بۇل تۋرالى تسيفرلىق دامۋ, يننوۆاتسيالار جانە اەروعارىش ونەركاسىبى ءمينيسترى باعدات مۋسين ءىnstagram پاراقشاسىندا جاريالادى, دەپ حابارلايدى Egemen.kz.
بۇگىن باعدات مۋسين حالىقارالىق تۇركى اكادەمياسىنىڭ پرەزيدەنتى, «ەگەمەن قازاقستان» اق باسقارما توراعاسى دارحان قىدىرالى جانە تۇركى اكادەمياسىنىڭ ۆيتسە-پرەزيدەنتى فيزۋلي مادجيدليمەن كەزدەستى. كەزدەسۋ بارىسىندا تۇركى الەمىنىڭ ينتەرنەتتەگى يدەنتيفيكاتسياسى تۋرالى اڭگىمە قوزعالدى.
كەيىن مينيستر اڭگىمە بارىسىندا تالقىلانعان بىرنەشە ماسەلەنى كوپشىلىكتىڭ نازارىنا ۇسىندى. «بىرىنشىدەن, تۇركى الەمى مۇراسىنىڭ قورى – «اتالار ميراسى» پورتالىنىڭ اياسىن كەڭەيتۋ. قازاق, تۇرىك, اعىلشىن جانە ورىس تىلدەرىندە مالىمەت بەرەتىن پورتالدا تۇركىتىلدەس حالىقتاردىڭ, ۇلىستار مەن ەتنيكالىق توپتاردىڭ ەجەلگى زاماننان بۇگىنگە دەيىنگى رۋحاني مۇرالارى توپتاستىرىلعان. ەكىنشىدەن, تۇركى الەمىنىڭ ەنتسيكلوپەدياسىن جاساۋ. تاريحى تەرەڭدە جاتقان كونە تۇركىنىڭ دەرەكتەر بازاسى قوماقتى بولارى ءسوزسىز. بۇل ورايدا «تۇركىستان ەنتسيكلوپەدياسىنىڭ» 3 تومدىعى بار جانە تۇركىتىلدەس ەلدەردىڭ ورتاق ەنتسيكلوپەدياسىن جاساۋ وسى ەڭبەكتىڭ نەگىزىندە جالعاساتىن بولادى. ۇشىنشىدەن, تۇركى الەمىندەگى عىلىمي جۇمىستاردىڭ تسيفرلىق نۇسقاسىن جاساۋ. بۇل ورايدا, راسىمەن, قازىرگى ۋاقىتتا تۇركىتىلدەس حالىقتاردىڭ عىلىمي زەرتتەۋلەرىنىڭ ورتاق قورى جوق. ناتيجەسىندە, عىلىم الەمىندە ءجيى كەزدەسەتىن پلاگيات پروبلەماسى دا ءورشىپ تۇرعانى بەلگىلى. سوندىقتان عىلىمي ديسسەرتاتسيالار مەن ارحيۆتەردى تسيفرلاندىرۋ پروتسەسىنە تۇركىتىلدەس ەلدەردى جۇمىلدىرىپ, ورتاق ماقساتتاعى جوباعا اينالدىرساق, جاقسى بولار ەدى. ارينە, تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگى ءتۇبى ءبىر تۇركى حالىقتارىنىڭ بىرلىگىن بەكەم ەتەر باستامالاردى قولدايدى جانە تۇركى اكادەمياسىمەن بۇل باعىتتاعى ىنتىماقتاستىقتى نىعايتامىز. سەبەبى تاريحىمىزدى تۇگەندەپ, ەلدىگىمىزدى ەڭسەلى ەتىپ, رۋحاني مۇرامىزدى وسكەلەڭ ۇرپاققا تابىستاۋ – ءاربىرىمىزدىڭ ازاماتتىق پارىزىمىز», دەپ جازدى مينيستر الەۋمەتتىك جەلىدە.