قىزىل سۋدىڭ قيىندىعىن كوپ تارتقان ءوڭىر بيىل قاپىسىز قامدانۋعا تىرىسۋدا. دايىندىق جۇمىستارى جىل بويى ۇزدىكسىز جۇرگىزىلىپ كەلەدى دەپ ايتۋعا دا بولادى. كوكتەم كەلگەلى تىپتەن قىزا ءتۇستى.
بيىل كوكتەم كەش كەلدى. جىلۋ دا جىلداعى قالىپتى دەڭگەيدەن جوعارى. قاسات قاردىڭ كوبەسى بىردەن سوگىلىپ, جىلدام ەرۋدە. بۇل جاعدايدى قيىنداتا ءتۇسۋى ابدەن ىقتيمال. ەرىگەن قار سۋى بۇرناعى جىلدارى وزەن اڭعارىنان اسىپ كەتىپ, زارداپ شەككەن تسەلينوگراد اۋدانىنىڭ ەلدى مەكەندەرىنەن 200 مىڭ تەكشە مەترگە جۋىق سۋ سورىلدى.
– دەپارتامەنتتىڭ قوسىمشا قىزمەتتەرى اۋدانعا ءساۋىردىڭ باسىندا كەلگەن بولاتىن, – دەيدى دەپارتامەنت باستىعىنىڭ ورىنباسارى قانات دوسپاەۆ, – قازىر سۋدىڭ مولشەرى ارتا تۇسۋدە. قوسىمشا شارالار قابىلدادىق. ەگىستىك القاپتارىنان ەرىگەن سۋ اۋىل ارقىلى وتە باستادى. قوياندى اۋىلىندا جەكە قۇرامنىڭ 51 ادامى, 10 تەحنيكا مەن 8 موتوپومپا جۇمىس ىستەۋدە. مينيسترلىكتىڭ شەشىمى بويىنشا, ازاماتتىق قورعانىس پولكىنىڭ كۇشتەرى دە تارتىلۋدا. جەرگىلىكتى اتقارۋشى ورگاندارمەن بىرلەسە وتىرىپ, ەلدى مەكەن تۇرعىندارىنىڭ وتىنىمدەرى دە تۇراقتى نازارعا الىنعان.
اۋداننىڭ تالاپكەر, قاراوتكەل, قوياندى, ارايلى, قاراجار, قىزىلجار, اقمول, قابانباي باتىر, قىزىلسۋات جانە جارلىكول ەلدى مەكەندەرىندە ەرىگەن قار سۋىن سورۋ جۇمىسى ءجىتى جۇرگىزىلۋدە. ازىرگە ەشبىر نىسانداردى سۋ باسقان جوق.
ساندىقتاۋ اۋدانى دا ساقتىق شارالارىن كۇشەيتە تۇسكەن. بۇل وڭىردە 10 ەلدى مەكەن قاۋىپتى ايماق ساناتىندا. ولاردىڭ جەتەۋى جىل سايىن تاسيتىن جاباي وزەنىنىڭ جاعالاۋىندا ورنالاسقان. جىلاندى وزەنىنىڭ بويىندا باسترىموۆكا جانە نوۆوسەلوۆكا ەلدى مەكەندەرى ىرگە تەپكەن. قوس وزەننىڭ بويىنداعى ەلدى مەكەندەردەگى حالىقپەن تىكەلەي جۇمىس جۇرگىزىلىپ, ويپاڭ جەرلەردىڭ كەستەسى جاسالدى. «بۆر تەحنوسەرۆيس» سەرىكتەستىگى 4500 شارشى مەتر مۇزدى جارىپ, ەرىگەن وزەن سۋى ەركىن اعىپ ءوتىپ كەتەتىندەي جاعداي جاسادى.
قىزىل سۋدىڭ قاتەرىن سەيىلتۋ ماقساتىندا اۋداننىڭ ەلدى مەكەندەرىنەن 73 700 تەكشە مەتر قار شىعارىلدى, 17,5 شاقىرىم كانال بويى جوندەلدى, 9,1 شاقىرىم شاماسىنداعى ارىقتار تازالاندى, جانار-جاعار ماي قورى جيناقتالدى. اۋدانىشىلىك جولداردىڭ 31 تۇسىندا سۋ وتۋگە قاجەتتى قۇبىردىڭ بويى تازالاندى. تاۋلىك بويى جۇمىس ىستەيتىن كەزەكشىلىك ۇيىمداستىرىلىپ, ارنايى شتاب قۇرىلدى. اۋىل شارۋاشىلىعى القاپتارىنان اعىپ كەلەتىن سۋدى قاۋىپسىز باعىتقا اۋدارۋ ءۇشىن 20 موتوپومپا دايىندالدى. وقىس وقيعالار ورىن الا قالاتىن بولسا, قاۋىپتىڭ بەتىن قايتارۋ ءۇشىن 18 بىرلىك تەحنيكاسى, قۇرامىندا 57 ادامى بار توپ قۇرىلدى. التى اۋىلدىق وكرۋگتە موبيلدىك توپ جاساقتالدى.
توتەنشە جاعدايدى ەسكەرتۋ جانە وزگە دە قاجەتتىلىكتەرگە قارجى ءبولىندى. وزەننىڭ مۇزىن جارىپ, اڭعارىن كەڭەيتۋگە 1 ملن 500 مىڭ تەڭگە كولەمىندە قاراجات قاراستىرىلدى. 490 توننا ينەرتتى ماتەريال دايىندالدى. ىشىنە قۇم سالعان قاپتار دا قاجەت بولا قالسا, كادەگە اسىرىلماق.
– قىزىل سۋدىڭ جولىن بوگەپ, قاۋىپتىڭ الدىن الۋعا مۇقيات دايىندالدىق, – دەيدى ساندىقتاۋ اۋدانىنىڭ اكىمى ەربول جۇسىپبەكوۆ, – قازىر قار كۇرت ەرىپ جاتىر, سۋ مولشەرى دە كۇننەن-كۇنگە مولايا تۇسۋدە.
ءدال وسىنداي سىناقتان قاپىسىز قامدانعاندا عانا سۇرىنبەي وتەتىنىمىز انىق. سىن ساعاتتا سەرگەك قيمىلداپ, سەرپىندى ارەكەت ەتپەي بولا ما؟!
اقمولا وبلىسى