قايتىس بولعان 13 ازاماتتىڭ وتباسى مۇشەلەرىنە «قازاقستان حالقىنا» قورى اقشالاي تولەمدەر جىبەردى, ولاردىڭ جازاتايىم قۇربان ەكەنىن قۇزىرلى ورگان راستادى, دەپ حابارلايدى Egemen.kz.
«قاڭتار وقيعاسى كەزىندە اۋىر جاراقات العان 2 بالانىڭ اتا-اناسىنا اقشالاي تولەمدەر جىبەرىلدى. ءبىر بالا وق جاۋعان كولىكتە وتباسىمەن بىرگە, ال ەكىنشى بالا وق اتىلعان كولىكتە اكەسىمەن بىرگە بولعان. تولەمدەر زارداپ شەككەن بالالار تۋرالى مالىمەتتەر تۇسكەننەن كەيىن جۇرگىزىلدى», دەلىنگەن «قازاقستان حالقىنا» قورىنىڭ ءباسپاسوز قىزمەتىنىڭ حابارلاماسىندا.
قوردىڭ دەرەگى بويىنشا, ساناتتاعى جابىرلەنۋشىلەرگە جولدانعان جالپى تولەم سوماسى 97 ملن تەڭگە بولدى.
«قازا تاپقانداردىڭ وتباسىنا 7 ميلليون تەڭگەدەن, اۋىر جاراقات العان بالالاردىڭ تۋىستارىنا 3 ميلليون تەڭگەدەن تولەندى», دەلىنگەن حابارلامادا.
سونداي-اق قور وكىلدەرى قامقورشىلىق كەڭەستىڭ شەشىمىمەن قاڭتار وقيعاسىنىڭ كەزدەيسوق قۇربانى بولعان بارلىق قازا تاپقان ازاماتتاردىڭ وتباسىلارىنا قۇزىرلى ورگانداردان تىزىمدەرى ناقتىلانعاننان كەيىن تولەماقى بەرىلەتىنىن ەسكە سالدى.