ەۋرازيالىق ەكونوميكالىق وداققا مۇشە ەلدەر ساۋدا-ساتتىق كەزىندە رەسەي ءرۋبلىن دە قولدانادى. سونداي-اق ءبىز حالىقارالىق ۆاليۋتادان باس تارتپايمىز, دەپ مالىمدەدى ۇلتتىق ەكونوميكا ءمينيسترى الىبەك قۋانتىروۆ.
«ەەو-نا مۇشە ەلدەر كەيبىر تاۋار بويىنشا رەسەي ءرۋبلىن قولدانادى. شامامەن 60% عوي دەيمىن. سەبەبى ول رەسەي. قاي ەلدەرمەن ءبىز ساۋدا-ساتتىق كەزىندە اقش دوللارىن قولدانامىز؟ جالپى دوللاردان, الەمدىك رەزەرۆتىك ۆاليۋتادان باس تارتۋ جوسپارىمىزدا جوق», دەدى ءا. قۋانتىروۆ.
سونىمەن قاتار ۇلتتىق ەكونوميكا ءمينيسترى قازاقستاندىقتارعا قارجىسىن ديففەرەنتسياتسيالاۋعا كەڭەس بەردى. ايتۋىنشا قارجىنى تەڭگە دەپوزيتىندە ساقتاۋ ءتيىمدى.
ء«اربىر قازاقستاندىق ءۇشىن اقشاسىن تەڭگەمەن دەپوزيتتە ساقتاعان ءتيىمدى شىعار. قاراجاتتى جاقىن ۋاقىتتا الۋدى تالاپ ەتپەيتىن دەپوزيتتەردى تەڭگەمەن ساقتاۋعا بولادى. اقشا قولدانباعان كەزدە كوبەيە بەرەتىندەي. نەگە تەڭگە دەگەن سۇراق تۋىندايتىن شىعار. ويتكەنى مولشەرلەمەسى دوللارعا قاراعاندا جوعارى. ازاماتتار دوللار نىعايعان سايىن ۇتىلۋى مۇمكىن. بىزدە دوللار دەپوزيتتەرىنىڭ پروتسەنتى تومەن», دەپ كەڭەس بەردى ول.
ءارى قاراي ول قاراجاتتى ءبىر اكتيۆتە ساقتاماۋعا كەڭەس بەردى.
«جەكە ءوزىم كريپتوۆاليۋتاعا اقشا سالمايمىن. وعان اقشا سالۋ ءۇشىن بەلگىلى ءبىر ۋاقىت پەن قۇزىرەتتىلىك كەرەك شىعار. پرەزيدەنت اكىمشىلىگىندە جۇمىس ىستەپ جۇرگەنىمدە وسى ماسەلەلەرگە قىزىعۋشىلىق تانىتقان ەدىم. ونىڭ ۇستىنە قازىر ماينەرلەرگە سالىق كوبەيتىلمەك. كريپتوۆاليۋتانىڭ وسكەنى بيۋدجەتكە جاقسى. ينۆەستيتسيامەن تاۋەكەلشىلدىك قاتار جۇرەدى. كريپتوۆاليۋتادا ناقتى اكتيۆ جوق. ءسىز ونى اميانعا سالىپ الىپ جۇرە المايسىز. كريپتوۆاليۋتا سالىنعان ءاميانىڭىز قازاقستاننان الىس جەردە بولادى. سوندىقتان بارلىعىن ءبىر سەبەتكە سالماعان دۇرىس. ءتىپتى, كريپتوۆاليۋتانىڭ ىشىندە «بيتكوين», «لايتكوين» سەكىلدى ءارتۇرلى ءتۇرىن تاڭداۋ قاجەت. نارىقتا ترەند وزگەرىپ وتىرادى. ادامدار بىردەن كوپ اقشا جوعالتۋى مۇمكىن. كەيىن شاعىم ايتىپ جىلايدى», دەدى مينيستر.