بيىل جازدا ماجارستاننىڭ بۋداپەشت قالاسىندا سۋ سپورتىنان وتەتىن الەم چەمپيوناتىندا قازاقستاننىڭ ۆاتەرپولشىلارى كىمدەرمەن كەزدەسەتىنى بەلگىلى بولدى.
ەلىمىزدىڭ ەرلەر قۇراماسى D توبىندا ونەر كورسەتەدى. قارسىلاستارىمىز – اقش, اۋستراليا جانە سەربيا. وسىلاردىڭ اراسىنداعى ەڭ مىقتىسى سەربتەر ەكەنى ءسوزسىز. ولار سوڭعى بەس وليمپيا ويىندارىنىڭ بارلىعىنان ولجالى ورالدى. 2004 جىلى افينادا كۇمىس, 2008 جىلى بەيجىڭ مەن 2012 جىلى لوندوندا قولا السا, 2016 جىلى ريو-دە-جانەيرو مەن 2021 جىلى توكيودا توپ جاردى. الەم چەمپيوناتىندا ەكى مارتە دارا شىعىپ, تاعى بىرنەشە رەت جۇلدەگەرلەر قاتارىنان كورىندى. اقش تا وتە ازۋلى كوماندا. ولار وليمپيادادا توعىز رەت (1 التىن+4 كۇمىس+4 قولا) جەڭىس تۇعىرىنا كوتەرىلىپ, باسقا دا بايراقتى باسەكەلەردە ولجاعا كەنەلدى.
ايەلدەر اراسىنداعى سايىستا س توبىنا تۇسكەن جەرلەستەرىمىز برازيليا, اۋستراليا جانە جاڭا زەلانديامەن شەبەرلىك بايقاسادى. بۇل تورتتىكتىڭ اراسىنان جاسىل قۇرلىق وكىلدەرىن بولە-جارا اتاۋعا بولادى. ولار وليمپيا ويىندارىندا ءبىر التىن جانە ەكى قولا مەدال ولجالاعان.