داۋىلدى نوسەر سالدارىنان كەنتاۋداعى الەۋمەتتىك نىساندار مەن تۇرعىن ۇيلەردىڭ شاتىرى ۇشىپ كەتتى. قازىر جالپى شىعىن كولەمى ەسەپتەلىپ, قيراعان نىسانداردى قالىپقا كەلتىرۋ جۇمىستارى ءجۇرىپ جاتىر, دەپ حابارلايدى Egemen.kz.
نوسەر جاۋىننان كەنتاۋ قالاسىندا شىعىن كوپ بولعان. قالادا 5 ەلەكتر باعانىنىڭ زاقىمدانۋىنان تۇرعىنداردىڭ 10 پايىزى جارىقسىز قالدى. 1 مەكتەپ پەن 1 بالاباقشانىڭ شاتىرى ۇشىپ كەتتى. 4 كولىككە اعاش قۇلاپ, زاقىم كەلگەن. ەكى كوپقاباتتى تۇرعىن ءۇيدىڭ دە شاتىرى قۇلادى. قالالىق پوليتسيا ءبولىمىنىڭ عيماراتىنا دا زاقىم كەلگەن. قازىر قالانى قۇلاعان اعاشتاردان تازارتۋ جۇمىستارى ءجۇرىپ جاتىر.
«قالاداعى «جۇلدىز» بالاباقشاسىنىڭ شاتىرىن قالىپقا كەلتىرگەنشە, بالالاردى بالاباقشاعا قابىلداماۋ جونىندە نۇسقاۋلىق بەرىلدى. بارلىعى بالالاردىڭ قاۋىپسىزدىگى ءۇشىن. №24-ءشى مەكتەپتىڭ دە شاتىرىنىڭ قۇلاۋىنا بايلانىستى بالالاردى وقىتۋ/وقىتىلماۋ بويىنشا قوسىمشا اقپارات بەرىلەدى», دەلىنگەن قالا اكىمدىگى تاراتقان حابارلامادا.
قازىر قالا اكىمدىگىندەگى جەدەل جەلى ارقىلى تۇرعىندار تاراپىنان حابارلامالار تۇسكەن جاعدايدا قولعا الىناتىن شۇعىل ءىس-شارالارعا دايىندىق ءجۇرىپ جاتىر.
ايانا توعانبەك