توسىن ناتيجەلەر تىركەلدى
فۋتبولدان قازاقستان پرەمەر-ليگاسىنىڭ جەتىنشى تۋرىنىڭ بىرنەشە ماتچىندا توسىن ناتيجەلەر تىركەلدى.
«استانا» ءوز الاڭىندا توپ باسىنداعى «كاسپيدىڭ» قاقپاسىنا جاۋاپسىز ءتورت دوپ سالدى – 4:0. «اتىراۋ» «توبىلدى» قابىلدادى. ءبىرىنشى كەزەڭدە ەسەپ اشىلعان جوق. ۇزىلىستەن سوڭ اندريا فيليپوۆيچ ءدۋبلدىڭ اۆتورى اتانسا, قوستانايلىقتار ساپىنان يگور سەرگەەۆ مەرگەندىك تانىتتى – 2:1. كەلەسى كۇنى «ورداباسى» مەن «قىزىلجار» اراسىندا وتكەن كەزدەسۋدە 3:1 ەسەبى تىركەلدى. «قايرات» الماتىدا «تۇراننان» جەڭىلدى – 0:1. وسىلايشا, تۇركىستاندىقتار وسى چەمپيوناتتاعى العاشقى گولىن سوعىپ, العاشقى جەڭىسىنە قول جەتكىزدى. ال «قايرات» ءبىرىنشى رەت ءسۇرىنىپ, جەكە-دارا كوش باستاۋ مۇمكىندىگىنەن ايىرىلدى. وزگە ماتچتاردا مىناداي ەسەپتەر تىركەلدى: «شاحتەر» – «اقجايىق» 0:1, «اقتوبە» – «ماقتاارال» 1:0, «اقسۋ» – «تاراز» 1:2.
جەتى تۋردان كەيىن 13 ۇپايى بار «استانا» مەن «كاسپي» كوش باستاپ كەلەدى. ولاردان ءبىر ۇپايى كەم «قايرات» ءۇشىنشى ورىندى قاناعات تۇتۋدا. كوش سوڭىندا – «ماقتاارال» مەن «اقسۋ». ولار ءتورت ۇپايدان ەنشىلەۋدە.
«كانەلو» GGG-دان وزدى
ايگىلى Boxrec.com سايتى الەمدەگى ەڭ ۇزدىك كاسىپقوي بوكسشىلاردىڭ رەيتينگىن جاريالادى. جاڭارتىلعان تىزىمىندە ساۋل الۆارەس كوش باستاپ تۇر.
جۋىردا عانا جارتىلاي اۋىر سالماققا اۋىسقان 31 جاستاعى مەكسيكانىڭ ماقتانىشى شارشى الاڭدا 60 كەزدەسۋ وتكىزىپ, سونىڭ 57-سىندە جەڭىس تويىن تويلادى. ول تەك ءبىر رەت قانا جەڭىلدى. 39 باسەكەنى مەرزىمىنەن بۇرىن اياقتادى. تارقاتىپ ايتساق, 2013 جىلى كانەلو امەريكالىق فلويد مەيۆەزەرگە ۇپاي سانىمەن ۇتىلدى. 2016 جىلى ءوزىنىڭ وتانداسى حورحە يارەس جانە 2017 جىلى قازاقستاندىق گەننادي گولوۆكينمەن تەڭ ءتۇستى. ءدال سول جەرلەسىمىز ۇزدىكتەر رەيتينگىندە ەكىنشى ورىندى يەلەنۋدە. تاياۋدا عانا 40 جاسقا تولعان GGG 44 مارتە رينگكە كوتەرىلىپ, 42 رەت باسىمدىق تانىتتى. 37 قارسىلاسىن ۇرىپ جىقتى. ءبىر رەت ۇتىلىپ, ءبىر كەزدەسۋ تەڭ اياقتالدى. ءۇشىنشى ورىندا – تەرەنس كروۋفورد. 34 جاستاعى اقش-تىڭ ارلانى 38 جەكپە-جەكتىڭ بارلىعىن ءساتتى اياقتاپ, 29 باسەكەدە نوكاۋت تىركەلدى.
سونداي-اق «توپ-10» بوكسشىنىڭ قاتارىندا تايسون فيۋري ( ۇلىبريتانيا), ەرولل سپەنس (اقش), الەكساندر ۋسيك (ۋكراينا), ەنتوني دجوشۋا ( ۇلىبريتانيا), دەونتەي ۋايدلەر (اقش), كاللۋم سميت ( ۇلىبريتانيا) جانە ارتۋر بەتەربيەۆ (رەسەي) سىندى ساڭلاقتار بار.
شەشۋشى تۇستا ءسۇرىندى
قازاقستاندىق تەننيسشى يۋليا پۋتينتسەۆا تۇركيانىڭ ىستانبۇل قالاسىندا ءوتىپ جاتقان جۇلدە قورى 239 477 اقش دوللارىن قۇرايتىن WTA ءتۋرنيرىنىڭ فينالىنا شىعا المادى.
اتالعان جارىستىڭ العاشقى اينالىمدارىندا دانيالىق ماگدا لينەتت پەن شۆەتسيالىق رەبەككا پاتەرسوندى شاڭ قاپتىرعان جەرلەسىمىز شيرەك فينالدا WTA تىزىمىندە 41-ورىندى ەنشىلەگەن اۋستراليا وكىلى ايلا ءتومليانوۆيچتى تىزە بۇكتىردى – 5:7, 6:2, 6:4. جارتىلاي فينالدا يۋليانىڭ جولى اناستاسيا پوتاپوۆامەن قيىستى. الەمدىك رەيتينگتە نەبارى 122-ورىندا تۇرعان 22 جاستاعى رەسەي تەننيسشىسىنىڭ بۇعان دەيىن جارق ەتىپ كوزگە تۇسكەن كەزى ەسىمىزدە جوق. دەسەك تە بۇل كەزدەسۋدە پۋتينتسەۆا قاتەلىككە ءجيى بوي الدىرىپ, 6:2, 2:6, 2:6 ەسەبىمەن پوتاپوۆاعا جول بەردى.
بارسەلونادا ا.بۋبليك ءۇشىنشى كەزەڭگە وتە الماسا, شتۋتگارتتاعى WTA-500 ءىرى تۋرنيرىندە ە.رىباكينا دا ەكىنشى قارسىلاسىنا ەسە جىبەرگەن بولاتىن. ال شىمكەنتتە وتكەن TF World Tennis Tour W15 تۋرنيرىندە رەسەيلىك اناستاسيا سۋحوتينامەن جۇپ قۇرعان جىبەك قۇلامباەۆا باس جۇلدەنى ولجالادى.