ازيانىڭ الدى بولدىق

سارسەنبىدە تاعى بەس سالماق دارەجەسىنىڭ جۇلدەلەرى ساراپقا سالىندى. بوز كىلەمدە بەلدەسكەن ورەندەرىمىزدىڭ اراسىنداعى ەڭ تانىمالى مەيىرجان شەرماحانبەت ەكەنى ءسوزسىز. 67 كيلو سالماقتا سىنعا ءتۇسىپ جۇرگەن ول وسىدان ءتورت جىل بۇرىن ورەلى ونەرىمەن كوپشىلىك نازارىن وزىنە اۋدارعان ەدى. اتاپ ايتساق, 2018 جىلى ماجارستاننىڭ باس شاھارى – بۋداپەشتتە جالاۋى جەلبىرەگەن الەم چەمپيوناتىندا 20 جاسار جاس دارىن قولا مەدالدى موينىندا جارقىراتتى. ودان كەيىن دە شەرماحانبەت تالاي بايراقتى باسەكەدە ۇلتتىق كوماندامىزدىڭ نامىسىن قورعادى.

موڭعوليانىڭ استاناسىندا مەيىرجان ءوزىنىڭ مىقتى­لىعىن تۇبەگەيلى مويىنداتتى. تۇ­ساۋكەسەر كەزدەسۋىندە ۇندىس­تان­­دىق ساحين ساحراۆاتتى قا­مىر­شا يلەپ, تازا جەڭىسكە قول جەتكىزدى – 8:0. جارتىلاي فينالدا ازيا بىرىنشىلىگىنىڭ ەكى دۇركىن جۇلدەگەرى, وزبەكستاندىق ماحمۋد باحشيللوەۆتان باسىم ءتۇستى – 6:3. فينالدا الەم چەمپيوناتى مەن ازيا ويىندارىندا قاتارىنان ەكى مارتە تەڭدەسسىز دەپ تانىلىپ, قۇرلىق چەمپيوناتىندا ءۇش رەت توپ جارعان ريۋ حان سۋمەن كۇش سىناستى. وسىدان تۋرا ءۇش جىل بۇرىن ازيا بىرىنشىلىگىنىڭ اقتىق سايىسىندا ءدال وسى ساڭلاق ءبىزدىڭ شەرماحانبەتتى سان سوقتىرعان ەدى. ال بۇل جولى قازاقتىڭ ۇلى وڭتۇستىك كورەيادان كەلگەن داڭق­تى بالۋاننىڭ تاس-تالقانىن شىعارىپ, سياندا جىبەرگەن ەسەسىن ەسەلەپ قايىردى – 11:3.

72 كيلو سالماقتاعى ابىلاي­حان امزەەۆ پەن 82 كيلو سال­­ماق-­

تاعى دياس قالەن اقتىق سىن­عا دەيىن القىنباي جەتتى. العا­شىندا جا­پونيالىق شوگو تا­كاحاشي مەن كورەيالىق لي جيۋن­دى جەڭگەن ابىلايحاننىڭ التىن الۋعا تاماشا مۇمكىندىگى بولدى. شەشۋشى تۇستا قان­داسىمىز موحامماد رەزا موح­تاريگە قارسى باسەكەدە كەسەك ءادىس قول­دانىپ, بىردەن ءتورت ۇپاي ەن­شىلەدى. بىراق «ەرەجە بۇزدى» دەگەن جەلەۋمەن تورەشىلەر امزەەۆ­تىڭ قولدانعان ءادىسىن ەسەپكە المادى. ودان كەيىن پارسى ەلىنىڭ وكىلى قاتەلىككە بوي الدىرعان جوق. قاجەتتى ۇپاي­دى قورجىنعا سالعان ول جەڭىس تۇعىرىنىڭ ەڭ بيىك ساتىسىنا كوتەرىلدى.

باستاپقى باسەكەلەرىن وتە قارقىندى باستاعان دياس قالەن وزبەكستاندىق مۋحاممادقادىر راسۋلوۆتى 9:1 جانە جاپونيالىق يۋيا وكادجيمانى 9:0 ەسەبىمەن ويسىراتا ۇتتى. فينالدا قازاق جىگىتىنىڭ جولى راسۋل سادەگ گارم­سيريمەن قيىستى. بۇل تارتىس ءبىر عانا ۇپاي ايىرماشىلىعىمەن يران وكىلىنىڭ پايداسىنا شە­شىلدى – 3:4. جالپى كۇمىس مە­دالدى مو­يىن­دارىنا ىلگەن بۇل جىگىتتەرگە ەش وكپە جوق. ەكەۋىنىڭ دە ۇلتتىق كوماندامىزدىڭ جەي­دەسىن كيگەنى كەشە عانا. سوعان قارا­ماستان, ابى­لايحان مەن دياس كورەر­مەن­دەر­دىڭ كوڭىلىنەن شىعاتىنداي ونەر كورسەتتى.

60 كيلو سالماقتاعى ەرنۇر فيداح­مەتوۆ قولا مەدالدى يەلەن­دى. جارتىلاي فينالدا ول الەم چەمپيوناتىنىڭ ەكى دۇركىن كۇمىس جۇلدەگەرى, الەم كۋبوگىنىڭ يەگەرى, قىرعىزستاندىق جولامان شەرشەنبەكوۆكە ەسە جىبەرسە, ءۇشىنشى ورىن ءۇشىن تارتىستا موڭ­عوليالىق بالجيننيام تسەۆەەن­راۆدان ايلاسىن اسىردى. 97 كيلو سالماقتاعى سانجار سەرىكقاننىڭ دا قولا مەدال الۋعا مۇمكىندىگى بولدى. بىراق شەشۋشى تۇستا ول كۇنشىعىس ەلىنىڭ وكىلى تاكاكيرو تسۋرۋداعا جول بەردى.

وسىلايشا, ۇلانباتىردا بەلدەسكەن 10 جەرلەسىمىزدىڭ توعىزى جەڭىس تۇعىرىنا كوتەرىلدى. تار­قاتىپ ايتساق, 2 التىن, 5 كۇمىس جانە 2 قولانى ەنشىلەدىك. كۇرەس تۇ­رلەرىندە كوماندالىق ەسەپتىڭ قورىتىندىسىن شىعارۋ جۇيەسى وزگەشە ەكەنى وزدەرىڭىزگە ءمالىم. بۇل رەتتە بارلىق بالۋاننىڭ ناتيجەسى ەسەپكە الىنىپ, جالپى ۇپاي سانى شىعارىلادى. بۇل رەتتە قازاقستان قۇراماسى بارلىق قارسىلاستارىنان قارا ءۇزىپ, كوماندالىق سايىستا الدىنا جان سالمادى. وسى ورايدا جارىستى باسىنان اياعىنا دەيىن تاپجىلماي تاماشالاپ, ءبىزدىڭ بالۋاندارعا بارىنشا دەمەپ, قولداۋ كورسەت­كەن رەسپۋب­ليكالىق كۇرەس فەدە­راتسيا­سىنىڭ پرەزيدەنتى داۋلەت تۇرلى­حانوۆتىڭ ەرەن ەڭبەگىن اتاپ وتكەن ءجون. سونداي-اق وسى الاشتىڭ ماقتان تۇتار ازاماتى ءبىراز جىلدان بەرى ازيا كۇرەس فەدەراتسياسىن دا باسقارىپ وتىرعانىن دا ايتا كەتكەن ابزال.

ۇلانباتىرداعى ازيا چەمپيوناتىندا نەبارى جەتى مەملەكەتتىڭ گرەك-ريم كۇرەسى شەبەرلەرى عانا جەڭىس تۇعىرىنا كوتەرىلدى. ولار – يران (4 التىن+1 كۇمىس+2 قولا), قىرعىزستان (3+0+3), جاپونيا (1+0+5), وزبەكستان (0+2+3), وڭتۇس­تىك كورەيا (0+2+1) جانە ءۇندىس­تان (0+0+4) قۇرامالارى.