دۇنيەجۇزىلىك دەنساۋلىق كۇنىنە وراي وبلىس ورتالىعىنداعى تاۋەلسىزدىك الاڭىنا جۇزدەگەن بەلسەندى جاستار شىعىپ, جاتتىعۋ جاسادى. ومىردە كەزدەسەتىن توسىن جايلارعا تاپ بولعاندا تىعىرىقتان شىعۋعا قاجەتتى العاشقى مەديتسينالىق كومەك قالاي جاسالۋ كەرەكتىگىن ۇيرەندى.
تاڭسارىدەن كوپشىلىك كوڭىلىن وزىنە اۋدارعان, بۇرىن كوز ۇيرەنبەگەن مازمۇندى ءىس-شاراعا وبلىستىق سپورتتىق كاراتە فەدەراتسياسىنىڭ پرەزيدەنتى رۋسلان دۇكەنباەۆ جەتەكشىلىك جاسادى. شيراق قيمىلدى, جۇزدەرىنەن سپورتقا دەگەن ىنتالارى ايقىن بايقالاتىن جاستاردىڭ جىگەرلى قيمىلى قاراپ تۇرعان كىسىنىڭ كوڭىلىنە دەنساۋلىقتى قالاي ساقتاۋعا, تۇزەۋگە, نىعايتۋعا بولاتىندىعى تۋرالى كوپ وي سالادى ەكەن.
– كۇندە تاڭەرتەڭ جۇمىسقا قالالىق پارك ارقىلى ءوتىپ بارا جاتىپ, ەگدە ادامداردىڭ شاما-شارقىنشا جاتتىعۋ جاساپ جاتقانىن كورىپ, كوڭىلىم سۇيسىنەدى, – دەيدى وبلىستىق جاستار رەسۋرستىق ورتالىعى جانىنداعى ەرىكتىلەردى قولداۋ ورتالىعىنىڭ جەتەكشىسى داستان ەرمەكوۆ, – الەمنىڭ كوپتەگەن جەرىندە مۇنداي كورىنىستى ءجيى كورۋگە بولادى. بۇل ومىرگە دەگەن وڭ كوزقاراس, مىقتى دەنساۋلىققا دەگەن ۇمتىلىس ءارى ادامنىڭ سارقىلمايتىن ەرىك-جىگەرىنىڭ كورىنىسى. نەگىزى سالاماتتى ءومىر سالتىنا كوبىرەك ءمان بەرۋىمىز كەرەك. سوندىقتان, بۇگىنگى شارانى ۇيىمداستىرۋ بارىسىندا ءوزىمىزدىڭ ءىس-ارەكەتىمىز ارقىلى قالا تۇرعىندارىنىڭ نازارىن اۋدارعىمىز كەلدى. ءبىزدىڭ بۇل باستامامىزدى ەستىپ-بىلگەننەن كەيىن ءوڭىردىڭ كوپتەگەن ادامدارى قولدايدى دەپ ۇمىتتەنەمىز.
شىنىندا دا بۇل ادامنىڭ وزىنە قاجەتتى قارەكەت. جاستاردىڭ جالىندى باستاماسى ەڭبەكتەگەن بالادان ەڭكەيگەن كارىگە دەيىن اسەر ەتىپ, وي سالۋى ابدەن مۇمكىن. ءارى ءبىر قاداپ ايتا كەتەتىنى, بۇقارالىق سپورتپەن اينالىسۋ ءبىر كۇندىك ءىس ەمەس, ۇدايى ءارى تۇراقتى ورىستەتىلگەنى ءجون. رۋسلان دۇكەنباەۆ بۇگىنگىدەي اكتسيانىڭ اسەرى بولارىنا نىق سەنىمدى. ۇلتتىڭ دەنساۋلىعى سايىپ كەلگەندە ءار ازاماتتىڭ اعزاسىنىڭ ساۋلىعىنا بايلانىستى. ال ول ءجىتى كوڭىل اۋدارعاندا عانا مۇمكىن بولاتىن دۇنيە.
بارشاسى ءبىر ادامداي جاتتىعۋ جاساعاننان كەيىن كوكتەمنىڭ شۋاقتى كۇنىندە اكتسياعا قاتىسۋشىلار العاشقى مەديتسينالىق كومەك كورسەتۋ ادىستەرىمەن تانىسىپ, ونى وزدەرى دە مەڭگەرۋگە ماشىقتاندى.
– ەگەر وقىپ, ۇيرەنىپ, حالىقارالىق سەرتيفيكات العىلارىڭىز كەلسە, ءبىزدىڭ كەڭسەگە كەلىڭىزدەر, – دەدى حالىقارالىق دارەجەدەگى نۇسقاۋشى رۋسلان كابيدۋلينوۆ, – بىلگەننىڭ ارتىعى بولمايدى.
جاستار جاعى ترەنينگكە بەلسەنە قاتىستى. ولاردىڭ ارقايسىسى وزدەرىن قۇتقارۋشىلاردىڭ ورنىنا قويىپ, قاتەرلى شاقتا قالاي ءىس-قيمىل جاساۋ كەرەك ەكەنىن كوڭىلدەرىنە توقىپ الدى. مازمۇنى مول ءىس-شارا ورتالىق پاركتەگى سپورت الاڭىندا جالعاستى. بەلسەندى جاستاردىڭ ارقيلى مازمۇنى مول ويدى مەڭزەيتىن ءىس-شاراسىنا قازاقستان ستۋدەنتتەرى اليانسىنىڭ بەلسەندىلەرى مۇرىندىق بولدى. ولار بارلىق شارانى مۇلتىكسىز اتقارىپ بولعاننان كەيىن جاقسى جورالعى بولعان ىستەرىنىڭ سوڭىن قورىتىندىلاپ, ەستەلىك سۋرەتكە ءتۇستى.
كوكشەتاۋ