بۇل تۋرالى بۇگىن ۇكىمەت وتىرىسىندا يندۋستريا جانە ينفراقۇرىلىمدىق دامۋ ءمينيسترى قايىربەك وسكەنباەۆ ايتتى, دەپ حابارلايدى Egemen.kz.
«بيىل 165 جوبا ىسكە قوسىلادى. ال قالعان 498 جوبا 2023-2026 جىلدارى جۇزەگە اسىرىلادى دەپ جوسپارلاپ وتىرمىز. وسى جىلى ىسكە اسىرىلىپ جاتقان جوبالاردىڭ ينۆەستيتسيالارىنىڭ جالپى كولەمى - 1,7 ترلن تەڭگە. كاپيتالدى بارىنشا قاجەت ەتەتىن, 820 ملرد تەڭگە كولەمىندەگى جوبالار اتىراۋ وبلىسىندا ىسكە اسىرىلادى. جوبالار سانىنىڭ از بولعاندىعىنا قاراماستان, اتاپ ايتساق 5 جوبا, ءبىر جۇمىس ورنىنا سالىنعان ينۆەستيتسيالار كولەمى 1 ملرد تەڭگەنى قۇرايدى. ينۆەستيتسيالاردىڭ ەڭ از كولەمى پاۆلودار وبلىسىنا تيەسىلى – 7,4 ملرد تەڭگە», دەدى ق. وسكەنباەۆ.
ونىڭ اتاپ وتۋىنشە, كاپيتالدى ەڭ از قاجەت ەتەتىن جۇمىس ورىندارىن قۇرۋ باتىس, سولتۇستىك قازاقستان, قوستاناي وبلىستارىندا بولادى. بۇل وڭىرلەردە ءبىر جۇمىس ورنىنا شامامەن 20-30 ملن تەڭگە جۇمسالادى.
«مەملەكەتتىك ورگاندار بولىنىسىندە جاعداي كەلەسىدەي: 2022 جىلى يندۋستريا جانە ينفراقۇرىلىمدىق دامۋ مينيسترلىگى 107 جوبانى, اۋىل شارۋاشىلىعى مينيسترلىگى 46 جوبانى, ەنەرگەتيكا مينيسترلىگى – 5 جوبانى جانە دەنساۋلىق ساقتاۋ مينيسترلىگى 7 جوبانى ىسكە اسىرۋعا جاۋاپتى. جوبالار تولىق قۋاتىمەن جۇزەگە اسىرىلعان كەزدە 2,5 ترلن تەڭگەنىڭ ءونىمى شىعارىلىپ, ەكسپورتتىڭ جالپى كولەمى 3,6 ملرد اقش دوللارىن قۇرايدى دەپ جوسپارلانۋدا», دەدى مينيستر.