سەناتتىڭ قارجى جانە بيۋدجەت كوميتەتىنىڭ دەپۋتاتتارى مەملەكەت باسشىسىنىڭ جولداۋىن ىسكە اسىرۋ اياسىندا بيۋدجەت پروتسەستەرىن «قايتا جۇكتەۋ» جانە بلوكتىق بيۋدجەتتى ەنگىزۋ ماسەلەلەرى بويىنشا ۋاكىلەتتى مەملەكەتتىك ورگاندار وكىلدەرىمەن كەزدەستى.
باسقوسۋدى العىسوزىمەن اشقان كوميتەت توراعاسى سەرىكباي ترۇموۆ قازىرگى كەزدە پرەزيدەنت العا قويعان مىندەتتەردى جۇزەگە اسىرۋ بويىنشا جۇمىستار جۇرگىزىلىپ جاتقانىن جانە جاقىن ارادا بيۋدجەت زاڭناماسىنا ءتيىستى تۇزەتۋلەر ۇسىنىلاتىنىن اتاپ ءوتتى.
سەناتور نۇرلان بەكەنوۆ كەزدەسۋ بارىسىندا بلوكقا بولىنەتىن بيۋدجەتتەگى نەگىزگى ەرەكشەلىكتەر تۋرالى ايتىپ بەردى. ول مۇنداي ءتاسىلدىڭ نەگىزگى قاعيداتى بيۋروكراتيانى بارىنشا ازايتۋ, بيۋدجەتتىك باعدارلامالار اكىمشىلەرىنە قاراجاتتى قايتا بولۋدە ەركىندىك بەرۋ جانە ۇزاق مەرزىمدى ماقساتتارعا باسا نازار اۋدارۋ ەكەنىن اتاپ ءوتتى. بۇل جۇيە ءاربىر مينيسترلىكتىڭ كوپ جىلعى شىعىستار جوسپارىن الۋعا نەگىزدەلۋگە ءتيىس, ول بويىنشا قاراجات ستراتەگيالىق باستامالار اراسىندا وزدىگىنەن قايتا بولىنەتىن بولادى. ياعني جۇيە مينيسترلىكتەر مەن مەكەمەلەرگە بيۋدجەتتى دەربەس باسقارۋ قۇقىعىن بەرەتىن بولادى.
«قازىرگى ۋاقىتتا بلوكتىق بيۋدجەتتىڭ جەكەلەگەن بولشەكتەرى عانا ەنگىزىلەتىن بولادى. ول ءۇشىن بيۋدجەتتىك باعدارلامالاردى ايتارلىقتاي ىرىلەندىرۋ, سونداي-اق بيۋدجەتتى بلوكتار بويىنشا قالىپتاستىرۋ كەرەك. سونىمەن قاتار شىعىس ءليميتىنىڭ كولەمىن ايقىنداۋ, بيۋدجەتتى قالىپتاستىرۋ جانە قارجىنى باسقارۋ تاسىلدەرىن قايتا قاراۋ قاجەت», دەدى سەناتور ن.بەكەنوۆ.
كەزدەسۋدە ەسەپ كوميتەتىنىڭ وكىلدەرى دە ءوز ۇسىنىستارىن ءبىلدىردى. ۇسىنىستاردىڭ قاتارىندا تەكسەرۋ كوميسسيالارىنا استانا, رەسپۋبليكالىق ماڭىزى بار قالالار, وبلىستار جانە قالالار بيۋدجەتتەرىنىڭ جوبالارىنا الدىن الا باعالاۋ جونىندەگى فۋنكتسيا بەرۋ تۋرالى دا ايتىلدى.