باتىس قازاقستان وبلىسىنا جۇمىس ساپارى كەزىندە ورتالىق سايلاۋ كوميسسياسىنىڭ (وسك) توراعاسى نۇرلان ءابدىروۆ ساياسي پارتيالار, ارداگەرلەر كەڭەسى, ۇكىمەتتىك ەمەس ۇيىمدار, باق وكىلدەرى, بلوگەرلەر جانە وڭىردەگى سايلاۋ كوميسسيالارىنىڭ مۇشەلەرىمەن كەزدەستى, دەپ حابارلادى وسك-ءنىڭ ءباسپاسوز قىزمەتى.
كەزدەسۋگە مەملەكەت باسشىسىنىڭ ناۋرىزداعى قازاقستان حالقىنا جولداۋىندا ايتىلعان سايلاۋ پروتسەسىن جاڭعىرتۋ جونىندەگى باستامالارىن ءتۇسىندىرۋ جانە تالقىلاۋ ارقاۋ بولدى. جيىنعا قاتىسۋشىلار ماڭىزدى قۇجاتتا ۇسىنىلعان تىڭ باستامالاردى وڭ باعالاپ, وكىلدىك بيلىك ورگاندارىن سايلاۋداعى ارالاس سايلاۋ جۇيەسىنە باسا نازار اۋداردى. ولاردىڭ پىكىرىنشە, الداعى ۋاقىتتا ءماجىلىس دەپۋتاتتارى سانىنىڭ جارتىسى ماجوريتارلىق پرينتسيپ بويىنشا سايلانۋعا ءتيىس. باسقوسۋدا وبلىس اكىمدەرىنىڭ سايلانبالىلىعىن ەنگىزۋ, سايلاۋ جارناسىن تومەندەتۋ, دەپۋتاتتىققا كانديداتتار ءۇشىن سالىق دەكلاراتسيالارىن تاپسىرۋ راسىمدەرىن قايتا قاراۋ جانە مۇمكىندىگى شەكتەۋلى جانداردى ىلگەرىلەتۋ تۋرالى ۇسىنىستار العا تارتىلدى.
سونىمەن قاتار كەزدەسۋدە سايلاۋ كوميسسيالارىن قۇرۋ جانە ولاردىڭ قىزمەتى, باقىلاۋشىلاردىڭ قۇقىقتارى مەن وكىلەتتىكتەرىنىڭ ساقتالۋى, ولاردى جۇيەلى تۇردە وقىتۋ, سايلاۋ ۋچاسكەلەرىن بەينەباقىلاۋ كامەرالارىمەن جابدىقتاۋ ماسەلەلەرى قوزعالدى. مازمۇندى ءارى بەلسەندى تۇردە وتكەن پىكىرتالاس كەزىندە بالاما ۇسىنىستار مەن پىكىرلەر دە ايتىلدى.
سايلاۋ پروتسەسىندەگى ەxit poll ءرولى, سونداي-اق وسى ءراسىمدى تاۋەلسىز قوعامدىق ۇيىمداردىڭ قاتىسۋىمەن وتكىزۋ مۇمكىندىگى ءسوز بولدى. وسى ماسەلەنى كوتەرىپ, ءسوز العاندار مۇنداي ساۋالنامانى جۇرگىزۋ سايلاۋشىلاردىڭ ساياسي مادەنيەتىن ارتتىرىپ, سايلاۋدىڭ اشىقتىعىن قامتاماسىز ەتەتىندىگىن العا تارتتى.
وڭىردەگى ءىسساپاردىڭ ماڭىزدى بولىگى ستۋدەنتتەر جانە جاستار ۇيىمدارىنىڭ وكىلدەرىمەن كەزدەسۋ بولدى. ەركىن ديالوگ فورماتىندا وتكەن باسقوسۋدا ەلەكتروندى داۋىس بەرۋ جۇيەسىن ەنگىزۋ, ونىڭ باسىمدىقتارى مەن كەمشىلىكتەرى سىندى ماسەلەلەر تالقىعا ءتۇستى. جاستاردىڭ كوپشىلىگى ەلەكتروندى داۋىس بەرۋدىڭ تيىمدىلىگى مەن قاراپايىمدىلىعىن اتاپ وتسە, وزگەلەرى بۇل جۇيەگە قاتىستى بىرقاتار قاۋىپ-قاتەر بار ەكەنىن ايتتى.
كەلەلى جيىندا جاستار اۋديتورياسى سايلاۋ پروتسەسىنىڭ وزەكتى تاقىرىپتارى بويىنشا وتكىزىلگەن ونلاين ساۋالداماعا قاتىستى. ساۋالداما ناتيجەلەرى رەسپوندەنتتەردىڭ 43,8%-ى – ەلەكتروندى, 42,9%-ى ارالاس داۋىس بەرۋ جۇيەسىن ەنگىزۋدى قولدايتىنىن كورسەتتى. سونداي-اق رەسپوندەنتتەردىڭ 68,8%-ى پرەزيدەنتتىككە كانديدات مەملەكەتتىك ءتىلدى بىلۋگە ءتيىس جانە لينگۆيستيكالىق ەمتيحان تاپسىرۋ مىندەتتى دەپ سانايدى. ال ساۋالناماعا قاتىسۋشىلاردىڭ 61,6%-ى سوتتىلىعى بار ازاماتتى پرەزيدەنت, دەپۋتات, اكىم سەكىلدى سايلانبالى لاۋازىمدارعا ۇسىنۋعا جول بەرۋگە بولمايدى دەپ سانايدى.
ءوڭىر جاستارىمەن وتكەن كەزدەسۋ سوڭىندا ن.ءابدىروۆ ولارعا مازمۇندى ءارى تارتىمدى ديالوگ ءۇشىن العىس ايتىپ, جاڭا قازاقستاندى قۇرۋعا بەلسەندى قاتىسۋعا شاقىردى.
ساپار اياسىندا وسك توراعاسى تەرەكتى اۋدانىنا قاراستى پودستەپنوە اۋىلدىق وكرۋگىنىڭ تۇرعىندارىمەن جانە وسى اۋىلدىڭ 2021 جىلعى 25 شىلدەدە سايلانعان اكىمى سەرجان ماديەۆپەن كەزدەستى. كەزدەسۋدە اۋىل اكىمى ءوزىنىڭ سايلاۋعا قاتىسۋ تاجىريبەسىمەن ءبولىستى. اۋىل تۇرعىندارى ەلدى مەكەندە وتكەن سايلاۋدى جانە وزدەرى سايلاعان اكىمنىڭ جۇمىسىن وڭ باعالايتىندارىن جەتكىزدى.
اۋىل اكىمى لاۋازىمىنا كانديداتتاردىڭ بارلىعى قاتىسقان پىكىر الماسۋ بارىسىندا اشىق دەبات وتكىزۋ, وسى لاۋازىمعا كانديداتتاردىڭ مىندەتتى تۇردە جوعارى بىلىمدەرىنىڭ بولۋى جانە زاڭدى ءبىلۋ قاجەتتىگى تۋرالى ماسەلەلەر دە قوزعالدى.
وسك توراعاسىنىڭ باتىس قازاقستان وبلىسىنىڭ جۇرتشىلىعىمەن كەزدەسۋلەرى باسقا وڭىرلەردەگى سياقتى الەۋمەتتىك جەلىلەردە ترانسلياتسيا رەجىمىندە كورسەتىلدى. ن.ءابدىروۆتىڭ كەلەسى جۇمىس ساپارى سەمەي قالاسىنا جوسپارلانىپ وتىر.