كوكشەتاۋ دەسە كوز الدىڭا سامساعان اق بالتىر قايىڭ مەن قىسى-جازى ءوڭى وزگەرمەيتىن قاراعايلى ورمان ەلەستەيتىنى بار. ءبىر شەتى مەن ءبىر شەتى كۇنشىلىك جولدى قۇرايتىن ولكەنىڭ ءوڭىن كەلتىرىپ جاتقان ورمان شىن مانىندە كوپ تە ەمەس.
باردى باعالاي بىلگەن ابزال. ورمانعا تونەتىن قاۋىپ – ماڭايىن سۋماڭداعان قىزىل تىلىمەن جايپايتىن دالا ءورتى. دالا ءورتىنىڭ تۋىنداۋ سەبەبى بەلگىلى. اۋىل شارۋاشىلىعى قۇرىلىمدارى ەگىستىك القابىنىڭ ۇستىندەگى كۇزدەن قالعان ەسكى ساباندى بەلگىلەنگەن جەرگە جەتكىزۋدى ارتىق شىعىن ساناپ, ورتەپ جاتىر. مالساق قاۋىم جايىلىم ۇستىندەگى ءولى قاۋدى جاعىپ جىبەرسەك, ورتەڭگە وسكەن ءشوپ مول بولادى دەپ تۇيسىنەدى. بارلىعى شارۋا قامى بولعانىمەن, زيانىن ورماندى القاپ كورمەك. توتەنشە جاعدايلار دەپارتامەنتىنىڭ قىزمەتكەرلەرى دالا ءورتىنىڭ الدىن الۋ باعىتىندا جۇمىس جۇرگىزۋدە. تاياۋدا وبلىس ورتالىعىنىڭ ىرگەسىندە ەسكى قاۋ ءشوپتى ورتەپ جۇرگەن ەكى ادام ۇستالدى. جەلدى كۇنى جالعىز شىرپى ادام ايتقىسىز شىعىن اكەلۋى مۇمكىن ەكەندىگىن ەسكەرە بەرمەگەن ەكەۋىنە ايىپپۇل سالىندى. ولار جوعارىدا ايتقانىمىزداي, ەسكى ءشوپتى ەرتەرەك جاعىپ جىبەرسەك, ورتەڭگە ءشوپ جاقسى وسەدى دەپ اقتالماق.
«بۇقپا» ورمان شارۋاشىلىعى ەل ىشىندە ءتۇسىندىرۋ جۇمىستارىن جۇرگىزۋدە. وبلىستىق تابيعي رەسۋرستار جانە تابيعات پايدالانۋدى رەتتەۋ باسقارماسى, جەرگىلىكتى پوليتسيا قىزمەتى, وبلىستىق ورمان شارۋاشىلىعى جانە جانۋارلار دۇنيەسى اۋماقتىق ينسپەكتسياسى 58 جەدەل توپ قۇرىپ, رەيد وتكىزدى. وتكەن اپتادا وسىنداي جۇمىس ناتيجەسىندە ءورت سالىپ, تابيعاتقا زالال كەلتىرگەن بىرنەشە ادام ۇستالدى.
ءورتتىڭ ازىن-اۋلاق ورماندى ويسىراتىپ كەتۋى ابدەن مۇمكىن. بىلتىر وبلىستا 123 ورمان ءورتى ورىن الىپ, قىمبات تابيعي قازىنامىزعا قانشاما شىعىن كەلدى. التى رەت دالا ءورتى تۇتانسا, 140 مارتە قاۋ ءشوپ جانىپ, ءورت سوندىرۋشىلەردى ابىگەرگە ءتۇسىردى. بيىل دالانىڭ ديدارى كەپپەي جاتىپ ءبىر رەت ورمان ورتەنىپ, ءۇش مارتە دالاداعى قاۋ ءشوپ جاندى. كوكشەنىڭ كوركى بولىپ تۇرعان كوكوسكىن كۇلگە اينالماسىن دەسەڭىز, اباي بولىڭىزشى, اعايىن!
اقمولا وبلىسى