باتىس قازاقستان وبلىسىندا جول جوندەۋ جۇمىستارىنىڭ كەشىگۋىنە بايلانىستى «QAZAVTOJOL «ۇك» اق جانە قر يدم اۆتوموبيل جولدارى كوميتەتىنىڭ قىزمەتكەرلەرى جاۋاپقا تارتىلدى, دەپ حابارلايدى Egemen.kz يدم ءباسپاسوز قىزمەتىنە سىلتەمە جاساپ.
«مەملەكەت باسشىسىنىڭ باتىس قازاقستان وبلىسىنداعى جولداردى جوندەۋ بويىنشا تاپسىرماسىن ۋاقىتىلى ورىنداماعانى ءۇشىن «QAZAVTOJOL «ۇك» اق بقو فيليالىنىڭ ديرەكتورى ءامىر كارىمباەۆ جۇمىستان بوساتىلدى. بۇدان باسقا اكىمشىلىك سيپاتتاعى شارالار QAJ ورتالىق اپپاراتى مەن يندۋستريا جانە ينفراقۇرىلىمدىق دامۋ مينيسترلىگىنىڭ اۆتوموبيل جولدارى كوميتەتىنىڭ باسشىلىقتاعى بىرقاتار قىزمەتكەرى مەن ماماندارىنا قاتىستى قولدانىلدى», دەلىنگەن حابارلامادا.
بۇعان دەيىن اتالعان سەبەپتەرگە بايلانىستى يندۋستريا جانە ينفراقۇرىلىمدىق دامۋ ۆيتسە-ءمينيسترى بەرىك كاماليەۆ قىزمەتىنەن شەتتەتىلگەن بولاتىن.