«الفا-بانك» پەن «سبەربانككە» سالىنعان سانكتسيالار قازاقستان بانكتەرىنە اسەر ەتپەيدى

«2022 جىلعى 6 ساۋىردە اقش رەسەيدىڭ ەكى بانكىنە – «سبەربانك» جاق جانە «الفا-بانك» اق-عا قاتىستى سانكتسيالاردى كەڭەيتتى. اقش قارجى مينيسترلىگى شەتەلدىك اكتيۆتەردى باقىلاۋ باسقارماسىنىڭ (OFAC) شەشىمىمەن بۇل بانكتەر جانە ولاردىڭ ەنشىلەس ۇيىمدارى, ونىڭ ىشىندە قازاقستاندا ورنالاسقان ۇيىمدارى SDN (Specially Designated Nationals) تىزىمىنە ەنگىزىلدى. ونىڭ ناتيجەسىندە اقش قارجىلىق مەكەمەلەرىن قوسا العاندا, اقش يەلىگىندەگى نەمەسە اقش تۇلعالارى باقىلاۋىنداعى, نەمەسە اقش يۋريسديكتسياسى شەگىندەگى بارلىق مەنشىك جانە مەنشىكتەگى مۇددەلەر بۇعاتتالادى جانە ولار تۋرالى OFAC-قا حابارلاۋ قاجەت», دەپ جازدى اگەنتتىكتىڭ سىرتقى كوممۋنيكاتسيالار باسقارماسى.

ۆەدومستۆونىڭ مالىمەتى بويىنشا, ءبىر نەمەسە بىرنەشە بۇعاتقالعان ادامعا تىكەلەي نەمەسە جاناما, جەكە نەمەسە جيىنتىعىندا, 50 نەمەسە ودان كوپ پايىزعا تيەسىلى كەز كەلگەن ادامنىڭ بۇكىل مۇلكى جانە م ۇلىكتەگى ۇلەستەرى دە بۇعاقتالادى.

«تيىسىنشە, اقش تۇلعالارىنا, ونىڭ ىشىندە اقش قارجىلىق مەكەمەلەرىنە, ەگەر بۇل ۇيىمدار OFAC-تان بوساتىلماسا نەمەسە ۋاكىلەتتىك بەرىلمەسە, ولارمەن وپەراتسيالار جاساۋىنا تىيىم سالىنعان. OFAC الفا-بانكپەن 2022 جىلعى 6 مامىرعا دەيىن, سبەربانكپەن 2022 جىلعى 13 ساۋىرگە دەيىن مامىلەلەر اياقتاۋ مەرزىمىن بەلگىلەدى. بۇل ەكى بانكتىڭ كليەنتتەرىنە اقش دوللارىمەن تولەمدەرمەن جانە اۋدارىمدارمەن وپەراتسيالار قولجەتىمسىز بولادى. بۇل رەتتە كليەنتتەر ۇلتتىق ۆاليۋتاداعى بانكىشىلىك وپەراتسيالاردى قانداي دا بولماسىن شەكتەۋسىز جۇزەگە اسىرا الادى», دەلىنگەن تۇسىندىرمەدە.

اگەنتتىك ماماندارىنىڭ جازۋىنشا, «الفا-بانككە» قاتىستى ەنگىزىلگەن سانكتسيالار بىرقاتار ۋاقىتشا شەكتەۋلەرگە اكەلگەن.

«بانك جەكە جانە زاڭدى تۇلعالار ءۇشىن اقش دوللارىنداعى جانە ەۋروداعى اۋدارىمداردى توقتاتا تۇردى. بۇدان باسقا, جەكە جانە زاڭدى تۇلعالار ءۇشىن بانكوماتتار مەن POS تەرمينالداردىڭ مەنشىكتى جەلىسىنەن تىس Visa جانە MasterCard كارتالارىنىڭ جۇمىسى توقتاتىلا تۇردى.

الفا-بانك ۋاقىتشا جەكە جانە زاڭدى تۇلعالار ءۇشىن قولما-قول اقشا الۋعا جانە اۋدارىم جاساۋعا ليميتتەر ەنگىزدى, كرەديتتەر بەرۋدى توقتاتتى. الفا-بانكتى قوسپاعاندا, باسقا بانكتەردىڭ كارتالارىمەن زاڭدى تۇلعالار ءۇشىن POS-تەرمينالدارداعى تولەمدەردى قابىلداۋ توقتاتىلدى.

بۇل رەتتە كليەنتتەر بانكوماتتاردان قولما-قول اقشا الىپ, جەدەل تولەم جۇيەسىنە (جتج-نە) قاتىسۋشى بانكتەرگە تەلەفون ءنومىرى بويىنشا موبيلدىك قوسىمشاداعى اقشانى تەڭگەمەن جانە تاۋلىكتىك ليميت شەگىندە باسقا بانكتەرگە شوت دەرەكتەمەلەرىن اۋدارا الادى. كوممۋنالدىق قىزمەتتەر, ۇيالى بايلانىس جانە باسقا دا قىزمەتتەر ءۇشىن تولەمدەر تاۋلىكتىك ليميت شەڭبەرىندە شتاتتىق رەجيمدە وتەدى», دەپ جازادى اگەنتتىك سايتى.

قارجى نارىعىن رەتتەۋ جانە دامىتۋ اگەنتتىگىنىڭ ءباسپاسوز قىزمەتى رەسەيدىڭ ەنشىلەس بانكتەرى كليەنتتەر الدىنداعى مىندەتتەمەلەرىن ۋاقتىلى جانە تولىق كولەمدە ورىندايتىنىن اتاپ وتكەن.

«ونىڭ ىشىندە سالىمدارعا, كرەديتتەرگە قىزمەت كورسەتۋ, سونداي-اق اقشا قاراجاتىن قابىلداۋ جانە بەرۋ. بۇل بانكتەر دەپوزيتتەرگە مىندەتتى كەپىلدىك بەرۋ جۇيەسىنىڭ قاتىسۋشىلارى بولىپ تابىلادى, بۇل ازاماتتار قاراجاتىنىڭ ساقتالۋىنا كەپىلدىك بەرەدى. رەسەيدىڭ ەنشىلەس بانكتەرىنە قاتىستى ەنگىزىلگەن سانكتسيالار مەن شەكتەۋلەر قازاقستان بانكتەرىنىڭ قىزمەتىنە بايلانىستى ەمەس جانە ولارعا اسەر ەتپەيدى. قازاقستاننىڭ بانك سەكتورى كاپيتالدىڭ جانە وتىمدىلىكتىڭ ەلەۋلى قورىنا يە – 16 ترلن تەڭگە نەمەسە اكتيۆتەردىڭ 42,3%-ى. بۇل بانكتەرگە اعىمداعى سىرتقى ەكونوميكالىق كۇيزەلىستەردى سىڭىرۋگە مۇمكىندىك بەرەدى. اعىمداعى جىلدىڭ باسىنان بەرى بانكتەردىڭ جيىنتىق اكتيۆتەرى 148 ملرد تەڭگەگە نەمەسە 37,8 ترلن تەڭگە كورسەتكىشىنە دەيىن 0,4%-عا ءوستى. مەنشىكتى كاپيتال 96 ملرد تەڭگەگە نەمەسە 2,1%-عا ءوسىپ, 4,6 ترلن تەڭگەنى قۇرادى», - دەپ جازادى اگەنتتىك اماندارى. قر قارجى نارىعىن رەتتەۋ جانە دامىتۋ اگەنتتىگى بانك سەكتورىنداعى احۋالدى كۇندەلىكتى مونيتورينگىلەۋدى جۇزەگە اسىرىپ وتىرعانىن ەسكە سالادى. «اگەنتتىك قاجەت بولعان جاعدايدا, سىرتقى ەكونوميكالىق تاۋەكەلدەردىڭ قارجى نارىعىنىڭ تۇراقتىلىعىنا ىقپالىن السىرەتۋ ءۇشىن قاجەتتى شارالار قابىلدايدى», دەپ جازىلعان ۆەدومستۆونىڭ رەسمي سايتىندا.