قر سىرتقى ىستەر مينيسترلىگىنىڭ رەسمي وكىلى ايبەك سمادياروۆ قازاقستان رەسپۋبليكاسىنىڭ ۋكرايناداعى ەلشىلىگىنىڭ جۇمىسىنا قاتىستى پىكىر ءبىلدىردى, دەپ حابارلايدى Egemen.kz.
2022 جىلى ناۋرىزدا ۋكرايناداعى قازاقستاننىڭ ەلشىلىگى ۋاقىتشا لۆوۆ قالاسىنا كوشىرىلدى. سونداي-اق ەكى قىزمەتكەرىمىز پولشا مەن مولدوۆاداعى ءبىزدىڭ ەلدىڭ ەلشىلىكتەرىنە ۋاقىتشا ىسساپارعا جىبەرىلدى.
ەلشى دارحان قالەتاەۆ جاقىندا كەڭەسۋ ءۇشىن قازاقستاندا بولىپ, ونىڭ قورىتىندىسىنا سايكەس, ەندىگى كەزەڭدە ەكى قىزمەتكەردى – اسكەري اتتاشە مەن كەزەكشى كومەندانتتى كيەۆ قالاسىنا قايتارۋ تۋرالى شەشىم قابىلداندى.
«ەلشىمىز بەن ونداعى باسقا قىزمەتكەرلەر لۆوۆ پەن كيەۆتىڭ ەكى اراسىندا جۇرەدى, ويتكەنى كيەۆتەگى ەلشىلىگىمىزدىڭ كەڭسە عيماراتى قاجەتتى جۇمىس پەن كونسۋلدىق قىزمەت كورسەتۋگە بەيىمدەلگەن, سونىمەن قاتار قۇجات اينالىمى جانە تاعى باسقاسى ءۇشىن بارلىق قاجەتتى تەحنيكالىق كوممۋنيكاتسيالارعا يە», دەدى قر ءسىم رەسمي وكىلى ايبەك سمادياروۆ.
ەلشى قىزمەتكەرلەرىنىڭ لۆوۆقا كەلىپ ۋاقىتشا ورنىعۋى ءبىزدىڭ ازاماتتارىمىز بەن قانداستارىمىزدى وسى قالادان ەۆاكۋاتسيالاۋ پروتسەسىنىڭ جالعاسىپ جاتۋى, سونىڭ ىشىندە ولاردىڭ قاۋىپسىزدىگىن قامتاماسىز ەتۋ ماسەلەسىمەن دە تۇسىندىرىلەدى.
قر ەلشىلىگىن كيەۆكە تولىقتاي قايتا ورنالاستىرۋ تۋرالى تۇپكىلىكتى شەشىمدى ەلشىنىڭ ۇسىنىسى بويىنشا قر سىرتقى ىستەر ءمينيسترى قابىلدايدى.
ايانا توعانبەك