمالىم ەتتى, دەپ حابارلايدى Egemen.kz.
«بيىلعى ءبىرىنشى توقساننىڭ قورىتىندىسى بويىنشا, قازاقستاندا ىشكى جالپى ءونىمنىڭ ءوسۋى 3-4% قۇرادى. قاڭتار وقيعاسىنان كەيىن ياعني اقپاننان باستاپ ەكونوميكانىڭ كوپتەگەن سالاسىندا وڭ ءۇردىس بايقالدى. بازالىق مولشەرلەمەنىڭ قازىرگى دەڭگەيى ەكونوميكانىڭ ورنىقتى ءوسۋى ءۇشىن قاجەتتى العىشارت جاسايدى دەپ كۇتەمىز. ەكونوميكالىق بەلسەندىلىك كرەديتتەۋدىڭ كولەمىنە قاراي بەكي ءتۇستى. ماسەلەن, ءبىرىنشى توقساندا ەكونوميكاعا بەرىلگەن جاڭا كرەديتتەردىڭ كولەمى وتكەن جىلدىڭ وسى كەزەڭىمەن سالىستىرعاندا 25,3%-عا جوعارى. ونىڭ ىشىندە بيزنەسكە بەرىلگەن كرەديتتەردىڭ كولەمى 19,6%-عا, حالىققا بەرىلگەن كرەديتتەردىڭ كولەمى 32,5%-عا ۇلعايدى», دەدى عالىمجان ءپىرماتوۆ ۇلتتىق بانكتە وتكەن ءباسپاسوز ءماسليحاتىندا.
بانك باسشىسىنىڭ ايتۋىنشا, بازالىق ستاۆكانى كوتەرۋ كرەديت بەرۋ تالابىنا ەش اسەر ەتپەيدى.
«بۇدان بىلاي بانك سەكتورى الەۋەتتى بىرىگۋلەر مەن قوسىلۋلارعا, سونداي-اق حالىقتىڭ تۇتىنۋشىلىق ارەكەتتەن جيناقتاۋ ارەكەتىنە اۋىسۋىنا بايلانىستى قالىپتاسقان جاعدايلار مەن وزگەرىستەرگە بەيىمدەلۋىن جالعاستىرادى. ەكونوميكانىڭ وڭ سەرپىنى جاعدايىندا فيسكالدىق ساياسات ارقىلى سۇرانىستى قوسىمشا ىنتالاندىرۋ جوسپارلانىپ وتىر, ول جۋىق ارادا پروينفلياتسيالىق قىسىمدى كۇشەيتەدى. رەسپۋبليكالىق بيۋدجەت شىعىستارى وتكەن ءۇش جىلدا ورتاشا ءوسۋ قارقىنى 16,7% بولعان كەزدە 2022 جىلى 23,6%-عا ءوسىپ وتىر», دەيدى ول.